Read Sumi Naga ISAYA 59 Bible Online

ISAYA 59 - Sumi Naga bible

ISAYA 59

¹AMPEU ye nongu xalunike ighono miqemilei momu nonguno kuphulepi kukeu chilunike akini ipovea kepi kumsu kevilo!

²Tiye nongu xineqo ghenguno paye nongu sutsa chilutsu chemoke. Nonguno pa mllanike pukaputsa namu nongu xineno Alhou launo nongu pelo kututa shicheni peke.

³Nonguye akimki, muqhumuza eno heqhi buqhi keu lono kuqu chenike.

⁴Nonguno kughakutha alo wucheni, ikemu kuchou xakutha nokudau ighi chemoe. Nonguno atsakukugha toniaye akimki shou bepe acheni. Nonguno kutami ghuzaniye akukughu shi cheni.

⁵Nonguno alhoksa kumqupe achekeqoye tughu kupu pighi yikhu toike. Ayikhu lakhi chinephojuaye apighi ipeghi cheni! Ikemu nonguno kuchughupe akeu huye akivipu shini chemoe, tipaqoye thalaxutano aphimini shipuakeu toi avehupu kuhake!

⁷Nonguye pulhapuju kiuala alhoksa pughuqhi acheni, eno nonguye tipau shiniaye khekulhoshi acheni. Nonguye pimimo kemi heqhi buqhinike khilemu sukichile kuhae. Nonguno khile khile wuni keno hexapinikeu eno kutsapinikeu qhivetsu cheni,

⁸nonguno akeloye milakhimu ngolu chemoe. Thwokha kumtsu nonguno mlaithakeuye amikucho kumoke. Nonguno chighichilaikeu laghi pula cheni eno tipa laghi pula chekemi milakhimu xamla nanike.

⁹Timiqono pi, “Alhou ye kushiye niqodaqhi chekemi launo nixalumo keno itehino ithivae. Ninguno alachenike akuvu lajuqhiyi ake ikemu akuzu likhi aghike,

¹⁰ninguno anhethi kighichemi toi kukajupuha cheni. Putholo toi puchou ghi ninguno kupuxaluke, ninguye kithighalo zumoikeulo akeshiveke.

¹¹Ninguye kichimamave eno kupuna kupughaiveke. Qodaqhi eno vimokeu lono ningu xalupenike Alhou lajuqhiyi ake ikemu kiumu shitsumoe.

¹²“AMPEU, ninguno ohekibide xineye kutomoke. Nixineno ninguku ani. Ninguno tipaqo kumtsu tsaqui ithi ani.

¹³Ninguno oshou hebide, omilive eno opapemo kepi hebideve. Ninguno kutami qodaqhi eno olauno tsughuchile wuve. Nikukumsuye kichileu eno nitsaye akimki ke.

¹⁴Kuchou xakuthaye hapupove eno achipiuye punukhoi ighimla. Mishi xakutha alo kuchouye kupuxake eno amikuchoye tilehi a-a kuhaveke.

¹⁵Amikuchoye shishe kitila shivekehu timi khuno alhoksa shimoveni keno paye kutami no tsaqhikepu shive aghi cheni.” AMPEU no hipau ithuluke eno kuchou xakutha kuhakeulo paye amlo shimove.

¹⁶Milakhi nomu qodaqhipe akemi kuphu nike ithumla kehu paye akumzaqhiyive. Ikehu pano panoqo xaphelu nike pa kuka peithano tokulu shi nani.

¹⁷Pano aghunanu phimini pepu akeshi kuchou xakutha pepu eno tokulu pesu ayikutsuqho toi pepu nani. Thime achipishi apenike eno timi akumou lono aghime shichekeu amkhu lutsuni eno shikighime nike pano muqhumuzaike.

¹⁸Pa ghumiqo, ayeghi putou aghikeqo namu panonguno mla puaghikeu qhemi pano aghime tsu nani.

¹⁹Kipelauno kulolau kutolo timi kumtsuno pa je eno pa kimthe kuka sumsa nani. Paye aghokino koha-ilu aketoi eno amlhu kumto toi ighi nani.

²⁰AMPEU no pawu timi vilo pi, “Ino nongu susholu eno nongu xine kudau idewovekemi kumtsu xalu nike ighini cheni.

²¹Ino nongu sasu puloshoqhi lakhi shiani: Ino ikuka ngo ikukutsu alhokupujulo nowu shipe nike nongu tsu ani, hinguno hilauye nonguye igholuno nongu nuliqo eno nongu tianuliqoye ighinikeu ghuloki kutolo igholu che penikeu shika masake.”