Read Sumi Naga ISAYA 52 Bible Online

ISAYA 52 - Sumi Naga bible

ISAYA 52

¹Jerusalem mutolulo eno itaghi kije shiluvelo! Alhou phughi akimtheu, jukighilepu jukivi pepuluvelo! Mithekumomiye khilemu ohuki khalo itaghi ilomo nani.

²Jerusalem, olikhi okilhephe pesu kuqhopheluvelo! Ayeghi mukhu lono ithughiveno akuka lakhulo iqalo! Otsughape akeu yikichhe lekho velo Zion lo akughushi akemiqo!

³AMPEU no pawu timiqo vilo pi, “Kughou nonguno aquaxemi shiuve keno nongu ghenguno pisa tsupe puamoe; tipaphi lono nongu kuqho phevekeulo ghi kiumu ame tsumo nanike.

⁴Kughou nonguno Ijip lo inami shi xuachekeno, tiye nogho apulou lono tishi puani ke; ikemu Asiriya no anguka lono nongu sawuveke eno nongu ghenguno kiumu ame tsupe puamoe.

⁵Itehi nonguye Babilon loghi tipaphi shiani, nonguye akughumi shiani eno nongu ghenguno kiumu ame tsupuamoe, khunoqono nongu shou ayehpe chekeno aqhekuza akulaki shike eno tamono ijupe aphimuqhuke.

⁶Ighinikeu ghulokilo nonguno niye Alhou eno ino nongu putsakepi nonguye pilu nani.”

⁷Naghutoqo kathasu aghinikishimi ighikeuye kiutoi akumzapushi jukivipu kelae! Atsakiviu pecheni, alakishi sutsa kithe! Toluvekeu pano asheshu eno Zion vilo pi, “OLhou ye Akukauke!”

⁸Khunoqono aphughi ghukhe shiani keno ighamuku ani, alokivi launo ighamuku ani! Panongu nhethi ampino Zion lo AMPEU ideghikeu ithuluni chenike!

⁹Jerusalem xalepinyipe akeqo, alokivi ghugha ighaphelo! AMPEU no pa phughi lekholu nani eno pawu timi lokughunotsu nanike.

¹⁰AMPEU no pa kuka kimthe peitha nani; pano pawu timi xaluni, eno ayeghiqhano tipau ithulu nani.

¹¹Nongu achineki nhemgha xapuche kemiqo, nonguye mutsuqheino Babilon qhivelo! Chinikepu nhemgha kiumu bukevilo; nonguye akimtheshi apuzu chevelo.

¹²Ishiuloye nonguye mighimghai chevekepu shimo nanike; nonguye pove niaye pukaputsakeu shimo nanike. AMPEU nongu Lhou no nongu sakipheu shinani eno hula hila kumtsu nongu shopesu wu nanike.

¹³“Iqeuye pa kumlapulo shiwotolu nani; akiqheu lono pa gihu kepu shinani.

¹⁴Kughou timino pa ithulu keno panonguye thughuyive; Paju shishe shipusavetsu kehu paye timi kumo toive.

¹⁵Ikemu itehiye ashiayeh kutomono pajupesu akumzaqhiyive nani, kukamiqoye akumzaqhiyi kelauno atsa piphe move nani. Panonguno jupuzu khilemu ithi mono achekeu kiukela vetha lukepu shi nani.”