Read Sumi Naga ACHINE 14 Bible Online

ACHINE 14 - Sumi Naga bible

ACHINE 14

¹AMPEU no ayezah hipaqo pesu Muse tsuke,

²tiye timi lakhi kumsapu yiko kusu shipivive keulo shikimthe nikeu chine vehu. Paye mitheluvae pi asheshuve tsunike tsalalo, achineu lau pa saighilo,

³eno achineuno ngo chekeusa nguno khalau pa sasu wulo eno pa jukutojulo. Akusu vive aye,

⁴achine lo mithemighei keu ghau kini sughi penike ahza tsulo eno kedarsu tachu lakhi, aye kipili huchuikeu lakhi eno ailo tsuni loka tipa gholo sughi pelo.

⁵Tileno ayeghili lakhilo azupukizu anile akeu shouno aghau lakhi heqhi penike achineuno ahza tsulo.

⁶Pano aghau lakhiu kedarsu tachu ngo aye kipili huchuikeu eno ailo tsuni kumtsa pesu aghau heqhivekeu jih lo chosulo.

⁷Pano timi khuu ayiko kusu lono shikimtheve niye ani keno tipau shou ghuthu tsuni ahji pesu kuzutelo eno tishieno paye mitheve akepi pivetsulo. Pano aghau xu akeu pelo aluzaqalo yewuve pelo.

⁸Timi ye pa phimini ishive, pa kutsusa kumtsu miyevepe eno azu kuchhuve pelo, tishieno paye achinepulo mitheluveni ake. Paye ngochekeusalo iloghilu nani ikemu paye pa phiki nguno khalau atsala tsuni ngomasake.

⁹akutsunini pa kutsusa ngo pa kichi mhi, pa nhekita-sa eno paphilo asa kutau akeqo kumtsu miyele kitheve pelo, paye pa phimini ishive azu kuchhuve ishiaye achinepulo mitheluni ake.

¹⁰Atsala akutacheni paye tukutiye kuhakeu bheriti atsu kini eno ampe lakhi shivekeu bheriti alli lakhi sughilo eno tipaqo gholo asho mukhu oliv teli pesu kunuvekeu kilogram lakhi eno oliv teli liter saje kuthulo lakhi ishi pesu ighilo.

¹¹Achineuno timi ngo pa kumllagho AMPEU no ngochekeu Phiki hukikhalo saghilo.

¹²Tile achineuno bheriti atsu lakhi pesu oliv teli saje kuthulo lakhi gholo kuqhano lochilekeu kumllagho lakhi shi mllalo. Pano tipaqo pesu AMPEU lau akimchigho lakhi achineu ghenguno qhitsulo.

¹³Pano bheriti hu akimthe-a khileno axine kumllagho ngo pitikeu kumllagho lhoxuqo ghiqhi cheni keno tipaa lono ghiqhilo. Paye hipau shimasake kughengu axine kumllagho toi lochilekeu kumllaghoye achinemi salake eno ighono akimtheke.

¹⁴Achineuno bheriti jih hami pesu timi khuu achinepulo mitheveniye ani keno tipau kini aniqe ajeu ngo auloqu ajeu eno apukhu loqu ajeu ditsulo.

¹⁵Achineuno oliv teli hami lupuzu pau mza piyiu lesulo,

¹⁶eno pauloti ajeu lakhi tipaulo chosulo eno tipau hami pesu AMPEU no achekeulo ghuthu tsuni kuzutelo.

¹⁷Pano paumza piyiulo teli akeu hami eno bheriti jih hami ishi lupuzu timi khuu achinepulo mitheveniye ani keno tipau kini aniqe ajeu ngo auloqu ajeu eno apukhu loqu ajeu ditsulo.

¹⁸Pano paumzalo teli khije aghikeno tipau pesu timi kutsu shou sutsulo. Hitoi shipuzu pano shikimthevekeu chine chinilo.

¹⁹Tipathiu achineuno axine kumllagho mllalo eno shikimthevekeu chine chinilo. Tishive kethiu pano pitikeu kumllagho ghiqhilo,

²⁰eno athi kumllagho gholono tipau pesu akiptialo mllalo. Hitoi shipuzu achineuno shikimthekeu chine chinilo eno timiye achinepulo mithelu nanike.

²¹Timi huno kumlhomi eno tijejehi tomla kepu shi aye, pa shikimthe kepu ghenguno paye bheriti atsu lakhi likhi sughilo tiye pano lochilekeu kumllagho lakhi shikepu shi AMPEU lau akimchigho lakhi achineu ghenguno sughilo. Paye asho mukhu oliv teli pesu kunuvekeu kilogram lakhi likhi athi kumllagho shikepu shi eno oliv teli liter saje kuthulo lakhi sughilo.

²²Paye amiqhi momu kobutur kini ghi, lakhino axine kumllagho ghengu eno lakhino pitikeu kumllagho ghenguno sughilo.

²³Atsala akutacheni pa shikimthe kepu ghenguno pano tipaqo pesu achineu lau Aphiki hukikhalo sughilo.

²⁴Achineuno bheriti ngo oliv teli lupuzu tipaqo pesu akimchigho lakhishi achineu ghenguno AMPEU lau qhitsulo.

