Read Sumi Naga ISAYA 63 Bible Online

ISAYA 63 - Sumi Naga bible

ISAYA 63

¹“Edom qhalo Bozra phughi lono chekeu hiye khuu kya? Huchuyilesu qhivutsuni ananu pepu eno akuka kumto lono ithachekeu huye khuu kya?” “Hiye AMPEU ke, akuka lono xalunike, eno pawu tokulu asheshu nike cheni.”

²“Pa phiminiye kushiye huchui kya? Hiye atsayiji kughulhoniye atsayithi qoakemi toike.”

³AMPEU no khochile, “Ino atsayithi toi ashiayehqo qodake eno khunomu ikuphunike ighimoe. Iloghu lono panoqo qodake, panoqo jino iphimini kumtsu hedaveke.

⁴Iwu timiqo xalukepu ghuloki shive akepi ino kughathaluve; itehiye panoqo ghumi ghimeqhi kepu ghuloki shivae.

⁵Ino pishipuwo jukelo milakhi mu ikuphunikemi kuhavekeu ino ithuluno ikumzaqhiyive. Ikemu iloghuno ishikumtove eno ilikhi ino iwu tokulupu shike.

⁶Iloghu lono ashiayehqo kumtsu ino qodaqhi eno panoqo kubopinyive. Ino panongu kuxu ji ayeghilo peleqhi.”

⁷AMPEU wu iqemokeu kikimiye ino pia nani; pano mlatsukeu kumtsu ghenguno ino pa sheqheni. Pano kinikulushi Israil lo timiqo kumghatsuke, pawu kupuqhiyikeu eno iqemokeu kikimiye ghengu noke.

⁸AMPEU no pi, “Panonguye iwu timiqoke; panonguye ipishiqhimo nani.” Ikehu panoqo ghime launo pano panoqo xalu.

⁹Hiye kungumi lakhinoke kumoe ikemu AMPEU ampino panoqo xaluke. Pa kikimiye, amlo ighiqhiyikeu lono panoqo xapheluke. Paye wovekeu tsalalo pulhapuju panoqo tuchohijuche,

¹⁰ikemu panonguno pa hebideke eno pa pelo amlo kusapu shivepeke. Ikehu AMPEU ye panoqo ghumi shive eno panoqo sasu aghushiwuveke.

¹¹Ikemu tile panonguno wovekeu tsala kumsuchilelu eno panonguno ishi iniju, “AMPEU ye khile ani kya? Pano azughi lono pawu timi sakiphemiqo xalukeu hu? AMPEU ye khile ani kya? Pano pa Ghungu pesu Muse tsukeu hu?

¹²Muse vechewo pa kukano thime kije shikehu, AMPEU ye khile ani kya? Azughilo azu kijethavetsu eno ashekha kuhake kutolo pa jekipi shilunike ghenguno azukutho kachesu pawu timiqo sasu wukeu AMPEU hu khile ani kya?” AMPEU no sachekeu lono panonguye khurshi toi apukhu mutotoi nesulu eno khilemu kupuxavemoe.

¹⁴Amshiqo aghuma khilalo sawu keshi AMPEU no paw timiqo kulhoqhitsu. Pano pawu timi zulo atughiu shi eno pa je gihukepu sughi tsuke.

¹⁵AMPEU, kungugha khile akimthe eno ojukuvulo nono achenikeno tilano nishou jupukutsulo. Nighenguno nono shishe alokumsu shikeu khile ani kya? Okukaye khile ani kya? Okikimiye eno omlo ighiqhiyikeu khile ani kya? Nijupichi kevilo!

¹⁶Noye nipuke. Nipuasu Abraham ngo Jakob ye nimthake ikemu no nipuh AMPEU ye pulhapuju nixaphelu achenike.

¹⁷Noye kushiye nipelo olaghi lono ala vezuvepe kya? Noye kushiye nipelo amlo mkamghaivepe no olauno tsughusu wuvepe kya? Oqechekemi ghenguno ideighilo, alhokuthulo owu shiakemiqo ghenguno ideighilo.

¹⁸Ningu, owu timi akimthemiqoye ado lakhi ghenguno nighumino nihapheveke; panonguno okungo-a nedaqodaveke.

¹⁹Noye nishou ayehkipeu kumo toi nono nipeitha veke, ninguye khilemu owu timi kumo toi nipeithaveke.