Read Sumi Naga ISAYA 42 Bible Online

ISAYA 42 - Sumi Naga bible

ISAYA 42

¹AMPEU no pi, “Iqeu hi anike julo, ino sunheqhe chekeuke, Ino pa kisheluve keuke, imlo kiqishi chekeuke. Ino iGhungu pesu pa shepichhive ake eno pano ashiayeh kumtsu lau achipi xakutha sughi nani.

²Paye vekipighi ighamukumo nani momu pa sutsa qhemghaimo nani momu alaghilalo pa tsapi chilumo nani.

³Paye ayeghu iho akeu hechhevemo nani momu inhemimi akeu mibo pinhevemo nani. Pano kumtsu lau achipi xakutha sughi nani.

⁴Paye laju achekeu momu amlo kulo ghipu puhavekeu shimo nani; Pano ayeghilo achipi xakutha muto toi shilutsu nani. Putosuu akeqo yeghino pa kukutsu khekulhoshi khe nani.”

⁵Alhou no atsutsu lhophe eno tipau sukhope puani; pano ayeghi eno tile akuxu akeu kumtsu akoghe shipheke; Pano tile timi akeqo kumtsu lau akuxu eno atuthu tsuke. Itehiye AMPEU Alhou no pa qeu vilo ishi pi,

⁶“Ni AMPEU no okuluvae eno akuka otsuvae, ayeghilo kuchou xakutha shikeu jupenike. Ovechewo ino timi jeli kumtsu sasu puloshoqhi lakhi shinike; ovechewo ino ashiayehqo lau akuvu sughi tsu nanike.

⁷Nono anhethi kighichemi nhethi lhaphe tsu nani eno akuzu kughukilo ngo akemi khaqhiphe nani.”

⁸“Ni ilikhino AMPEU oLhou ke. Kutau lhouye ikimthe jukuvu kusaje pemoke; niye ajulho kimhi pelo isheqhe keu kusaje pemo nanike.

⁹Ino asheazu shi pi puakeqoye kuchouno shikupu ighivae. Itehiye akithe vehu ino shuphetsuni cheni; tipaqo shi ipeghi mphi lono ovilo pinike.”

¹⁰Ale kithe lakhi AMPEU shipililo; Ayeghi shekha kutolo pa sheqhekeu phelo! Pa sheqhelo, nongu azughi shou zukilu tuha chemiqo; tile lhoxu akeqo kumtsu pa sheqhelo! Ayeghi putou akeqo eno tile akemi kumtsu pa sheqhelo!

¹¹Asayeqha ngo tile aphughi akeqono asutsa suqhepe Alhou shelo! Kedar lo akemiqono pa sheqhelo! Sela lo kughuna kuamino alokivi aluno naghuto kutsuqa lono ighamukulo!

¹²Ayeghi putou akeqolo akemiqo pelo AMPEU lau sheqhekeu eno ajekipi tsupelo!

¹³AMPEU no aghutomi lakhi toi aghu shinike wuke; paye aghushi nike kutokupui eno khekulhoshi ani. Pano aghule kuke, aghushi ghugha ighake; pa ghumi shou pa kuka kumto pepheke.

¹⁴Alhou no pi, “Ado kushuwalo niye inaqhoi ngoveke; niye iwu timiqo putsamoveke. Ikemu itehiye ino shimasakeu do ighivae; totimino apunu kusu suake toi niye ighamuku ani.

¹⁵Ino atoghi ngo naghutoqo kutsaleni eno atsani ngo asuboqo ighuyive penike. Ino aghoki khila pesu asayeqha kughulhoni eno ayizu kuchoqo puthovetsuni.

¹⁶‘Ino iwu timi anhethi kighichemiqo sasu panonguno khilemu pulachemo keu laghi lono sawu nani. Ino panoqo wu akuzu pesu akuvu kughulhove tsuni eno panoqo zulo kolokoshi keu yeghi pesu kulaqave tsuni. Ino hipaqo vehu shini cheni, eno niye tipaqo shini putsake.

¹⁷Khunoqono ajulho shisukeu pukhu cheni keno, khunono ajulho shipuakeu vilo pano lhou kepi pini keno, Panonguye sunheqhive nani eno shikukujove nani.’

¹⁸AMPEU no pi, ‘Inilo, nongu akini kughupomiqo! Thebei julo, nongu anhethi kighichemiqo!

¹⁹Iqeu nguno anhethi kighicheu khuu ani kya? Ighinikishiu nguno akini kughupou khuu ani kya?

²⁰Israil, noye kumzapushi ithulu puani, ikemu noye tipaqo kiu kiqi kepi ithi ani kya? Noye chilukepu kini puani, ikemu noye kuchouno kiu chilu akya?’

²¹AMPEU ye xalunike khekulhoshi achekeu Lhou ke, ikehu pano pa yezahqo ngo akukutsuqo xaqhe pukuke, eno pawu timiqo pelo tipaqo gihu penishike.

²²Ikemu itehi pawu timiqoye xule puwuvae; panonguye akuzu kughu kilo khathasuvae eno akughukilo kusupe qhivae. Khunomu panongu hakholu kepu kuhano panonguye ghuyilo ilovae eno khetsushi lakhi shivae.

²³Nongu gholo khuuno hipau ini nani kya? Hinguno hilauye nonguye kuto kupui inini kema?

²⁴Khuno xulepuwu kemi ulo Israil suve kya? Tiye AMPEU ampinoke, ninguno pa shou axine shiveke! Pano ningu pelo xupenishi ake toi ninguno xumoveke, eno pano akukutsu ningu tsupua keu agholumoveke.

²⁵Ikehu pano pa loghu ningu shou lepukuke eno aghukishi usugha ghimeshipeke. Ami iqu akeshi Israil qha kumtsu lo pa loghuno pitiqhike, ikemu kiu shiani keno ninguye kitilamu mthaveke; ninguye tipau lono kiumu amlo tsumoveke.”