Read Sumi Naga ACHINE 27 Bible Online

ACHINE 27 - Sumi Naga bible

ACHINE 27

¹AMPEU no Muse lau

²pekithi yeh hipaqo Israilmi ghenguno tsuke, kughono ashoqhi akhoto shikupulu keu ghenguno timi lakhi pesu AMPEU tsuveni keno pisa hijejehi pesu loveno timi tipau phepuwuluve nani,

³tiye aqhano kihithape peitha chekeu kiqi lono. kiptimi asakithe, ampe muku lono lhotsugho shivekemi: tsandiyi tachu lhopungu; totimi asakithe; tsandiyi tachu shighi; kiptimi alhothe, ampe pungu lono muku kuto: tsandiyi tachu muku; totimi alhothe: tsandiyi tachu chighi; anga kughunuqo: tsandiyi tachu kuthu; kiptimi ampe lhotsugho nguno kunguu: tsandiyi tachu chighi pungu; totimi ampe lhotsugho nguno kunguu tsandiyi tachu chighi.

⁸Timi ashoqhi shikeuno kumlhomi lakhi shi aghi puzu kiqitha puakeu me tsumla kepu shiveaye timi tipau achinemi lau saighilo eno timi tipauno tsulu kepu qhemi lono achineuno ame aqhou shi betha tsulo.

⁹Tushoqhikeu huye lhoxu lakhi AMPEU lau akumllagho lakhi shi ikhikulupu shi aghi aye AMPEU lau agho chhekeu huye akimtheke,

¹⁰eno timi khuuno ashoqhi shikeno tipauye tipau lhoxu zuqhushi kutau tsuakepu kumoe. Pano tipau shikeuye lhoxu kinikujo AMPEU salake.

¹¹Ikemu tushoqhi keu huye chinikelo mithemokeu lhoxu lakhi pesu shi puaghi aye eno tipauye AMPEU lau mlla kepulo ikhilutsumlake ghenguno, timi tipauye achineu lau lhoxu sawulo.

¹²Achineuno tipauye kiu me shikepu kela tipau akivi, alhoksa kiqi lono bethalo eno ame tipauno taveake.

¹³Timi huno tipau qhuchileluveni shi aghiaye paye tipau me tsumasake eno ame tipau kikije pungulo lakhi pesu alau vebetsu masake.

¹⁴Timi khualano paki ikhiphepe AMPEU lau tsuni keno achineuno aki tipau kiviksa kiqi lono ame bethave tsulo eno ame tipauno xathave ake.

¹⁵Aki tipau ikhiphepe tsuakeuno tipau qhuchilelu nishi aye paye bethavetsu keu me shou tipau me kikije pungulo lakhi pesu vebetsu masake.

¹⁶Timi lakhino pa yeghi aqha lakhi ikhiphepe AMPEU lau tsu aye, ayeghi tipaulo apiti khijehi yisu cheni keno tipau kiqi lono ame bethalo, tiye barli thi kilogram muku suchekeuye tsandiyi tachu chighi qhemi shi bethalo.

¹⁷Pano ayeghi tipau pesu Tsukidekithe Mpe shiveke mtsa ikhiphepe tsu aye ame akuchopu tsukepu shi nani.

¹⁸Pano hithiuno tipau ikhiphepe tsu aghi aye, ighinikeu Tsukidekithe Mpe kutolo ampe khije aphi keno tipau kiqi lono pisa meye khije shinani keno achineuno kiqiphetsulo eno ame kumghuu shi bethatsulo.

¹⁹Alu ikhiphepe tsuakeuno alu qhuchilelu nishi aye paye ame bethakeu kumtsu tsumasa eno tipau shou alume kikije pungulo lakhi pesu vebeno tsumasake.

²⁰AMPEU launo alu tipau qhuchilelu paghimo puzu pano kutami vilo alu tipau je aye, paye tipau qhuchileluni kepu chipiu kuhavae.

²¹Tsukidekithe Mpe akiniu ideighi keulo alu tipauye pulhapuju AMPEU sala shini ake; tiye achinemi sala shini ake.

²²Timi lakhino AMPEU lau pano alu qhupuakeu ikhiphepe tsuaye,

²³ighinikeu Tsukidekithe Mpe kuto kumo dolo ampe khije ani keno tipau kiqi lono achineuno ame kihithalo, eno timi tipauye tipa tsala lono ame tsuve masake; pisaye AMPEU salake.

²⁴Tsukidekithe Mpelo alu ye inahuu ampiu momu papolo kughukomi lau tsukideveni.

²⁵Ame betha keu kumtsu aqhalo peithachekeu qhemi kiqi lono shilo.

²⁶Lhoxu piti tughiuye AMPEU sala shive akehu timi khuumu tipau pesu puloniqhiyi keu kumllagho lakhi shi pa lau ikhiphetsu kevilo. Amshiti, bheriti momu anetiye AMPEU salake,

²⁷ikemu mithemokeu lhoxu piti tughiuye aqhalo peithakeu me kiqi lono eno tipau shou tipau me kikije pungulo lakhi vebeno qhuchilelu nani ke. Tipau qhuchilelumo napiaye, kutami lau tipau pesu aqhalo peithakeu me qhemi lono jeluve nani.

²⁸Timi lhoxu na atsu-aqu na ayeghi pinamu kiumu shimono ikhiphepe AMPEU lau tsuvekeuye khuunomu tipau jemla momu qhuchilemla. Tiye alhokupujulo AMPEU salake.

²⁹Timi lhoxu lakhi shi aghi pinamu kiumu akiqi shimono ikhiphepe tsuvekeuye qhuchilemla; paye pithive masake.

³⁰Athi shi aghina axathi namu ayeghi lono ipeghikeu kumtsu saje chighilo lakhiye AMPEU salake.

³¹Timi lakhino tipau gholo lakhi mu qhuchile nishi aghi aye, paye aqhalo peithachekeu me tsumasake eno tipau shou tipaume kikije pungulo lakhino vebetsu masake.

³²Tikishi chighi gholo lakhiye AMPEU salake. Lhoxuqo kihikula jukeulo lhoxu achighiuye AMPEU salake.

³³Apighiuye lhoxu pekithipe qhive puzu lhoxu alhoksau kishephekeu shikevilo eno paye athelilo tsu keu shikevilo. Pano lhoxu lakhi pesu kutau thelilo tsukeu shi aye, tishiaye lhoxu kinikujo AMPEU sala shinani eno qhuchile mla kepu shinani.

³⁴Ahza hipaqoye Israilmi ghenguno AMPEU no Sinai Toghi lono Muse tsukeuke.