Read Sumi Naga ISAYA 7 Bible Online

ISAYA 7 - Sumi Naga bible

ISAYA 7

¹Jothem nu Akukau Ahaz ye Uziya tilimi lakhike pano Juda lo ayehpe ake ghuloki lono aghukishi ipeghive. Siriyami kukau Rezin ngo Remalia nu Peka, paye Israilmi shou akukauke, pamano Jerusalem leighike, ikemu tipau khathamlave.

²Siriyami ghushimiye Israilmi ghakhuqhalo wo tovae pikeu tsa Juda lo akukau tokelo, pa eno pawu timiqoye thughuive eno panonguye amlhuno asubo fukini akeshi musa khokhoshive.

³AMPEU no Isaya vilo pi, “Onu Shiaryasub [1] pelo okusa shieno Akukau Ahaz sasu kusholu kepushi wulo. Paye azukikhe ahuu akeulo azulaki shekhalo aphi kibemi kumla alo alalo aghikeu nono phulu nani.

⁴Pa vilo tsukhui, iqunei shilo pilo eno paye kutuxoxo momu izuyicho kevilo pilo. Akukau Rezin ngo pawu Siriyami eno Akukau Peka pama loghu kighideye chuchumi akeu amusu kinilo amichhi akeu paphike eno tikithipuye akuighupu kuhake.

⁵Kughengu Siriya no Israil ngo tipaulo akukau kuqhano alhoksa kuchughupheke.

⁶Panonguno Juda lenikeu eno timiqo shithughui pesu panoqo lau suluveniye kutoke eno Tabeel nu pesu akuka lakhulo qhiniyeke.”

⁷“Ikemu ni AMPEU no pitsu ani, ike tiye khilemu tishimla nani.

⁸Kughengu Siriya ye tipau phughitou Damaska nguno akumtou kumoke, eno Damaska ye Akukau Rezin nguno akumtou kumoe. Israil ghenguye ampe lhotsugho pungu dolono ipopinyive nani eno ashiayeh lakhi shi puxuamlave nani.

⁹Israil ye tipau phughitou Samaria nguno akumtou kumoke eno Samaria ye Akukau Peka nguno akumtou kumoe.” “Nongu kupulu mutotoi monapiaye nonguye ngosumla nani.”

¹⁰Itaghi AMPEU no atsape kutau lakhi Ahaz lau puwutsu,

¹¹“AMPEU oLhou vilo amchipu lakhi otsu lopi khulo. Tiye kithimi yeghi thonhei keulo nomu momu kunguu kungugha lonomu shiaghiluvi.”

¹²Ahaz no khochile, “Niye amchipu khumo nani. Niye AMPEU ghujumo nani.”

¹³Isaya no khochile, “Tishiaye, O Akukau David polo kughukou, hi inilo! Oghenguno timi wu kheakulu muchhuqhikeu alomokutuaye, noye Alhou wu kheakulu muchhuqhi kulupu kesha?

¹⁴Tighenguno AMPEU ampino amchipu lakhi otsuni: ilimi lhothe mishipu akeuno anu lakhi punu nani eno pa je Immanuel [2] kutsu nani.

¹⁵Pano thuwu puzu kivi kusa michiluveke ghuloki tokelo timiqoye akichhizu shouve eno akhingozu chuwuve nani.

¹⁶Tipa ghuloki ighi mphi lono kukami oshithughuyi akeu pama yeghiye hale pighive nani.”

¹⁷“AMPEU no oshou, owu timiqo shou eno kukami bolomi kumtsu shou shishe shiluksa tsala sughini cheni, tiye Israil kukaqhano Juda launo kututa shiveke lono itehi kutolo khilemu tikithipu ighimphike - pano Asiriya lo akukau saghini chenike.”

¹⁸“Tipa tsalanino, AMPEU no kutughukeu shighi miji kunani, tiye Ijip lo aghokiqo kudauno Ijipmino amthuno taighikeshi ighipeniyeke eno Asiriyami pelo akhi taighi keshi pano yeghi kudauno ighi peniyeke.

¹⁹Panonguno atu khilalo eno atu kilo ta-iqhoiqi nani eno asahu pho eno atsuni akeu kumtsulo ngoluve nani.

²⁰“Tipa tsalanino, AMPEU no Eufrati ghoki tuxauno Asiriyami shou akukau akutsusa kishiu shi piqe saghi nani; eno pano nongu kichimhi ngo nongu kutsusa eno nongu philo asa akeu miyelevetsu nani.

²¹“Tipa tsalaniye, timi lakhino amshi alhothe lakhi eno bheri kini likhi pighi aghie pinamu

²²tipaqono akichhizu kutomo tsu nani ikehu akichhizu lukumkha shi nani eno tipa yeghilo thimono aghikemiqoye akichhizu ngo akhingozu chukepu shi nani.

²³“Tipa tsalaniye, atsayilu kivilo atsaibo 1,000 akeqoye lakhikhino tsandiyi 1,000 khi me shinamu kumtsu asahupho ngo aghusahuno qunha khave nani.

²⁴Timino tilehi asuzu ngo apiji pesu ashi hau nani, kughengu ayeghi kumtsu asahupho ngo aghusahu likhive nani.

²⁵Naghuto khipaqolo axa tsuni ghenguno hokide chekeno tipa-aye asahuno qunhave nani eno khunomu tilau wumo nani, ikemu tipaqo aye atsu-aqu phepuwuve keu-a shive nani eno bheriqo chukumza-a shive nani.”