Read Sumi Naga ISAYA 57 Bible Online

ISAYA 57 - Sumi Naga bible

ISAYA 57

¹Amikuchomi thive cheni eno khunomu tipau amlolo kumsupu move cheni. Ikemu kughou panono thini keno shiluksa kitikhi kiunomu pano ghuzamlake.

²Khunono akuxu kivi xuni keno akithi lono alokughuno ngo akulhokiqhi ithulu cheni.

³Ikemu nongu axinemiqo hikidiu kughathabe kepu shi ighilo! Nonguye tughami chine, shupu salha eno kutuqha chekemi tianuliqoke.

⁴Nonguye khuu junu ani kya? Nongu kimkimiqoye khuu piputha ani kya?

⁵Nonguno nongu chine suboqo qholono ashi aji kutuqhakeu lono apiti kighishe lhouqo mlla cheni. Nonguno aghokitiqa phivilo atuki akeulo nongu tianuli pesu aghakishi heqhipe mlla chenike.

⁶Nonguno tipau lono atumlo muduniyikeu ikhipewo alhouqo kepi mlla chenike. Tipaqo kumtsu shikeulo niye aloqi cheni kughashi nonguye kumsu ani kesha?

⁷Nonguno agho pesu mllanike eno ashi aji kuqhanike naghuto qhemghai keulo wucheni.

⁸Nonguno nohukikha sholokuu aphikumqhupu julho qhipua cheni. Nonguno ipheve; nonguno aphimini xaveno nolokemi, ametsuno nongu sasu zupekemiqo nongu zua kuloghilo peikuve cheni eno tileno nongu shiaji ghapiqi cheni.

⁹Nonguno tsungquikeu mukhu ngo aphilo nudakeu supupuzu Molek lhou mlla nike wucheni, alhouqo mlla nike phutsu peniye nonguno aqha kumtsulo aghini kishimi puwu cheni, kithigha kutolo puwu cheni.

¹⁰Kutau lhouqo nonguno phujukeu lono nonguye angaghaive cheni ikemu nonguye khilemu tipau palokutove chemoe. Nonguno kumsuchekeuno aphi kumqhupu julhono akumto tsucheni ikehu nonguye khilemu qeinayive chemokepi kumsu cheni.

¹¹AMPEU no pi, “Nongu pelo musave chepekeu lhou hipaqoye khunoqo keno nonguye ivilo akimki tsa picheni eno qhoyi ikumsumave cheni kya? Ino ado kushuwa inaqhoi auveke ghenguno nonguye igihumono ngove kesha?

¹²Nonguno kiu shikeno tiye achipi kepi nonguye kumsu aghiluvi, ikemu ino nongu ghusho ghili lhevetsu nani eno nonguno ajulho mllachekeqoye nongu kuphumla nani.

¹³Kughou nonguno kuphu lepi ighani keno nonguno ajulho mlla chekeu pelo nongu xaluvejupelo! Atuthu kishe lakhino nongu fupewuve nani! Ikemu khunoqono ipukhu cheni keno ayeghilo xulu nani eno ichinekilo imllalu nani.”

¹⁴AMPEU no pi, “Iwu timiqo pelo ilau ideighi pelo. Panongu laghi lono lakukha kugha kumtsu ikhivelo! Ala ghelo eno tipau kutope qhilo!”

¹⁵Niye akiqheu eno akimthe Lhou, alhokupujulo xu chekeuke. Niye akiqheu eno akimthe alo acheni ikemu niye aqhokighemi eno xaideghive kemi gholo ghi xuacheni, tishi anguno ino panoqo kupukhu eno panoqow lajupu sachile saghitsunike.

¹⁶Ino iwu timiqo akuxu tsuke eno panoqo nguku acheuve monanike momu alhokupuju panoqo shou amlo ide auvemo nani.

¹⁷Ino panoqo shou imlo idevekeuye panoqo xine eno panoqono aghukha shikeu ghengunoke, ike ino panoqo ghimeqhi eno qhiveke. Ikemu panonguye amlo kiqhimi eno panongu gho apuloulo checheuve.

¹⁸“Panonguno kishi xuchekeno ino ithuluvae ikemu ino panoqo shipivi nani. Ino panoqo saphe eno kuphuni eno panongu khunoqono qa mlo aghini keno ino alokughuno tsuni.

¹⁹Kupunu aghikemi na putosuu aghikemi namu kumtsu lau ilokiqi tsuke! Ino iwu timiqo shipivi nani.

²⁰Ikemu lhoksa kughamiye ngosumlakeu zughi toike, tipau zu fukukuchoye kide ilukeu tamono alusama ngo aniba xapuighi acheni.

²¹Axinemi ghenguno xakulupu kuhae,” ipi AMPEU no pike.