Read Sumi Naga ACHINE 2 Bible Online

ACHINE 2 - Sumi Naga bible

ACHINE 2

¹Kughokughomu timi khuno athi pesu AMPEU lau mllani keno paye atughushi tipau pesu amkhushi kubove paghilo. Paye tipaulo oliv teli ngo tsungquikeu zu supuzu

²Aron laghami achineu lau sughilo. Peitha keu achineuno asho mukhu ngo teli au kie lakhi eno tsungquikeu zu kumtsu pewo akiptia shouno pitilo tiye kumsumamo keu michi lakhi shi kumtsu pesu AMPEU mllavekeu kumlho shinia ke. Achuqupu kumllagho xo hipauye AMPEU lopu shicheni.

³Athi kumllagho shikeu kutauqoye achinemiqo salake; tiye ighono akimtheke kughengu tiye AMPEU lau achuqupu mllavekeu lono lukeuke.

⁴Tsala akumllaghoye amiphoki lono shukeu sho shiaghi aye tiye kholaqhi sumono shimasake. Tiye ashopa shishoi puzu oliv teli lono kunukeu momu oliv teli pesu nukuxu keu shopa shi aghiluvi.

⁵Tsala akumllaghoye apali lono pugha keu shopa shi aghi aye tiye kholaqhi sumokeu sho mukhu oliv telino kunu keu pesu shilo.

⁶Tipau akumllagho shi ghi mllani kelo chunuphove no tipa shou teli lesulo.

⁷Tsala akumllaghoye ali lono bevekeu shopa shi aghi aye tiye asho mukhu ngo oliv telino shikeu pesu mllalo.

⁸AMPEU lau akumllagho shi tipau sughino achineu tsulo pano tipau akiptialo pesu wunanike.

⁹AMPEU lau tipau akuchopu pesu mllavekeu michi shi kumsulunike achineuno tipau lono kitila ikhilu no akiptia shouno pitilo. Achuqupu kumllagho xo hipauye AMPEU lopu shicheni.

¹⁰Tipau kumllagho kutauqoye achinemi salake; tiye ighono akimtheke kughengu tiye AMPEU lau achuqupu mllavekeu lono lukeu ke.

¹¹Nonguno AMPEU lau athi jeli pesu akumllagho shikeu kiu kiulo pinamu kholaqhi sukeuno shikepu kumoe; achuqupu pesu AMPEU mllakeulo nonguye khilemu kholaqhi momu akhingozu peitha kepu kumoe.

¹²Ampe atsu-tsu nonguno athi amsuu lupughi keu pesu AMPEU lau sughilo ikemu tiye akiptialo piti kepu kumoe.

¹³Athi pesu mllakeu jeli kumtsulo amti sulo kughengu amti no Alhou ngo nongu dolo puloshoqhi akeu zuqhushi anike. (Nongu kumllagho kumtsulo amti sulo.)

¹⁴Athi amsuu lupu ghikeu pesu nonguno AMPEU lau akumllagho shi sughi keulo athi kusave momu amukhushi kubo no pesu mllalo.

¹⁵Tipaulo oliv teli ngo tsunguquikeu zu sulo.

¹⁶Asho mukhu ngo teli khipauno kumsuchilekeu michi keno tipau ngo tsungquikeu zu kumtsu achineuno pesu AMPEU lau achuqupu kumllagho lakhi shilo.