Read Sumi Naga ISAYA 44 Bible Online

ISAYA 44 - Sumi Naga bible

ISAYA 44

¹AMPEU no pi ani, Itehiye inilo, Israil iqeu ino kisheluvekemi, Jakob laghamiqo.

²Niye AMPEU oLhophekeuke; apolo azughoke lono ino okuphu acheke. Msakevilo; noye iqeuke, ino kimiye chekemi, ino kisheluve kemiqoke.

³“Tughuthi akeu yeghi ino azu leqhi tsu nani eno qhaike yeghi shou aghoki qowupe nani. Otianuliqo shou ino ikuka lepuku nani eno olaghamiqo shou ikukumgha lepuku nani.

⁴Panonguye azu akivishi suchekeu tsani toi thuipeghi nani, aghokiti zu qowu akeulo Mulo subo aketoi nani.

⁵“Timi lakhi khino ishi pinani, ‘Niye AMPEU laumike.’ Panonguno Israilmi gholo kime luvenike ighi nani. Milakhikhino AMPEU je pesu aumlolo amichishipu nani eno Alhou wu timi gholo lakhi kepi pa likhi pa kihisu nani.”

⁶AMPEU, Israil shou ayehkipeu eno sushokuluu, Akughushu MPEU no hipau pianike: “Niye atughiu, ashekhau, ilikhino Alhou; inguno kutau Alhou kiumu kuhae.

⁷Ino kiu shikeno kutami khualano shikulupu ani kesha? Aghuloki abothu lono ashekha kutolo kiu shini keno khuuno asheazushi pikulupu kya?

⁸Iwu timiqo, msakevilo! Nonguno ithianike khaghi ghuloki lono itehi kutolo kiu shini cheni keno kumtsu ino ashe azushi pike, eno nonguno iwu thopimiqoke. Kutau lhou ani kesha? Ino chimla aphi keu lhou akumtou khami ani kesha?”

⁹Ajulho shichekemi kumtsu ame kuhae, eno panonguno shishe amekusho shichekeu lhouqoye avehupu kuhae. Khunono hikithipu lhouqo mllacheni keno tipaqoye anhethi iche eno mbomzuke eno panonguye kujo mzave nani.

¹⁰Alhou lakhi kepi mllaniaye ayi pesu ajulho shikeuye aloke kumoe!

¹¹Tipau mlla chekemi kumtsu shikuchunive nani. Timi khunono ajulho shipe qhicheni keno tipaqoye timi lhoxu kethono kutauke kumoe. Panongu pelo ighino kimchiju pelo, panonguye thughuive eno kujomzave nanike.

¹²Ayi kiyiqimino ayi tachu lakhi pesu ami lono tipau peitha cheni. Pa u-kumto pesu ayihesu peqhe no ayi hepha pesu akoghe kughulho cheni. Pano tishi mla kelo, paye muzuthi tughuthi eno akulho shive cheni.

¹³Asu kumlau no asu mighiju cheni. Pano akiyepu pesu kughulhokeu hethapuku cheni, pawu kughakusu pesu chhuthaphe cheni eno timi ju koghe lono tipau shicheni, timi jukoghe aghile pushi tipau pesu pa kilo qhipuaniye.

¹⁴Paye peithaniaye kedar subo yeqhi cheghiluvi momu aghasu lono aphisu momu kupra subo kishe cheghiluvi. Momu pano laurel subo shosu luvi eno tipau thuwupe nike tsutsughu kheaghiluvike.

¹⁵Timino asubo pesu hami sukughupusu shi eno hamino ajulho shisu nikeulo peitha ishi chenike. Asubo lakhilo aleqhi lakhi pesu ami shipuzu pano pughalu eno achuqupu belu lholu; aleqhi lakhiuye pano alhou lakhi shicheni eno tipau mlla cheni.

¹⁶Asu tuxa pesu pano ami shi no ashi ghuchu cheni eno aghakiqi shicheni. Pano ami pughalu puzu ishi picheni, “Kiutou luvui eno alo kela! Amiye ighono juvike!”

¹⁷Tipausu tuxa pesu pano ajulho shisu eno tipau zulo itsaiqi pishiqhono mllae. Tipau vilo pano ishi inikhu, “Noye ilhouke, ixalulo!”

¹⁸Timi tipaqoye panono kiu shiani keno mthae eno vethalu chemoe; kughengu panongu nhethi nhavetsu kehu ithumla eno panongu kukumsu nhavetsu kehu kuchou mthake.

¹⁹Ajulho shisukemiye ishi pinikeu alokutsu momu kumsukulu kuhake, “Asu tuxaye ino sughu cheni. Amibalu lono ino asho pugha cheni eno ino ashi ghuno chuve cheni, Tipasu tuxaye ino ajulho shisuke. Niye asulu lakhi zulo itsaiqi pishiqho auvae!”

²⁰Ayevu chuakeu kumlho shivae. Pa ghuzunikha kukumsu no pa sapimi kehu paye xaphemla kepu shivae. Ajulho shisukeu pa ulo tsuqupe akeuye khilemu alhou kumo kepi kitilamu pa lolo kumsulukeu kuhake.

²¹AMPEU no piani, “Israil, hipau kumsululo; noye iqeu kepi kumsululo. Iqeu shipenike ino olhopheke, eno niye khilemu okumsuma moke.

²²Khungkusu toi ino oxine jolevetsu nani. Ilau ideghilo; oxaluchekeu huye nike.”

²³Kungughaqo, alokivishi ighalo! Ayeghilo aqoh thonheikeu ighalo! Naghutoqo eno aghasulilo asubo kumtsu alokivishi ighalo! AMPEU no pawu timi Israil xalukeu lono pa kughushu pephe piyevae.

²⁴“Niye AMPEU, nongu xakuluu; nongu lhophekeu huye nike. Niye AMPEU, thwokha kumtsu lhokipheu ke. Ilikhino kungugha sukhope qhike; Ino ayeghi lhokelo, kutami khuu nomu ikuphu puamoe.

²⁵Ino asaqhi chekemiqo shikughu zuke eno ayepu yesu jupe asaqhi chekemino asheazu shi pikeu ino hexake. Alokutsumiqo tsapi ini lachilevetsu eno panoqo lokutsuye aghuzu nikha kepi piyeke.

²⁶Ikemu kughou iqeuno asheazu tsa pini keno, kughono ino aghinimi puwu no ikukughu lhepiye peni keno, akukughu tipaqo eno ashe-azu tsa tipaqo ino kuchou lono shiche nipeke. Jerusalem lo timiqo kughuna kithe nani kepi ino pike, eno Judia lo aphughiqo shipuku kithe nani kepi pike. Aphughi hupaqoye ixapinyive keu lono ithughive nani.

²⁷Atsa lakhi pesu ahza tsuno ino azughi qhaivepeke.

²⁸Ino Cyrus vilo pike, ‘Nono ighenguno ayehkipeu shini; Opelo ino kiu shipenishi keno nono shi nani. Jerusalem shikithe nikeu nono ahza tsu nani eno Achineki boqha qha wonikeu nono ahza tsu nanike.’ ”