Read Sumi Naga ACHINE 26 Bible Online

ACHINE 26 - Sumi Naga bible

ACHINE 26

¹AMPEU no pike, “Ajulho momu timi julho, atu tsukucho momu atuqo yetha peqhi eno mllanikeu shikevilo, niye nongu Lhou AMPEU ke.

²Achineyelo tiqhetiniqo pechelo eno khipa-alo imlla cheni keno tipa-a gihulo. Niye AMPEU ke.

³“Nonguno iyezah kiqi lono xuche aye eno ino ahza tsukeu gholu aye,

⁴ino ado achipi lono tsutsughu nongu lau puwutsu nani tishianguno ayeghino tuxatini ipeghi nani eno asuboqono axathi pithi nani.

⁵Nongu wu tuxatini ye shishe kumzapu kehu nonguye atsayithi xolukepu do shivea mu ghile hu aniaphi eno ghixudo shiveamu atsayithi xolu ani aphike. Nonguye nonguno chuni shikeu kumtsu alunani eno nonguye sushokulushi noyeghilo xulu nani.

⁶“Ino noyeghilo iquneikeu tsu nani, eno nonguye kiumu msamono zuhulu nanike. Ino ayeghilo kumsa kimshipu lhoxuqo halevetsu nani eno tilehi kiumu aghukishi kuha nani.

⁷Nonguye noghumiqo shou tokulu shiluve nani;

⁸nongu mipunguno timi 100 haleluve nani eno nongu 100 no timi 10,000 haleluve nani.

⁹Ino nongu kumghatsu nani eno atianuli kutomo nongu tsunani; ino nongu sasu puloshoqhi shikeu isheamzu loye tipau peche nani.

¹⁰Nonguno ghile hukeuye ighono kupukuno kehu tiye ampe kupujulo tolu nani eno tishive kethiu ghi akiye achili aghikeu peleveno akithe ghile hupughikeu qhikepu shinani.

¹¹Iwu akimthe phikilo ino nongu sasu ache nani eno niye khilemu nongu launo tsughuvemo nanike.

¹²Ino nongu gholo anani, niye nongu Lhou shi nanike eno nonguye iwu timi shi nanike.

¹³Ni, nongu Lhou AMPEU no Ijip lono nongu saipeghike tishianguno nonguye aquaxemi shikithe pemoniyeke. Nongu sunheqhipe akeu kuka ino kubolevetsuke eno nongu pelo akutsu peqhe pesu chewulu peke.”

¹⁴AMPEU no pike, “Nonguye ino ahza tsukeu gholumo aye ghimeqhi nani.

¹⁵Iyezahqo ngo ahza tsukeu gholumoniye hebide puzu ino nongu sasu shipuakeu puloshoqhi hexave aye,

¹⁶ino nongu ghimeqhi nani. Ino nongu shou kutsakungo keu sughi nani; tiye shipivimla kepu kusukini ngo nongu nhethi kighichevetsu kepu ghakimki eno nongu kuxu tsuhauveni kepu sughi nani. Nonguno apiti qusu nani, ikemu nongu lau tiye kiumu akivi sughi tsumo nani kughengu noghumino nongu leluve nani eno nonguno kiu yisukeno chuve tsu nani.

¹⁷Ino nongu shou akumou shive nani, tishikeu lono nongu hasuve nani eno nongu jumithi chekemino noshou ayehpe nani, nonguye ighono thughuive nani ikelauno timino nongu hacheghimo namu nonguye kohapo nanike.

¹⁸“Hipaqo kumtsu shive kethiu ghi nonguno igholumo aye ino nongu ghimeqhi keu ghuthu tsuni kighishe vetsu nani.

¹⁹Ino nongu qhekuza kumobei akeu kuboleve nani; tileno tsughumove nani eno ayi kumka toi noghakhuye qhaive nani.

²⁰Nonguno akuaveshi mlakeu kumtsu adou shive nani kughengu noghakhuno axabo ipeghimo nani eno asuboqono axathi pithimo nani.

²¹“Nonguno imujochile auve eno igholuni keu mili auve aye ino nongu ghime ghuthu tsuni kighishevetsu nani.

²²Ino nongu gholo akumsapu tughashi puwu nani eno tipaqono nongu tianuli heqhive nani, nongu tsu aqu kutsave nani eno nonguye timi aghulo likhive nani eno nongu laghiqoye yenguyeleive nani.

²³Aghime hipaqo kumtsu shikethiu ghi nonguno itsa initsumo puzu ikhuauve aye,

²⁴tile ino nongu shou akumou shi nani eno puzuu nguno ighono aghime kusa ghuthu tsuni kighishe pesu nongu ghime nani.

