Read Sumi Naga ACHINE 25 Bible Online

ACHINE 25 - Sumi Naga bible

ACHINE 25

¹AMPEU no Sinai Toghi shouno Muse putsake eno ahza patsu puzu

²pekithiyeh hipaqo pesu Israilmi lau tsupeniyeke. “AMPEU no nongu tsuakeu yeghilo kughou nonguno iloluni keno ampe akutsuniu loye aluza chimovekeu lono nonguno AMPEU gihu keu shilo.

³Nonguno ampe tsugho loye nolulo apiti qulo, notsayilu xidilo eno axaqo pekutsu lulo.

⁴Ikemu ampe akutsuniuye aluza qhalo qhoi akulho qhikeu mpe shive pelo, AMPEU lau pephe tsuvekeu mpe shilo. Nolulo apiti qukevilo momu notsayili xidi kevilo.

⁵Shosumo namu axabo pakutoshino ipeghikeu xa jeli xolu kevilo eno notsayino kiximokeu lono atsayithi pithikeu xokutsulu kevilo; tipauye aluza qha ghenguno qhoi akulho qhikeu mpe lakhike.

⁶Tipa mpe dolo ayeghi chimove pinamu tipauno achuqupu nongu kutotsu nanike, nongu, noqemi, nonguno aju piqesukemi, inaghami nongu gholo xuache kemi,

⁷no pichepighiqo eno noluqaqolo tughashi akeqo lau tsu nanike. Tipaulo ipekighi kumtsu chulu kepu shi nanike.”

⁸Tsunino ghuthu tsuni kughusulo kuqhakelo ampe lhobidi toku.

⁹Tishieno, aqhi akutsuniu atsala achighiu, Ikhivetsukeu Tsalalo aghakhuqha kuchopulo afuko ighapenike timi lakhi puwulo.

¹⁰Hitoi shipuzu nonguye ampe lho-apunguuye pakutashi qhilo eno aghakhulo kughuna akemi kumtsu lau kuqhopheve keu pesu asheshulo. Hipa mpelo tinhemgha kuqhukili shipuakeu kumtsu inahuu mpiu momu pa polo kughukomi lau tsukide kithevelo eno timi khuu aqemi lakhi shi jeve puani keno pa kibolomi lau tsuchile puwovelo.

¹¹Nonguye nolulo apiti qu kevilo momu pakutoshino athi ipeghikeu lukevilo momu notsayilu kiximokeu lono pithikeu tsayithi xokutsulu kevilo.

¹²Ampe kupuju nongu ghenguno akimthe shilo; nonguye alu lono pakutoshino kiu ipeghipeni keno tipaqo likhi chulo.

¹³Hipa mpelo tinhemgha khije kuqhukili shipuani keno inahuu ampiu lau tipau tsukide kithevelo.

¹⁴Tighenguno kughou nonguno Israilmi akusami vilo ayeghi jesuni keno momu pa lau ayeghi qhuni keno amikucho kumo peitha kevilo.

¹⁵Tipaqo meye ampe khije axa chichulu puzu Tsukide kithe vekeu Mpe ighini cheni keno tipau kiqi lono ame kihithakeu shilo.

¹⁶Ampe kutomo ghenguno shi aghiaye ameye kutomo shi nani ikemu ampe aghulo likhi shi aghi aye ameye mikhe nani, kughengu kiu jesuve ani keno tiye ayeghino axa ghuthu khije ipeghipe nani keno tipau jehike.

¹⁷Israilmi akusami lakhi pishiqhi kevilo ikemu AMPEU nongu Lhou sumsalo.

¹⁸AMPEU no ayezah ngo ahza tsukeu kumtsu pelulo, tishianguno nonguye aghakhulo sushokulu shi xulu kepushi.

¹⁹Ayeghino tipaulo tuxatini ipeghi tsu nani eno nonguye nonguno chunishikeu kumtsu alunani eno akukupunalo sushokulu shi xulu nanike.

²⁰Ikemu khualano ishi inijuluvi, ampe akutsuniulo apiti qusumo eno tuxatini pekutsumo ke kishi puzu chukepu anani kya?

²¹AMPEU no ampe akutsughoulo ayeghi shou kumghatsu nani eno tipauno ampe kini ghenguno achuqupu lukumkha ipeghi tsu nanike.

²²Kughou mpe akutacheulo nonguno alulo apiti quni keno nonguye ampe akutsughou lono ghile hupe puakeu chu ani aphike eno tipa mpelo nonguno tuxatini sukeu xolumoke kutolo lukumkha shi chulu ananike.

²³Noyeghiye alhokuthu pimhe cheuve penikeulo jesuve kepu kumoe, kughengu nonguye tipau pighiu kumoe, tiye Alhou no apighiuke eno nonguye inaghami toi tipau peitha anipe ke.

²⁴Kughou ayeghi jeni keno inahu mpiu pelo tipau qhuchileluve penikeu chipiu ithitsu masae.

²⁵Israilmi lakhino kumlhomi shive no pa yeghi jeve kepushi aye pa sholokumi kupunukhoi kemino tipau qhuchilelulo.

²⁶Timi lakhino asholokumi kuha puzu tipau qhuchilelu kepu shimo namu hithiu paye kinikulu shiluvi eno tipau pa ampino qhu chilelu kepu shiluvike.

²⁷Tikithipu vehu shive aye paye tipau qhulukemi lau tsukide kithe keu Mpe kutolo ampe khije aphi keno tipau qhemi pesu tsulu nani, kugho kughomu pano pa yeghi luchileveni shi aye.

