Read Sumi Naga ISAYA 46 Bible Online

ISAYA 46 - Sumi Naga bible

ISAYA 46

¹“Babilon lhouqoye ashekhalo hitoive nani! Bel ngo Nebo ghuthu lakhiloye itsaiqi mlla chekehu itehiye gadahaqo shou musho pipe nani, akulhoshive keu lhoxuqo ghutsu qaqhi nani.

²Ajulhoqoye pano likhi pano xamlake; panoqo tsuquluveno pusu wuve nani. Babilon lhouqoye hitoi ashekha shive nani!

³‘Jakob laghamiqo, itsa inilo, nongu iwu timiqo gholono ghupe puaghikeqo. Nongu punuqhike lono ino nongu tuchohiju cheke.

⁴Ino nongu Lhou ke nonguno kitemi shike kutolo eno asa mpaveke kutolo ino tucho hiju nanike. Ino nongu kughulhoke eno nongu tucho hiju nani; ino nongu kuphu eno nongu xaphelu nani.

⁵“Nonguye ipesu khuu kimighini kya?” ipi AMPEU no pi. “Kutami itoikemi ani kesha?

⁶Timino pisabo lhapheno shunayi lephe cheni; panonguno tsandiyi ahhu lono mighi cheni. Panonguno shunayi kiyiqimi pelo alhou lakhi mlatsupe nike piqe cheni; panonguno itsaiqino tipau mlla cheni!

⁷Panonguno abighilo tipau ikhiqhe pe xapuwu cheni; panonguno a-a lakhilo qhi cheni eno tipaulo ghope qhi cheni, tipa alono kutau ithawulu chemoke. Timi khuno tipau vilo inikhuni keno tipauye khochile chemo momu shiluksa lono pa xaluchemo ke.

⁸“Nongu axinemiqo, hipau kumsululo; ino kiu mlaveakeno kumsu kutojulo.

⁹Kha-ghilo kiu shive keno kumsululo; ilikhino Alhou eno itoikeu kutau kuha kepi ithi luvelo.

¹⁰Inahu abothu lono kiu shi ipeghini keno asheazushi ino pivae; khaghino kishive nani keno ino pivae. Ikukughuye khilemu ikiqimo kepi ino pike, ino kiu shinikeu shipuani keno tipaqo kumtsu ino shini cheni.

¹¹Kipelauno ighilopi ino timi lakhi kuani; Pano aluqu lakhi toi ihhi iqighi nani eno ino kughu puakeu shi kupu nani. Ino pivae eno tiye shive nanike.

¹²“Nongu amlo kiqhimiqo, itsa inilo, tokulupuye putosupe anikepi kumsuchekeqo.

¹³Tokulupu tsala ino punukhoi sughi ani, hiye khilemu putosuu anike kumoe. Ino xalunikepuye munuvemo nani. Ino Jerusalem xaphelu nani, eno tilehino agigihupu Israil lau sughi nani.”