²⁵Ningu puloshoqhi shikeu hexavekeu ghenguno nongu ghimeqhinike ino nongu shou aghukishi sughi nani eno susholunike nophughilo nonguno kumqo aye, shipivi mlakeu kusukini ino nongu gholo puwu nani eno nonguye aghumi lau qhoi phesuve masa putsakeu shivepe nani.

²⁶Nonguno achuqupu sughichekeu la ino hekha vetsu nani, tishi kehu totimi chighino asho khije aghikeno tipau shunike amiphoki lakhi likhi avehupu shinani. Panonguno tipau aphiphi shi ghi kije nani eno nonguno tipau chukhave pinamu nonguye muzuthi aniaphi.

²⁷“Hipaqo kumtsu shive kethiu ghi nonguno imujochile auveno igholumoniye ipeve auve aye,

²⁸tileno iloghu lono ino nongu shou akumou shinani eno itaghi nongu ghimepuye puzuu nguno alhoksa kutuu shi ghuthu tsuni kighishetsu nani.

²⁹Nongu khuamzuye ihulove kehu no likhi notianuli heqhi chunani.

³⁰Atoghilo nonguno mlla chekeu a kumtsu ino kutsaleve nani, nowu tsungqui-ta kiptia tuleqhivetsu nani, eno ajulho iluqi akeu shou nongu kithi kumo vepuku nani. Imlo khukhushive kelauno

³¹ino nophughiqo xalepinivetsu nani, nonguno mllachekeu a kutsalevetsu eno nonguno aghashikeu ikhilutsumo nanike.

³²Ino noghakhu qhoi kutsaleve nani ikelo aghumi tipaulo ngonikemiye kutsalevekeu jupesu apuchopungove nani.

³³Ino nongu shou aghukishi sughi nani eno inaghami yeghilo nongu hapiyepighive nani. Noghakhuye yenguyeleive nani eno nophughiqoye ixapiniyi qhive nani.

³⁴Tileno aghakhuye qhoi aghakiqi shi akulho qhilukeu mpe shi nani nonguno tipau tsumono achekeu hu; tiye qhiveno tishi auve nani eno nonguno noghumi ghakhulo halepupoveno achekelo tipauno akulhokiqhi ithulu nani.

³⁶“Nongu khunoqomi halepupoveni keno tipaqo pelo ino musa khokhoshive penani ikehu amlhulo asu nipa fupe chekeu sutsa chilu keloghi nonguye kohapo penani. Nonguye aghu shiakelo nongu hache keshi ponani eno aghumi nophivilo kuha keghi iluqive nani.

³⁷Timi khunomu nongu hachemo namu nonguye lakhino lakhi kupxalu nani eno nonguye aghumi khuumu sasu kumjomla nani.

³⁸Nonguye halepuwuve keu lono thinani, noghumi ghakhuno nongu munoluve nani.

³⁹Noghumi yeghilo nongu lakhi kini ghupe aghikeqoye tsu-hauve nani tiye noxine eno nopuasu xine ghengunoke.

⁴⁰“Ikemu nongu polo kughukomino panoqo xine eno pano puasuqo xine piphe nani, panoqono imjochile eno ishou hebideke,

⁴¹eno ipelo panoqo shou akumou shipeke eno panoqo ghumi ghakhulo panoqo halepupove peke. Ashekhalo, kughou nongu polo kughukomino mtshaivuni keno eno pano xine eno hebidekeu jume lochileveni keno,

⁴²Jakob ngo Isak ngo Abraham sasu iwu puloshoqhi shikeu ino kumsulu nani, eno iwu timiqo lau aghakhu tsunikeu ishoqhi shikithe nani.

⁴³Tishiepimu, atughushi aghakhuye tile timi akeqo puhave masake, tishianguno tipau ye aghakiqishi akulhoqhilu nanike eno panonguye iyezahqo ngo ino ahza tsukeu pevetsukeu ghenguno tipau jume qhoi lomaye sake.

⁴⁴Ikemu tishive kelomu, panonguno pano ghumi yeghilo achephilo pinamu niye qhoi panoqo qhivemo momu kutsavemo nanike. Tishini keloye panoqo sasu ino puloshoqhi shikeu ashekha shiveni ake eno niye panoqo Lhou AMPEU ke.

⁴⁵Ino panoqo puasu sasu puloshoqhi shikeu ino shikithe nani tiye kughou Ijip lono iwu timiqo saipeghi keno tileno ino ashiayeh kumtsu lau ikuka-kumto piyeke, tishianguno ni, AMPEU ye panoqo Lhou shiluveniyeke.”

⁴⁶Hipaqo kumtsu Israilmi ghenguno AMPEU no Sinai Toghi lono ayezah ngo ahza pesu Muse tsukeu ke.