²⁸Ikemu pano ayeghi qhuchile kulupu pisa lukumkha kuha aye tiye timi khuuno tipau qhulu keno tipauno Tsukidekithe keu Mpe kutolo peithanikeu ke. Tipa mpe ighi kelono inahu mpiu lau tsuchileve nanike.

²⁹Timi lakhino putusu puakeu phughi alou aki je aye paye tipau jeke tsala lono ampe atughiu akupuju dolono tipau qhuchilelu nike achipiu ani.

³⁰Ikemu tipa mpe dolono tipau qhuchilelumo aye paye tipau qhuchile lunikeu chipiu kuhavae eno akiye akuqhuu eno pa polo kughukomi mheghi shivenia; tiye Tsukidekithekeu Mpelo pinamu tipau tsuchilevekeu shimo nani.

³¹Ikemu putusumokeu aphu qolo aki akeqoye alu peithakeu toi shikepu; inahu pighiuno tipau qhuchileluve kepu chipiu anike eno tipaqoye Tsukidekithekeu Mpeloye tsuchilevelo.

³²Tishie pinamu, Levi laghamiye panoqo pelo jukuto penikeu phughilo pano nhemgha akeuye kugho kughomu qhuchilelu kepu chipiu anike.

³³Aphughi tikithipu lakhilo Levi laghami lakhino aki lakhi jeveni eno tipau qhuchile lumove aye Tsukidekithe ke Mpe lono tipau tsuchileve masae kughengu aki khipaqo Levi laghamino pano phughilo pighi ani keno Israilmi gholo panoqo mheghiye tike.

³⁴Ikemu Levi laghami phughi sumxa pesu akeu achukumzapu yeghiye khilemu jekepu kumoe; tiye alhokupuju pano mheghike.

³⁵Israilmi akusami lakhi okupunulo achekeuye kumlhomi eno pa likhi papo qemlano aghi aye nono aqe kiqemi tsuke toi pa ghenguno kutope qhitsu masake tishianguno paye okupunu ghi xualu nanike.

³⁶Pa lau akighishe kiumu khukevilo ikemu Alhou sumsalo eno Israilmi akusami pelo ophivilo xuache pelo.

³⁷Nono pa lau pisa punatsu keulo pa pelo akighishe tsupe kepu shikevilo eno nono achuqupu pa vilo jetsukeu shou ala kughulhoni keu shikevilo.

³⁸Hiye AMPEU nongu Lhou no ahza tsukeuke, pano Ijip lono nongu saipeghi puzu Kanan yeghi nongu tsuniyeke eno nongu Lhou shiniyeke.

³⁹Israilmi akusami lakhi okupunulo xu akeuno ighono kumlhomi shiveno pa likhi pa pesu aqeu lakhi shi ovilo jesuve aye noye pa pelo aqeu kumla shipe kevilo.

⁴⁰Paye aqe kiqemi lakhi shi ogholo ngopelo eno Tsukidekithekeu Mpe kutolo oqepelo.

⁴¹Tipa ghulokilo pa eno pa tianuliqo ye oqhiveno pano bolomi eno pano puasu mheghi lau idewove nani.

⁴²Israilmi timiqoye AMPEU qemi qoke eno Ijip lono pano panoqo saipeghi ke; panongu ye aquaxe kuxulo jesuve kepu kumoke.

⁴³Mughachhoi panoqo peitha kepu kumo ikemu nongu Lhou sumsalo.

⁴⁴Nonguno aqemi avehupu shi aghiaye ashiayeh nongu sumxape akemiqo kudauno nonguno qhulu nanike.

⁴⁵Nonguno inaghami nongu gholo xuakemi tianuli pinamu qhulu nanike. Atianuli tikithipu noyeghilo punukemiqoye nomheghi shilu nani,

⁴⁶eno nonguno tipaqo pesu amheghipu shi nonuliqo lau qhitsulu nani eno tipaqono xuake thaqhulo panoqo qemasa keu shinani. Ikemu nonguye Israilmi akusami milakhimu mughachhoi peitha kevilo.

⁴⁷Kumsujukelo inaghami nongu gholo xuachekemi lakhino kinimi shiveni kemu Israilmi lakhiye kumlhomi shiveno pa likhi pa pesu inaghaumi lau momu pano kibolomi lakhi lau aqemi shinike jesuve aye,

⁴⁸pa jeve kethiumu pa qhuchileluve kepu chipiu aphike. Pa thikuzumi milakhino

⁴⁹momu papu thikuzuu momu athikuzumi momu pano sholokumi kutamino pa qhu chilelu nanike; momu pano lukumkha shi qelu aye paye pa kuqhophe penikeu qhulu nanike.

⁵⁰Paye timi khuuno pa qhu luve keno tipau sasu kuptsaju masake eno pa likhi pa jevekeu ghuloki lono Tsukidekithekeu Mpe chekeu kutolo ampe khije keno kihiju puzu pa phepuwuve kepu meye aqe kiqemi lakhi lau ajume tsuchekeu kiqi lono kughatha masae.

⁵¹Paye pa kuqhu metsukeu hamiye tsukide masake tiye ampe khije aphi keno tipau kiqi lono,

⁵²

⁵³paye ampe lakhikhi kiqi lono piqesu ke kumlho shilo. Pa mpiuye mughachhoi pa peitha kepu kumoke.

⁵⁴Hipa ghola khikhiu lonomu pa phepuwukeu shimo aye pa eno pa tianuliqoye Tsukidekithekeu Mpe wochekeu lono phepuwuve masae.

⁵⁵Israilmi lakhiye alhokupuju ghenguno aqemi shi auvemlake kughengu Israilmiye AMPEU qemiqoke. Pano Ijip lono panoqo saipeghike; paye panoqo Lhou AMPEU ke.