Read Sumi Naga ISAYA 43 Bible Online

ISAYA 43 - Sumi Naga bible

ISAYA 43

¹Israil, AMPEU oLhokeuno pi ani, “Msakevilo, ino oxalu nani. Ino aje kuughi okuluvae, noye iwuke.

²Kughou nono azu kutho kathasu wuni keno ino ogholo anani; owu shiluksa pelo okuzupholuve pemo nani. Kughou nono ami kathasu wuni keno opitiqhimo nani; akijikusa pejukeu ighikeulo oghuzamo nani.

³Kughengu niye AMPEU oLhou ke, Israil Lhou akimtheu, oxakuluu huke. Niye okhaqhiphe nike Ijip pheve nani; Niye Sudan ngo Seba pheve nani.

⁴Niye okuxu xalunike ashiayeh kumtsu pheve nani, kughengu noye ighenguno akughupuke eno ino okimiye kehu agigihu otsuke.

⁵Msakevilo, niye ogholo anike! ‘Putou kipela kudauno eno putou kulola kudauno, Ino nowu timiqo akilo saghi nani.

⁶Ino ahuu vilo panoqo puwuvelo pi pi nani eno apeu vilo panoqo hakhape akevilo pi nani. Iwu timiqo putosuu akeu yeghi lono ideighi pelo, ayeghi ku-aqha kumtsu lono ighi pelo.

⁷Panonguye iwu timiqoke, ijekipipu shipeniye ino panoqo lhopheke.’

⁸Alhou no pike, ‘Iwu timiqo kughakutha-alo kusaghilo, Panonguye anhethi puani ikemu anhechemike; Panonguye akini puani kemu akini kughupomi ke!

⁹Kughatha junike ighilopi ashiayehqo kulo. Panoqo lhou khikhiuno ashe-azu vehu pitsulu nani kya? Tipaqo gholo khuuno itehi kiu shiani keno pi puatsu kya? Hi alhouqo vilo panoqo wu thopimi saghino panonguye achipi kepi piju pelo, eno panoqo tsaye kuchou kepi piju pelo.’

¹⁰“Israilmiqo, nonguye iwu thopimi qoke; iqeu shipenike ino nongu kisheluke, tishianguno nonguye ni ithi eno ilau pulube peniyeke eno ilikhino Alhou kepi vetha lu peniyeke. Inguno kutau lhou kiumu kuhake; puzuu nomu kuha eno khilemu kuha nanike.

¹¹‘Ni ilikhino AMPEU ke, nongu xalunikeuye ilikhike.

¹²Kiu shive nani keno ino asheazushi pike eno tishi puzu ino nongu tuchohijuluke. Inaghami lhou khunomu hipau shi puamoe; nongu ye iwu thopimi ke.

¹³Niye Alhou ke eno pulhapuju tishi anani. Milakhimu ikuka lono pomla; ino kiu shikeno khunomu kilive mlake.’

¹⁴Israil Lhou akimthe, AMPEU nongu xakuluuno pi ani, ‘Nongu xalunike ino Babilon shou ghushimi aqo lakhi puwu nani; Ino aphughi khagho tulephove nani, eno tile akemiqo ghughaye qa mlokeu shive nani.

¹⁵Niye AMPEU, nongu Lhou akimtheke. Ino nongu lhoke Israil, eno ino nongu kukauke.’

¹⁶Kha-ghi AMPEU no azughi kathasu alaghi lakhi mlake, azu kighide kathasu ala lakhi mlake.

¹⁷Pano ghushimi aqo kuloghi lakhi sawo kutsapinyiveke, khurkulu ngo khurshi ghushimi aqo lakhi. Panonguye aqhou iluqive, khilemu ithughimove, akulu fupinhe ketoi panonguye hauve!

¹⁸Ikemu AMPEU no pi, ‘Wovekeulo kiu shipuani keno tipau mutupe akevilo momu khaghi kiu shive keno tipaulo auve kevilo.

¹⁹Avehu akithe ino shiniye akeu jualo. Tipauye shi ipeghiayeke nonguno itehiye tipau ithulu nani! Asayeqha kathasu ino ala lakhi mula nani, eno tilano aghokiti zu nongu tsu nani.

²⁰Tughashino agigihu itsu nani; kughou asayeqhalo ino aghoki qowupe puzu ino kishe luvekemi timiqo lau ino azu tsuni keno, sher ngo ostrik no isheqhe nani.

²¹Isala ghenguno panonguye ino lhophe puakeqo timike, panonguno isheqhe shipili nani!’

²²AMPEU no pi; ‘Ikemu Israil, nonguye iju anga ghaiveke; nonguno imllamoveke.

²³Nonguye ilau bheri pitipe mllakeu sughimoe; Nonguye aghashikeu pesu igihuke kumoe. Niye agho tsulopi khukeuno nongu ghimeqhi puamoe momu piti kumnakeu nongu vilo khukeuno nongu ngaqhi puamoe.

²⁴Nonguye ighenguno piti kumna kepu qhukeu shimphie momu nowu lhoxu tha pesu ighapiqi puamoe. Tipa zuqhulo nongu xine pesu iqa qhike; nonguno akumou shikeuno ingaqhi puanike.

²⁵Ikeghi, niye nongu xine pevetsu chekeu Lhou ke, niye nike ghenguno tipau shitsu cheni. Niye nongu xine nongu shou tishi puatsumo nani.

²⁶“Ningu kughaki lo wuni nolo; nonguno ngukukepu aghiaye sughilo! Nonguye achipi kepi pipenishiaye no tsakugha qhijulo!

²⁷Nongu puasu atughumino axine shiveke; nowu sakiphemino ishou axine shike,

²⁸Nowu ayehpemino ikungo-a kitiqevetsuke. Ikehu ino kutsakungokeu Israil shou sughike; iwu timiqoye ino thaighavepeke.”