Read Sumi Naga ISAYA 56 Bible Online

ISAYA 56 - Sumi Naga bible

ISAYA 56

¹AMPEU no pawu timiqo vilo pi, “Kiuno amikucho eno achipiu keno tipau shilo, kughengu ino payi nongu xalu nani.

²Khunoqono pulhapuju Sabat pinyini eno tipau pepusamoni keno ino tipaqo kumghatsu nani. Khunoqono alhoksa kiumu shimoni keno ino tipaqo kumghatsuni.”

³Inaghami khuuno AMPEU timiqo gholo xukimeluveni keno paye ishi pikepu kumoe, “AMPEU no ipelo pawu timiqo gholo mllapemo nanike.” Pichih vekemi timi lakhiye atianuli shilumoake ghenguno Alhou timi gholo kihisulu moakepi khilemu kumsupu kepu kumoe.

⁴AMPEU no tikithipu timi vilo ishi piani, “Nono Sabat pinyikeu lono igihu aye eno nono ilokepu kumla mla eno pukhube kulupushi iwu puloshoqhi peche aye,

⁵nono atianuli lhopesu aghikepu shi akeu nguno ado kushuwa kuto ichinekilo ngo iwu timiqo gholo oje kumsu acheuve nani. Khilemu okumsumavemo nanike.”

⁶Eno AMPEU no inaghami khunoqono pawu timiqo gholo lakhi shiluvea, khunoqono pa kimiyekupu eno pa qe cheni, khunoqono Sabat pinyi cheni eno pawu puloshoqhi pukhube kulushi pelu cheni keno tipaqo vilo hi piani:

⁷“Ino nongu sasu ikimthe toghi, Zion lo saghi nani, ikighini kilo alokivi nongu tsu nani eno nonguno akipti khachelo aghashi keu ikhilutsu nani. Ichinekiye ashiayeh kumtsulo timiqo ghenguno akighiniki lakhikepi kunani.”

⁸Aqokitikhi MPEU no Israilmi hapiyepighive keu lono akilo saghikeu Lhou no itaghi timi kutami saghino panoqo gholo xukimepe nikeu piqhipe puani.

⁹AMPEU no inaghami shiayehqo vilo tughashi toi ighino pawu timiqo mnovelo pike.

¹⁰Pano pi, “Sakiphemiye iw timiqo kutughu kepushi akelauye panonguye anhethi kighichemike! Panonguye kiumu mthake. Panonguye akikhe tsuno ighamoveke toike, panonguye ihozu puzu asamo pumoke likhike. Panonguye zuanikeu kimiyeke!

¹¹Panonguye atsu alakimineno khilemu lukumkha shimokeu toike. Sakiphemi hipaqoye ithikuta shikeu kuhake. Panoqo milakhi khino pano pulokeu shicheni eno pa kivipu likhi phucheni ke.

¹²Shokumzumi hipaqono ishi picheni, ‘Aji ta luni nolo eno ninguno toluke thaqhu muxoni nolo! Thoghi tsalaye ishi tsala nguno shishe akiviu shive nanike!’ ”