Read Sumi Naga ISAYA 9 Bible Online

ISAYA 9 - Sumi Naga bible

ISAYA 9

¹Puzuu ghulokiloye Zebulun ngo Naftali laghaqo yeghi ye jukuchhube cheke ikemu hithiuye hipaqhalo ajekipipu sughini cheni, Meditereniya Zughi kipelauno Jordan tuxau ayeghi akeulo eno Galil khilehi inamino kughuna ani keno tikutolo ajekipipu sughini cheni.

²Khunoqono akuzulo xuache keno akuvu kije lakhi ithuluvae. Panonguye yekhuvekeu yeghilo xuacheke, ikemu itehiye panoqo shou akuvu yepuvu ani.

³Nono alokivi kije panoqo tsuke, [4] AMPEU; nono panoqo pelo alovilo pike. Nono shitsukeulo panonguno alovike, tiye timino ghile hukelo lokivi toike, momu kinikulu lepughikeu kijelu akelo toike.

⁴Kughengu panoqo qaqhichekeu makho nono kubolevetsuke eno pano bighi ghaqhichekeu kussu hechhevetsuke. Nono kha-aghi Midiami toluveke toi owu timi qodaqhi chekemi shiayeh toluveke.

⁵Leighikemi ghushimiqo pukhukuqho ngo panoqo phimini ajipususuyi keu kumtsu ami pesu pitivetsu nani.

⁶Kughengu ningu lau anga lakhi punutsu ani! Anu lakhi ningu tsupuani! Pano ningu shou ayehkipeu shi nani. Pa pesu, Akichiqhipu Lokutsuu, Akughushu Lhou Shekhahau Apu, Alakishi Kukapuu, ipi ku nani.

⁷Pa kuka yehkipeye thuwu ache nani; pa kukaqhaye pulhapuju iquneyi anani. Paye Akukau David thisupe ayehpe nani, achipiu xakutha eno amikucho lono pa kuka peitha nani, itehi eno alhokupuju kutolo tishi anani. Aqokitikhi shou AMPEU wu amlo tsuqhiyikeuno hipaqo kumtsu shi nani.

⁸AMPEU no Israil kukaqha shou kughathabe keu piqhivae, Jakob polo kughukomi shou ighivae.

⁹Israil lo akemi, Samaria phughilo kughuna akemi kumtsuno AMPEU no hipau shi kepi ithi nani. Itehi panonguye aqhekuza akulaki shi ani Panonguno ishi pi,

¹⁰“Itatuki ilaiqivae ikemu ninguno yekutha tu pesu tipa alo shive nani. Mububo pesu akhetsu shinike yeqhi puani ikemu tipaqo alo kedarsu akiviu pesu shi nani.”

¹¹AMPEU no panoqo ghumi pelo panoqo leighi penike haputhuvae.

¹²Kipelauno Siriya eno kulolauno Filistiya no Israil tsuchuve nike panoqo baxa mukupe ani.Tishimu AMPEU loghu ye ashekha shi mphike; ghimeqhi nike pau chhopesu achephike.

¹³Israil lo akemiye, AMPEU no panoqo ghimeqhive kethiu pinamu xaideghimoke, panonguye pa lau ideighimoke.

¹⁴Ghulo lakhi lono AMPEU no Israil lo sakiphemi ngo tilehi timiqo ghimeqhi nani; pano panoqo kutsu ngo ashomhi miche vetsu nani.

¹⁵Muchomi timino gihuche keqono akutsuke eno tungkupmi miki chekeqono ashomhike!

¹⁶Kughengu khunoqono timiqo saphe chekeno alakumo lono panoqo sapheke eno panoqo saphekemi kumtsu kubang khavae.

¹⁷Tighenguno AMPEU ye lhothemi lakhimu pokawulu peni chemoe eno paye chimemi ngo mighimgha lakhi shoumu amlo ighiqhiyikeu anichemoe, kughengu timi kumtsu Alhou mthakemi eno kixikilami eno panonguno pikeu thwokha alhoksake. Tishivemu AMPEU loghu taveni chemoe ikemu ghimeqhinike pau chhopuwo achephike.

¹⁸Kughengu timiqo wu kixikilaye ami kuyiquno aghusahu ngo asahu pitiveke toike. Hiye agha-kumhami kuyiquno amichhi phoikughi keu toike.

¹⁹Aqokitikhi shou AMPEU ye aloghuide anike ghenguno pano ghimeqhikeu huno ami kuyiqu toi anike kumtsu timiqo kutsaqhike eno pututa kuxu pukhauveke.

²⁰Aghakhu kumtsulo timino achuqupu kititi pimu muxa kishipe chuke ikemu khilemu panongu khuamzu ghapiqimlake. Panonguye atianuli shi ghi chuke!

²¹Manase qhalo akemi ngo Efraim lo akemiqo ghiqhikileke, eno panoqo kuqhano Juda leuke. Tishivemu AMPEU loghu tavemoke; ikemu ghimeqhi nike pau chhopuwo achephike.