Read Sumi Naga ISAYA 62 Bible Online

ISAYA 62 - Sumi Naga bible

ISAYA 62

¹Jerusalem shikumto kepushi ino pia nani; Li xaluvemoke kutolo eno lino toluvekeu huno putholo ayeghukulu toi vuqai moke kutolo niye inaqhoimo nani!

²Jerusalem, nono toluakeu ashiayeh qono ithulu nani! Pano kukamino ojukuvu ithulu nani. Noye ajekithe pesu oku nani, Aje tiye AMPEU ampino tsukeu.

³Noye AMPEU wu jukighilepu kutsukuqho lakhi toi nani.

⁴Hinguno hilau noye “Qhiveake” ipi ovilo pimo nani, Momu noyeghi pesu “Jumuvekeu Nipu” ipimo nani. Oje akitheu pesu “Alhou ye li lau amloqi cheni,” ipi nani. Noyeghi pesu “Alokivishi Kutunaluve” ipi nani, kughengu AMPEU no olau amloqi ani eno pano noyeghi shou akimi lakhi toi shinani.

⁵Apulhothe lakhino ililhothe lakhi pelo pawu kulaliu shiape keshi, Khuno olhophekeno pano osasu kulauve nani. Kulapuuno pawu kulaliu lau alokivi akeshi oLhou no oshou alokivi anani.

⁶Jerusalem, oliwolo ino aghukhemi qhipuani; panonguye putho pucho khilemu inaqhoi kepu kumoe. Panonguye AMPEU vilo pano piqhi puakeqo pesu pikichichi akepu eno pa pelo khilemu panoqo kumsumavepe kevilo.

⁷Pano Jerusalem tsuchilemoke kutolo panonguye pa pelo ngovepe kepu kumoe, eno ayeghiqha kumtsuno sheqhekeu phughi shipe kepue.

⁸AMPEU no mutsumisheikeu shoqhi lakhi shike, pa kukano tipau shiwoni cheni: “Hinguno hilauye no xalothiye noghumi chuqupu shimoake eno inaghamiye notsayiji shomoake.

⁹Ikemu nongu axa yisukemi ghile hukemino achuqupu chuluno AMPEU sheqhe nani. Nongu atsayilu chichekemi eno xoluchekemino ichineki kikhalalo atsayiji sho nani.”

¹⁰Jerusalem lo akemiqo, aphughi lono khalau ipelo eno nowu timi idewoche kemi ghenguno alaghi lakhi ghelo! Alaghila shikepu lakhi kutolo; tipalalo atuqo kichevelo! Amchi shikepu lakhi suqhelo tishi anguno ashiayeh kutamino

¹¹AMPEU no ayeghiqha kumtsulo asheshu puwu akeu ithiwo nani: “Jerusalem lo akemi vilo pilo, AMPEU ye oxalunike cheni, pano xapheluve kemiqo sasu wocheni.”

¹²Nonguye, “Alhou wu Akimthemi Timiqo” ipi ku nani, “AMPEU no Xaluvekeu Timiqo,” ipi nani. Jerusalem ye “Alhou no Kimiye chekeu Phughi” ipi ku nani, “Alhou no Qhivemokeu Phughi” ipi nani.