²⁵Pano bheriti ghiqhilo eno tipau jih hami lupuzu timi kini aniqe ajeu ngo pau loqu ajeu eno papukhu loqu ajeu ditsulo.

²⁶Achineuno teli hami paumza piyiu lesulo

²⁷eno pau loti ajeu lakhi pesu chosuno tipau AMPEU no achekeulo ghuthu tsuni kuzutelo.

²⁸Pano teli hami pe ahji pesu ditsukeu alo ditsulo: timi kini aniqe ajeu, auloqu ajeu eno apukhu loqu ajeulo.

²⁹Paumzalo teli khije aghini keno tipau pesu timi kutsulo sutsulo, eno hitoi shipuzu shikimthekeu chine chinilo.

³⁰Tishi no pano amiqhi momu kobutur lakhi pesu axine kumllagho shi mllalo,

³¹eno lakhiu pesu athi kumllagho gholo pitikeu kumllagho shi mllalo. Hitoi shino achineuno shikimthekeu chine chinilo.

³²Ayezah hipauye timi khuuno kumsapu yikokusu ani keno tipau ghenguno kemu pa shikimtheni ke avehupu shi akeulo kutamino mllachekeu tsumlakemi ghengu likhino ke.

³³AMPEU no Muse ngo Aron pama lau

³⁴ayezah hipaqo tsu, tiye akilo akughumho phawo aghikeulo kiu shive kepu keno tipau ghengunoke. Hipaqoye Israilmino Kanan yeghi, panoqo mheghi shipenike AMPEU no tsuniye akeulo iloluve kethiuno pepimhe peniyeke.

³⁵Timi khuno pa kilo akughumho aghikeu ithuluni keno achineu vilo tipau vehu pive masake.

³⁶Achineuno akughumho jukutoju mphi lono aki tipaulo anhemgha akeu kumtsu khalau ikhipheve penike ahza tsulo, tikumo aye aki alou akeu kumtsu mithemo keu shivetsu nanike. Tishieno achineuno akilo ilo puzu

³⁷akughumho jukutojulo. Tsala tipaulo atsuka ju momu huchuikeu no akijibolo chupuha ilo cheghi aye,

³⁸pano aki lono ipeveno atsala tsuni ghenguno aki tipau khathasupe qhivelo.

³⁹Atsala akutsuniulo pano ideghi no tipau jukutoju kithelo. Tsala akughumho huye phawove aghi aye

⁴⁰atu khipaulo akughumho aghikeno tipau ikhive penike eno aphughi khalau mithe kumo alo peve penike ahza tsulo.

⁴¹Tipathiu pano aki jibo alou kudau kumtsu kixile eno miyelekeuye aphughi khalau mithemo keu-a khilela qhove pelo.

⁴²Tishieno atu ikhive keqo alo atu kutau peithalo eno akijibolo nuda kepu kutau peithalo.

⁴³Aki tipaulo atu ikhive eno aki jibo kixileveno kutau pesu nudave kethiu ghi akughumho ipeghi kithe aye,

⁴⁴achineuno wupuzu jukutolo. Tipauno phawove aye aki huye mithemove ake.

⁴⁵Aki tipauye xalevelo eno tipaulo atu ngo asu eno nudakeu kumtsu aphughi khalau mithemoke alo xapuwuvelo.

⁴⁶Aki tipauye khathasupe puanamu timi khuuno alou iloni keno paye avelau kutolo mithemo ake.

⁴⁷Timi khuuno aki tilehi zuni momu chuni keno pa phimini ishive masake.

⁴⁸Kughou achineuno juniye ighini keno aki tipau nuda kitheve keulo akughumhoye ipeghi kithemove aghi aye aki tipauye achinepulo mithe ani kepi pano pivetsulo, kughengu akughumhoye qhoi ikhikhave ake.

⁴⁹Aki tipau shikimthenike pano aghau kini, kedar su hami, aye kipili huchuikeu eno ailo loka lakhi lulo.

⁵⁰Ayeghili lakhilo azupuki zu anile pesu supuakeu shouno pano aghau lakhi heqhilo.

⁵¹Tishieno pano kedar su, ailo aye kipili huchuikeu eno aghau akeu ikhilu puzu tipaqo pesu aghau heqhivekeu jih eno azu kuxulo akeulo chosulo eno aki tipau shou ghuthu tsuni kuzute pukulo.

⁵²Hitoi shieno pano aghau jih ngo azu kuxu, aghau xuakeu, kedarsu, ailo eno aye kipili huchuikeu pesu aki shikimthelo.

⁵³Tishino pano aghau xuakeu pe aphughi khalau aluqalo yepuwuvelo. Hitoi shieno pano aki shikimthekeu chine chinilo eno tiye achinepulo mithelu nani.

⁵⁴Ayezah hipaqoye kumsapu yiko kusu,

⁵⁵apiyi, amishe momu iphucho ingukeu, eno aphimini momu akilo akughumho ghengunoke.

⁵⁶

⁵⁷Ayezah hipaqo pesu thime mithe akeu mithemokeu kimchinike.