Read Sumi Naga ISAYA 51 Bible Online

ISAYA 51 - Sumi Naga bible

ISAYA 51

¹AMPEU no pi, “Nongu xaluve penishikemiqo, itsa inilo, kuphupe nike ilau ighi kemiqo. Atuqu khipau launo nongu ighi keno kumsujulo, khipau tu kuchhuki lono nongu chhuphelu keno kumsujulo.

²Nongu pasu Abraham kumsujulo eno nongu iko ighikeu Sara kumsujulo. Kughou ino Abraham kulukeno tilehi paye atianuli kuhake, ikemu ino atianuliqo pa kumghatsu; Ino pa polo kughukomi pelo kihi khamla kepu shitsuke.

³‘Niye Jerusalem lau eno tipau ixa pinyi akeulo kughuna akemiqo shou amlo ighiqhiyi keu anike. Li yeghiye asayeqha lakhi shianamu ino tipau pesu aghutu lakhi shi tsu nani, tiye Eden lo ino shikeu ghutu kimihi lakhi shi nani. Alokivi ngo alokiqipu tilehi anani eno sheqhekeu ngo shikimthi keu le tilehi ilau tsu nani.

⁴“Iwu timiqo, itsa inilo, ino kiu piani keno inilo: Ikukutsu pesu ashiayehqo lau ino tsuke iyezahno akuvu panoqo lau sughi nani.

⁵Ino keyi ighi puzu panoqo xalu nani; ino ighikepu ghulokiye punuvae. Ni ampino ashiayehqo shou ayehpe nani. Putou akeu yeghino ni ighinikeu khe ani; panoqo xalupe nike panonguye lajuqhiyi ikhe ani.

⁶Atsutsulo jupukulo, ayeghilo jupi qilo! atsutsuye amichhi toi hailove nani; ayeghiye aphimini toi aqashive nani, eno tile timi akeqoye amiyi toi thikhave nani. Ikemu xaphekulu ino pechekeuye alhokupujulo ache nani; ino tolukeu no ashekhauke.

⁷‘Nongu achipiuye kiu keno ithi akeqo, itsa inilo, ikukutsu nongu mlolo ithamono achepe kemiqo! Kughou timino nongu junuqhi eno thaighani keno musa kevilo;

⁸Panonguye apilano chuvekeu phi mini toive nanike! Ikemu xaphekulu ino pechekeuye alhokupujulo ache nanike; ino toluvekeuye ado kumtsu acheuve nani.’

⁹Idathughilo AMPEU, nikuphulo! Okuka peithano ni xalulo; khaghi ghulokilo nono shikeu toi okuka peithajulo.

¹⁰Azu ghahwu Rahab ghitha pinyivekeu huye nonoke, eno nono azu katha susu alaghi lakhi mlake, tishi anguno nono xalukeqono tipau kathauluke.

¹¹Nono khunoqo lekholuvea keno tipaqono alokivishi Jerusalem tolu nani, alokivi launo ighamuku alephesu tonani. Panonguye alhokupuju alokivishi nani, pulhapuju ghenguno amlo kusa eno amlo ghime lono kuqho pheve nani.

¹²AMPEU no pi, ‘Oshikumto chekeu huye nike. Nonguye kushiye thivenikuau timi musa cheni kya? paye atsuni nguno akushuu xuchemo ke.

¹³Nonguye nongu lhoqhikeu AMPEU kumsumave akesha? atsutsu sukhope qhi eno ayeghi boqha qhawokeu huye pake. Kushiye nonguye akuxu kupujulo nongu qodaneda chekemino nongu pughuqhikeu eno nongu kutsa veniye kutope akemiqo musa acheni kya? Panoqo loghuye nongu bulumoake.

¹⁴Akughushi achekemiye itheno khaqhi pheveni cheni, panonguye akuxu kushuwa xu nani eno panonguno achuqupu avehupushi akeu ithulu nani.

¹⁵“Niye nongu Lhou AMPEU ke; Ino azughi xuputhoke eno tipau zufukukuchono igha cheni. Ijeye Aqokitikhi MPEU ke!

¹⁶Ino kungugha sukhope qhike eno ayeghi boqha qhape qhike; Ino Jerusalem vilo pike, ‘Noye iwu timike! ino ikukutsu tsa otsu puani, eno i-u pesu osusho cheni.’ ”

¹⁷Jerusalem; ida thughivelo! Olikhi okudaputhulo eno ithughi velo! AMPEU no pa loghu lono nongu pelo shopenike aghime jukhu tsukeu nonguye shomzuvae; Nonguno tipau yekhave eno tipau no opelo izuvulaive peke.

¹⁸Nongu saphenikemi milakhimu kuha, nowu timi gholo milakhimu o-u lono sunhe sawuni kemi kuhake.

¹⁹Kuphakugha ghi kutsakungo keu oshou ikughike: noyeghiye aghu kishino kutsa leve eno nowu timiye akhu-ava shiveke. Khunomu nongu kimiye qhiyini kemi kuhaveke.

²⁰Alaghila cheku kumtsulo now timiye qeikelauno iluqike; panonguye ashihami lichelo ashe meluvekeu toike. Alhou loghuye khipaphi keno panonguno pepujuake.

²¹Nongu Jerusalem lo aghime shiju kemiqo nonguye shomzupe akelo hevulalai akeu toi kemiqo,

²²AMPEU oLhou no osuhope ani eno piani, “Ino iloghu lono nongu tsukeu jukhu niye ikhiluve ani. Nongu pelo hevulalaive pekeu itaghi nonguye itsayiji shokithepemo nanike.

²³Nongu qodaneda chekemiqo eno nongu pelo alaghilalo ihozu vepe kemiqo, eno nonguye ayeghi mukhu toi nongu qoqhi che kemiqo ino tipau ji piye nanike.”