Read Sumi Naga ISAYA 8 Bible Online

ISAYA 8 - Sumi Naga bible

ISAYA 8

¹AMPEU no ivilo pi, “Yepuku kepu apa kije lakhi pepuzu tipa shou akiyethi akijeu lono ishi yepukulo: ‘Maher-shalal-Hash-baz’[3]

²Timi kuchomi mikini lulo, achineu Uriya ngo Jeberekiya nu Zekhariya pama pelo thopimi shipelo” ipike.

³Hithiu inipuye mishiluve. Kughou ninu punuve keno AMPEU no ivilo pi, “Pa je ‘Maher-shalal-Hash-baz’ kutsulo.

⁴Anu itimi huno ‘Ipuo’ ‘Izao’ ipimla aphi lono Damaska lo kinikulu kumtsu eno Samaria lo kinikulu xulesuwo puakeu kumtsu Asiriya kukauno xapuwuve nani.”

⁵AMPEU no itaghi iputsano pi:

⁶“Timi hipaqono Shiloa ghokitilo azu mutshaminhei qowu akeu miliveke ghenguno eno Akukau Rezin ngo Akukau Peka zulo musa khokhoshi keghenguno,

⁷ni, AMPEU no Asiriyami kukau ngo pa kumto ghushimiqo pelo Juda leighi peni cheni. Eufrati ghokino amuku yeli qoakeshi panonguno atshunazu toi yimu ighi nani.

⁸Panonguno Juda yimu ighi nani, panonguno atshunazu toi yeliqole, aku-o kutolo yimve nani, eno pachishibo sukhopesu noyeghi khipahi keno kumtsu nhakhaluve nani.” O Alhou ye nigholo ani!

⁹Nongu ashiayeh kutami, musaqhiyi hekutsu kumqolo! Ayeghi putou akeqo, inilo. Aghushi nike kutokupui ngolulo, ikemu musaichivelo! Iye, kutope ngolulo ikemu musaichivelo!

¹⁰Nonguno kughuchope qhilo! Ikemu tipaqoye adou shive nani. Nonguno pinishi ke thaqhu pilo! Ikemu tiye kiumu shimla nani, kughengu Alhou ye nigholo ani!

¹¹Pa kuka kumto kije pesu AMPEU no ipiputo keuno timiqono papechekeu la pula kevilopi pike. Pano ishi pike,

¹²“Timi hipaqono tuqhou kuchughukeu ipichekeulo khilemu sukepu kumoe eno panonguno musa ighuchekeu musa ighu ke vilo.

¹³Hi kumsululo ni aqokitikhi shou AMPEU ye akimthe ke, nonguye ilikhi sumsa masake.

¹⁴Ino shishe akimtheke ghenguno niye atuqu lakhi toi timino kupuxalu cheni; ino alichhe lakhi toi shieno Juda ngo Israil kukaqhalo akemi ngo Jerusalem lo akemi meluni cheni.

¹⁵Timi kutomono kupuxaluni cheni; panonguye veqhive nani eno kutsapinyive nani. Panonguye alichhe lono meluveni cheni.”

¹⁶Nongu, ino kutsuluve kemiye Alhou no atsape itsukeu pekishe eno kutsukiyi qhimasae.

¹⁷AMPEU ye pawu timiqo launo itshuluvae, ikemu niye pa pulu acheni eno pa lau iwu lajupu bepe achenike.

¹⁸Julo, ni eno Alhou no itsukeu anuliqoye aqokitikhi shou AMPEU no pawu timi Israilmi lau amchipu eno xuake lono atsape shiapeniyeke; paye Zion toghilo ache keu Lhou ke.

¹⁹Ikemu timiqono nongu vilo asaqhi chekemi eno tumumi launo atsape inijulopi pinani, tipaqono pipishi igha eno mamashi picheni. Panonguno ishi pinani, “Timiye aghahwuqo launo asutsa lumoni kesha? eno kuxumi zuqhushi kithimi vilo kighini kilejumoni kesha?”

²⁰Nonguye panoqo vilo ishi khochilelo, “AMPEU no kiu pesu nongu shikapiye keno inilo! Tumumi tsa ini kevilo, panonguno nongu vilo kiu pinikeno tiye akivipu shimlake.”

²¹Timiqoye amlo pitipuzaqhi eno akhuamzu launo ayeghilo iqhoiqi nani. Panoqo khuava launo eno pano mlo kighide launo panoqo kukau ngo panoqo Lhou ghusho nani. Panonguno kunguu jupuku nani,

²²eno ayeghilo anhethi pilepe junani, ikemu kiumu ithumla puzu shiluksa ngo akuzu eno aghime zuchiyikeu ithulu nani; eno panonguye akumsapu akuzulo tuhasuve nani. Panoqoye shiluksa hipau launo pokulupu laghi kuhave nani.