Read Sumi Naga ISAYA 55 Bible Online

ISAYA 55 - Sumi Naga bible

ISAYA 55

¹AMPEU no pi, “Khunoqono tughuthi anikeno, ighilo, Azu hilau anike! Ighilo, nongu pisa kuhakeqo, athi qhupesu chulo! Ighilo! atsayi ji ngo akichhizu qhululo, noye ame kiumu tsumo nanike!

²Kushiye kiumu aghaqimo kepu lono pisa peve cheni kya? kushiye nonguno qelukeu puwo khave keghi muzuthi cheni kya? Itsa inilo eno ino pikeu shilo, eno achuqupu kumtsu nguno akiviu pesu nonguno alopivilu nani.”

³“Iwu timiqo, itehiye inilo eno ilau ighilo; ilau ighilo eno nonguno akuxu alu nani! Ino nongu sasu alhokupuju ghenguno puloshoqhi lakhi shi nani eno David lau kukumgha ino piqhipuakeu nongu tsunike.

⁴Ino pa pelo ashiayehqo shou saki pheu eno ahza kutsuu shipeke, eno ino pa vechewo ikuka panoqo piyeke.

⁵Itehiye nonguno inaghami shiayeh qo kupuwu nani; ghuthu lakhi panonguye nongu mthake ikemu itehiye panonguno nogholo kuqhalunike poighi nani! Ni, nongu Lhou AMPEU, Israil Lhou akimtheuno hi kumtsu shipe nani, Ino agigihupu ngo ajekipipu nongu tsu nani.”

⁶AMPEU phuighilo, pa phulukepushi ake lono pano kupunu aphilono pa kuluvelo.

⁷Kixikilamino panonguno xuche keu kuxu qhivelo eno panongu no kumsuchekeu kilivelo. Panonguno niLhou AMPEU lau ideghilulo; paye kupuqhiyi cheni eno paye axine qhive tsu nanike.

⁸AMPEU no pi, “Ikukumsuye nongu kukumsu toi moke eno ilaghiye nongu laghi nguno kututake.

⁹Kungughano ayeghi launo qhemghai ketoi, ilaghi ngo ikukumsuye nongu laghi ngo nongu kukumsu nguno qhemghaike.”

¹⁰“Itsaye atsutsu lono ayeghilo azu sutsuniye murasu ngo tsutsughu iqighikeu toike. Tipaqono axabo thuwupe cheni eno yisu kulupu apiti tsu cheni eno chukepu achuqupu tsu cheni.

¹¹Ino pikeu tsa ghi tikithipuke, tiye ino kiu shipeniye kughu puani keno tipau ye shikupu nani; tiye ino shipe nike puwukeu kumtsu shi nani.”

¹²“Nonguye alokivishi Babilon qhiveno wunani; nonguye alokughuno shi aphughi lono sasu ipe nani. Naghutoqo eno atoqono vekipighi alephe nani, eno asuboqono alokivi launo ighamuku nani.

¹³Itehi khile ashuyesahu ani keno Kuprasubo thu ipeghi nani; asahubo akeu-alo martil subo ipeghi nani. Hipau michipuno alhokupujulo ache nani, ni, AMPEU no kiu shikeno tipau kumsuchilelu apeniyeke.”