Read Sumi Naga ISAYA 45 Bible Online

ISAYA 45 - Sumi Naga bible

ISAYA 45

¹Cyrus pelo akukau shipenike AMPEU no pa kisheluvae! Ashiayehqo lelupenike AMPEU no pa susu puanike; kukamiqo kuka liluve penike pa puwuke; pa pelo ilolupenike AMPEU no aphughiqo khagho khaqhitsu nani. AMPEU no Cyrus vilo pi,

²“Ni ampino olaghi kutotsu nani, naghuto ngo atoghi kulaqavetsu nani. Alazayi kikhaqo ino kubolevetsu nani eno ayikhadu hechhevetsu nani.

³Zumoyikeu ngo tuqhou-a lono aku ghupu kinikulu pesu ino otsu nani; tileno niye AMPEU kepi nono ithi nani, eno Israil Lhou no oje kughi okulu kepi ithi nani.

⁴Iqeu Israil ino kisheluvekemiqo kuphu penike ino no sukusu shike. Ino agigihupu kije pesu otsuke noye ni ithimono aghie pinamu

⁵‘Niye AMPEU ke; alhou kutau kuhake. Noye ni ithimono aghi pinamu nono akumto avehupu shiakeu ino otsu nani.

⁶Ino hipau shiakeuye ayeghiqha shekha lakhi lono ashekha lakhiu kutolo akemi kumtsu pelo niye AMPEU ke eno alhou kutau kuha kepi ithipe niyeke.

⁷Ino akuvu ngo akuzu kuma lhophe tsuke; Ino kukumgha ngo kutsakungo keu kinikujo sughi cheni. Ni, AMPEU no hipaqo kumtsu shichenike.

⁸Tsughuqhi akeshi atsutsu lono ino tokulu piqitsu cheni; ayeghino tipau lunike lhaphe nani eno ililai khaqhikeu ngo amikucho xakutha puipeghi nani. Ni, AMPEU no hipau shipe nanike.

⁹Ayeghiliye pa lhokeu ghechilenike ighumoni kesha? paye ali kutauqo paphi keno kuu. Aghaniye alikishiu vilo kiu shiani kelapi iniju cheni kesha? Aliye pa lhokeuye kutshakugha kuha kepi muchhoni kesha?

¹⁰Timi khuno ighumo puzu pa puaza vilo “Nonguye kushiye hikithi pushi ilho kya?” ipi pilu nani kya?

¹¹Israil Lhou Akimtheu, AMPEU, ighi nikeu kughupe puache keuno pike, “Nonguye inuliqo vehu ivilo iniju akepu kuhake, momu niye kiu shikepu kela ivilo piakepu kuhake!

¹²Ayeghi lhokeu huye inoke eno tile kughunape nike timi jeli lhoke. Ikuka pesu ino kungughaqo sukhope qhike; ino tsukinhe, aqhi eno ayepuqo tsuqupe ani.

¹³Ni ampino Cyrus pelo peithawo penike xukuthoke ikimji shikupu eno thimeqo achipilo qhipeni yeke. Pano pulachekeu laghi kumtsu ino sukumzu nani. Pano iphughi Jerusalem shikithe puku nani, eno iwu timi akughushi akeu lono kuqhophe nani. Hipau shinike khunomu pa piqe puamoe momu kulugho pa tsu puamoe.” Aqokitikhi MPEU no piveake.

¹⁴AMPEU no Israil vilo pi, “Ijip ngo Sudan lo kinikulu akeuye owu shi nani, eno Seba lo timi kushuwaqoye oqemi shi nani; Panonguye ayi kichheno tshupesu opape nani. Panonguno ozulo itsaiqi puzu ishi piphetsu nani, ‘Alhou ye ogholo ani, pa likhino Alhou ke.

¹⁵Israil Lhou, pawu timi xaluchekeu Lhou ye pa likhi pa kughutshupe acheni.

¹⁶Khunoqono ajulho shisu cheni keno tipaqo kumtsu kujove nani; panoqo kumtsu kujo mzavepe nani.

¹⁷Ikemu Israil ye AMPEU no xaluke, eno liwu tokuluye alhokupujulo ache nani; liwu timiqoye khilemu kujo mza vepemo nani.’ ”

¹⁸AMPEU no kungughaqo lhopheke, Alhou ipichekeu huye pake! Pano ayeghi kughu eno lhopheke, pano hipau mutotoi shike eno pepushu niyeke. Paye hipau pesu munamghai lhoke kumoe, ikemu timi pelo kughunache peniyeke. Hipau pikeu huye panoke, “Ino AMPEU ke, alhou kutau kuhake.

¹⁹Niye tuqhouno pipuamoke momu ipulouye kusupesu qhipuamoe. Niye Israilmi vilo munamghai keu alo iphujulopi pi puamoe. Niye AMPEU ke eno niye kuchou tsa picheni; kiuno achipi keno ino ithipe acheni.”

²⁰AMPEU no pi, “Ashiayehlo timiqo, kumqo pesu ighilo, akukaqha ikiqive kelo ghupe puaghikemiqo; atsa kughatha kepushi nonguye ighilo! Asuno ajulho shikeu pesu kulobide piye chekemiqo eno panoqo xamlakeu lhou lau khuchekemiqo, kiumu mthakemiqo!

²¹Ighilo eno kughakutha alo nongu wu atsa kukughapu pesu ighilo; angulami dolono atsa kighinikile jupelo. Kiu shive nani keno khuuno khaghino asheazu shi pikya? Tiye ni, AMPEU timi xaluchekeu Lhou no kutau lhou kuhake ipike kumo kesha?”

²²“Ilau xaideghilo eno xaluve pelo, ayeghiqhalo timi akeqo! Ilikhino Alhou ke, kutami kuhae.

²³Ino tushoqhive keuye kuchouke, ikichi lono piqhivekeu tsake eno tiye kilivemo nanike. Ino niye kiukeno ti kumtsu pesu tsaquino piqhi ani: Timi kumtsu izulo ighino qhoqhunhe nani eno iqhoqhukeu shoqhi shi nani.”

²⁴“Panonguno pinanike ilau likhino tokulu ngo akumto phulu cheni; ikemu imthi chekemi kumtsu kujo mza keu sholu nani.

²⁵Ni, AMPEU no Jakob laghami kumtsu xaphelu nani, eno panonguno sheqhekeu itsu nani.”