Read Sumi Naga ISAYA 60 Bible Online

ISAYA 60 - Sumi Naga bible

ISAYA 60

¹Ithulo Jerusalem eno tsukinhe toi yepuvulo; AMPEU jukuvuno oshou yepuvu ani!

²Ashiayeh kutamiqoye akuzuno nhaluve nani, ikemu nongu shou AMPEU kuvuno yepuvu nani; pa kimthe jukuvu nongu shou akeu ithulupe nani.

³Ashiayeh kutamiqo nongu kuvu kudau ighi nani, nongu tsala kithe ipechekeu kudau kukamiqo ighi nani.

⁴Nongu nhethi peqhepe julo eno kiu shiani keno julo: Nowu timiqoye aki kidiu ighinike kumqo ayeake! Nonuqoye putouno ighini cheni; Nongaqoye anuliqo toi xapughi nani.

⁵Nonguno tipau ithuluno alokivino chhitoilu nani; nonguye ngosumla kelauno thuthushi nani. Ashiayeh kutamiqo wu kinikulu nongu lau sughi nani; Azughi tuxa kudauno panoqo kini ighi nani.

⁶Kemel loji shekujo kumzapushi Midiya ngo Efa kudauno ighi nani. Panonguno Sheba kudauno shunayi ngo tsungquikeu ta sughi nani. AMPEU no kiu mlakeno timiqono tipau tsakiviu lhe nani!

⁷Kedar ngo Nebaiot lo bheri akeqo kumtsu heqhipe agho tsukeu shi ghi nongu lau sughi nani; eno AMPEU lopivinike akipti khache lono pesu mlla nani. AMPEU no pa chineki shishe alaushi jukighilepu shitsu nani.

⁸Khungkusu toi ihiakeu hipaqo zukiluye kiu kya? amiqhi toi akilo ideghi nani.

⁹Hipaqoye putou akeu yeghi lono ighi akeu zukiluqoke, Alhou wu timiqo xapughi anike. Panoqo gholo panonguno tsandiyi ngo shunayi sughi, tiye AMPEU je gihuniyeke, Israil Lhou akimtheu, pano ashiayeh kutamiqo pelo pawu timiqo gihu chenipeke.

¹⁰AMPEU no Jerusalem vilo pi, “Inaghamino oliwoqo shiqhekithe nani, eno panowu kukamino oqe nani. Iloghu lono ino nongu ghimeqhi, ikemu itehiye ilokeu eno ino kupuqhiyikeu ino nongu piye nani.

¹¹Putho pucho oliwo khagho khaqhipe anani, Tishianguno ashiayehqolo kukami qono panoqo wu kinikulu nongu lau sughi nani.

¹²Ikemu ashiayeh khipaqono nongu qemoni keno kumtsu puhakhave nani.”

¹³“Asahusu, junipersu, kuprasu, Libanon ghasulo asukivisu peighi puzu Jerusalem, oshiqhekithe puku nani, tiye ichineki jukighilepu shinike, iphughi angualeikeu shinike.

¹⁴Nongu qodaqhi chekemi nuqono ighi nani, eno itsaiqi nongu sumsa keu piye nani. Ghuthu lakhiye nongu jumithi chekeqono nongu pukhu philo ighino mlla nani. Panonguno nongu vilo, ‘AMPEU Phughi’ ipi pinani, eno ‘Zion, Israil Lhou Akimtheu Phughi’ ipi ku nani.”

¹⁵“Nongu peve eno mithive chekehu piyighive eno kughu kughaleyi keu phughi lakhi shiacheke. Ino nongu pesu kije eno jukighilepu shitsuni, alhokupuju ghenguno alokivi-a lakhi shitsuni.

¹⁶Ashiayehqo eno kukamino aza lakhi no linga tuchomujo keshi oheju nani. Nono ithi nanike, ni AMPEU no oxaluke, Israil Lhou Akughushuu no okhaqhipheke.”

¹⁷“Ino olau sughitsuniye ani alazayi thelilo shunayi sughini, ayi thelilo tsandiyi sughini, asu thelilo alazayi sughini, atu thelilo ayi sughini. Noshou ayehkipemiye nongu neda qoda kithemove nani; Ino panoqo pelo achipiu xakutha eno alakishi lono ayehpe penani.

¹⁸Ghiqhi heqhikeu sutsa chilu kithe move nani; Shikupsaye noyeghi kubole kithe mo nani. Ino aliwo lakhi toi nongu putu eno nongu susholu nani; Ino nongu xalukeu ghenguno nonguye isheqhe nani.”

¹⁹“Puchou khilemu tsukinheno nongu kuvu shimo nani. Momu putholo aqhiye nongu kuvu shimo nani. Ni AMPEU no alhokupujulo nongu kuvu shi nani; Ikimthe jekipi kuvuno nongu shou yepuvu nani.

²⁰Nonguno amlo ghime shichekeu tsala ashekha shivepe nani. Ni AMPEU no alhokupujulo nongu kuvu shi nani, tsukinhe ngo aqhi nguno ado kushuwa anikeuke.

²¹Nowu timi kumtsuno kiuno achipikeno tipau shi nani, eno alhokupujulo ayeghi pighiluve nani. Ino panoqo shosuke, ino panoqo lhoke, timi kumtsu vilo ikughushu piyeniyeke.

²²Nongu gholo aghulou eno aqhokigheu kibo namu ashiayeh kumto lakhi toi kije shive nani. Kughono ado kivi ighini keno, Ino tipau papashi shiluvepe nani. Ino AMPEU ke!”