Read Sumi Naga ISAYA 66 Bible Online

ISAYA 66 - Sumi Naga bible

ISAYA 66

¹AMPEU no pi, “Kungughaye ikuka lakhuke eno ayeghiye ipukhu kinepuke. Tishiaye, nonguye ighenguno kiu toikeu ki shitsuluni kya? Kiutoi keu alo ipelo ngopeni kya?

²Ni ampino tsutsu yeghiqha kuchopu lhoke! Niye timi khunoqono mtshaivu eno xaideghi, khuuno isumsa eno igholu cheni keno tipaqo lau imloqi acheni.

³“Timino panono pulokeu shicheni. Panoqo ghenguye amshitsu pesu heqhipe mlla na timi lhoxu heqhipe mlla namu kiumu kututakeu kuhae, panonguye bheriti heqhipe mlla na atsu kuo suchhevetsu namu kiumu kutuqu keu kuhae, panonguno tuxatini pesu agho mlla na awoji pesu mlla namu kutuqukeu kuhae, panonguno tsungquikeu ta pitipe mlla na asu atu julho vilo inikhu namu kiumu kutuqukeu kuhae. Panonguye niqhunilai keu ghola lono mllakeulo amlo tsucheni.

⁴Tighenguno ino kutsakungo keu panoqo shou sughi nani, ti panonguno musa achekeu hu, kughengu milakhinomu ino kukeulo khochilemoke momu ino pikelo initsumoke. Panonguye ighobide eno alhoksa shini keu kisheluke.”

⁵AMPEU no kiu piani keno tipau inilo, nongu pa sumsa eno pa gholu chekemiqo: “Nonguno ilau amikucho shi xuachenike ghenguno nowu timi khamiye nongu mithi cheni eno pano gholo nongu sasumove cheni. Panonguno nongu thaighaghi pi, ‘AMPEU no pa jekipi piyepelo eno oxaluju pelo tishianguno nonguno alokivishi aghikeu nino junike!’ Ikemu panoqouno kujomzave nanike!

⁶Hi inilo! Aphughilo eno Achineki lo asutsa kuloghi huye, AMPEU no pa ghumi ghimeqhi keu sutsa ke!

⁷“Ikimthe phughiye totimi lakhino zuleno apunu kusu shimono anga lakhi punukeu toike.

⁸Timi khualano tikithipu ghili ithulu momu chilu akesha? Ashiayeh lakhi atsala lakhi lono punuqhikeu ani kesha? Zion no apunukusu sukeu kushuwa kumo lono pano shiayeh punuqhive nani.

⁹Niye iwu timiqo saghino punuqhiniye akelono panoqo punupemove nani kepi kumsu kevilo.” AMPEU no piveake.

¹⁰Jerusalem gholo alovilo; li ghenguno amlo kiqi shilo, nongu aphughi hipau kimiye chekemiqo! Li sasu itehino alovilo, li ghenguno mloqa chekemiqo!

¹¹Nonguno li kinikulu kusaje nani, liye angano aza kichhi niake toinanike.

¹²AMPEU no pi, “Ino haumokepu kinikulu nongu lau sughitsuni; aghoki qotamoke toi ashiayehqo kinikulu nongu lau qoighipe nani. Anga lakhi azano tuchomujo, liuno khape eno kimiyeqhiyikeu tsuke toi nongu peitha nani.

¹³Azano linga lokughunotsu keshi ino Jerusalem lo nongu lokughunotsu nani.

¹⁴Hipau shikeu nonguno ithulu keulo alovilo; tiye nongu pelo mutotoi eno ashi aji kivi shipeniyeke. Tileno ni AMPEU no igholukemiqo kuphu cheni eno ighumi shou iloghu ide cheni kepi nonguno ithi nani.”

¹⁵AMPEU ye ami gholono ighi nani. Paye pano aloghu ide akemi ghimeqhinike pasapagha chishibo shou iku nani.

¹⁶Ami ngo azuta kihi pesu ayeghiqhalo kuqupuaghive kemiqo ghimeqhi nani eno timi kutomo pithive nani.

¹⁷AMPEU no pi, “Khunoqono tughachine ghenguno aphikimthe shicheni, khunoqono tughachine ghutu shikimthe keulo shekujo wucheni eno khunoqono awoshi ngo ajifu eno aphikumqhupu chuqupu chucheni keno tipaqo ghenguno ashekha shiveni keu kupunuvae.

¹⁸Ino panoqo kukumsu eno panoqo kumla ithi ani. Ashiayeh kumtsu gholo timiqo hekutsunike niye cheae! Kughono panongu kumqoluveni keno, ikukaye kiu shilu nani keno panonguno ithulu nani,

¹⁹eno ino panoqo ghimeqhi ani kepi panoqono ithi nani. “Ikemu ino panoqo khamiye ghupe qhinani eno ashiayeh kutami lau ngo putosu yeghilo akemi ijekipi chimla aphikemi eno ikuka kuloghi ithumla aphikemi lau panoqo puwu nani. Hipaqo lau puwu nani: Spein, Libya, Lidiya lo asuzu pekithimi lau eno Tubal ngo Greece lo. Ashiayeh hipaqo gholo panonguno ijekipi pesu asheshu nani.

²⁰Panonguno nokusami ashiayehqo kudauno agho itsukeu lakhi shighi sasu ideghi nani. Panonguno panoqo sasu ikimthe toghi Jerusalem lo saghi nani, khamino khurshi shouno, khamino gadaha tsu ngo Kemel shou eno khurkulu ngo khurshi no anhemgha pukeu bolono ighi nani, tiye Israilmino achine yelo akimthe bohu lono tuxatini pewo mllake toi shi nani.

²¹Panoqo khamiye ino achinemi eno Levimi shivepe nani.

²²“Ayeghi kithe eno kungugha akitheye ikukano puqhe ake toi, nolaghami eno nongu jeye haumono acheuve nani.

²³Aqhi kithe tiqhetini kumtsulo eno Sabat pinye kumtsulo, ashiayeh kumtsu lono timi ighino Jerusalem hileno imlla nani,” ipi AMPEU no piani.

²⁴“Panonguno woche kelau, khunoqono imjochile keno tipaqo kithi kumo ithulu nani. Panoqo kumo izale akeu pitheye khilemu thimo nani, eno amino panoqo piti akeu khilemu inhemo nani. Panoqo ithulukelo timi kumtsu aphi kumqhupu shi nani.”