Read Sumi Naga ISAYA 47 Bible Online

ISAYA 47 - Sumi Naga bible

ISAYA 47

¹AMPEU no piani, “Babilon, okuka lakhu lono iqighivelo, eno ayeghi mukhulo iqalo. Ghuthu lakhi noye ilimi toike, le mlakeu phughike, ikemu itehi noye mutshaminhei eno muduniyi keu kumovae! Noye itehiye aquaxemi lakhi ake!

²Athi kutsughu tuqu tukulo alo! asho kubo alo! Ogi kunha phi lhavelo, ophimini kivi xaqhivelo! Aghoki katha kepushi omini lipuku luvelo!

³Noye aphi kumsa akeu timino ithulu nani Noye aqhokigheu shivekeu eno kujovekeu panonguno ithulu nani. Niye amkhu lunicheni eno khunomu ihakhamlake.”

⁴Israil Lhou akimtheuno nikuqho pheke pa jeye Aqokitikhi MPEU ke.

⁵AMPEU no Babilon vilo pi, “Akuzulo eno inaqhoi keulo iqalo; Panonguye ovilo ashiayehqo kuka liu kepi hinguno hilauye pimoake!

⁶Niye iwu timiqo shou imlo ideke; panoqoye iwu kumo toi ino peitha veke; Ino panoqo pesu okukalo suve tsuke, eno noye panoqo kimiyeqhiyi keu piyemoke; kitemi ghi nono mughachhoi peithake.

⁷Nono kumsukeuno noye pulhapuju akukaliu shia nani kughashike, ikehu hipaqo omlolo kuhake momu ashekhalo kishive nani kela kumsujumoke.

⁸‘Itehiye hipau inilo, no aghakiqipu kimiyekichiu, noye mutotoi eno kiumu oshou shimla akepi kumsu achenike. Nono piakeuno noye Alhou toi kije kepi cheni, eno khuumu otoikeu kuhakepi acheni. Noye khilemu tusachimemi shimoa kepi kumsu acheke momu otianuli ye kithikuha shimo nani kepi cheke.

⁹Ikemu paikhavino, atsala lakhi lono hikuma kinikujo oshou shive nani. Nono kuduu jeli peithaju anamu noye okimi ngo onuliqo puhave nani.

¹⁰“Olhoksalo noye olikhi opesu achipiu shiache; khuumu ojuthulumo nani kepi nono kumsucheke. Okighithi ngo olokutsuno osabideveke, eno nono olikhi ovilo pike, ‘Ino Alhou ke milakhimu itoikeu kuhake.’

¹¹Oshou kutsakungo keu ikughi nani, eno owu kuduu shichekeu lakhimu tipau lakhamla nanike. Zuleno ixapinyikeu oshou ikughi nani, tiye nono khilemu pumo chemokeuke!

¹²Owu kuduu khadu eno zuluvechekeu jeli kumtsu qhivelo; nono lhothemi shiaphi lono tipaqo peithacheke. Kutoumu tipaqoye okuphulu nani keniake; kutoumu nono oghumi shikichilu nani keniake.

¹³Noye akukutsu ithuluve kethiu ghi akuka kuhake. Nono yepu saqhimi, ayepuqo phuchekemi pelo azuu ighieno oxaluve pejulo, panoqono atsutsuqha kotha kikekeu shipe qhicheni eno aqhi atsutsu oshou kiu shiveni cheni keno ovilo pichenike.

¹⁴“Panonguye pano likhi panoqo ghi xamla nani, ami kuyiquye panoqo ghenguno pughalu kepushi luvuyi keu-mi kumo nani ke.

¹⁵Ayepu saqhimi nono okuxu kupu julo kusutsaju chekemiqoye, olau panonguno alokeu shitsuni keuye tipauke. Panonguye oqhiveno pututa lalo wuve nani, eno oxalunike milakhimu ngomove nani.”