Read Sumi Naga ISAYA 6 Bible Online

ISAYA 6 - Sumi Naga bible

ISAYA 6

¹Akukau Uziya kithi mipelo ino AMPEU ithulu. Paye pa kuka lakhulo iqa ake, chuqumghai eno xaqhepukupe ake eno pawu hekuuphino Achineki kuchopu chhitoive.

²Serafmi no pa vehopesu puthugho ae, milakhikhino achishibo tsugho pua. Lhoxu lakhikhino pa chishibo kini pesu pututa gi nhapu, kinino aphimpi nhapu eno kinino yewuni kelo peithake.

³Panongu dolo kukuleno pi ake: “Aqokitikhi shou AMPEU ye akimthe, akimthe, akimthe ke! Pa kimthe jekipino ayeghiqha chhitoi ani.”

⁴Panoqo ghugha sutsano Achineki boqha sukiniqhi eno Achineki ghi amchhino chhitoive.

⁵Tileno ino pi, “Ighenguno ahakusapuake! Niye puhaveniake! kughengu niye akichi mithemokemi ke eno niye akichi mithemokemi gholo xua chenike. Ikeghi, inhethi ampino Akukau, aqokitikhi MPEU ithuluveake!”

⁶Tileno lhoxu gholo lakhino ilau ye-iqighino aghokipitia lono amibalu lakhi tsumtsano tsapesu ighi.

⁷Pano amibalu pesu imutsu ditsu no ishi pi, “Hipauno omutsu divae eno itehino okipimi ikhisuwuve tsuae eno oxineqo pevetsuae.”

⁸Tileno AMPEU no ishi pikeu ino chilu, “Niye khuu puwuni kya? Khuuno ni ghenguno wuni kya?” Ino ishi khochile, “Ni hile ani! Ipuwulo!”

⁹Pano pi, “Wuno timi hipaqo vilo hitoi pilo: ‘Nonguno chilulu achenimu vethalu chemo. Nonguno ithululu achenimu ithilu chemoe.’

¹⁰Tileno pano ivilo ishi pi, ‘Timi hipaqo kukumsu pumhomhoi shive tsulo, panoqo kini kughupove tsulo eno panoqo nhethi kighicheve tsulo, tishianguno panonguye ithumla chimla momu vethamla penike. Panonguno ithulu, chilu eno vethalu kenapiaye ilau xaide ghino shipiviluni cheke.’ ”

¹¹Ikelo ino iniju, “AMPEU , Khitotohi hitoi shia nani kya?” Pano khochile, “Aphughiqo ixapinyive eno kumsa shivemoke kutolo, akiqolo kughunamoveke kutolo, aluza ghi kughukughaleyive moke kutolo.

¹²Ino timiqo ala kushuwalo puwuve nani eno ayeghiqha kumtsu kughukughaivepe nani.

¹³Timi chighi gholo milakhi likhi ayeghilo achili shiaghive kepu shiepinamu tipaqo ghi kutsapiniyive nani; tiye aphisu yeqhiveno asuzungu likhivekeu toive nani.” (Alhou wu timiqoye tipau suzunguke.)