Read Sumi Naga ACHINE 5 Bible Online

ACHINE 5 - Sumi Naga bible

ACHINE 5

¹Axine kumllaghoye hikithipu lono shinani. Timi lakhipe aqhazulo thopi tsupenike kuni kelo pano ithulu puakeu momu chilu puakeu vehu pitsumove aye paye tipau xine pumoasa nani.

²Timi lakhino mtha no achine kitiqeveni, ti lhoxu kithi buve aye pano tipau ithive kemtsa paye mithemovae eno angsu shivae.

³Timi lakhino mtha puzu timi lau mithekumo akeu kiu kiumu buve aye kiukiu shiaghi pinamu pano tipau ithivekemtsa angsu shivae.

⁴Timi lakhino jukuto kughomokeu shoqhi shive aye, tiye kiukiu shiaghi pinamu pano tipau ithive kemtsa paye angsu shivae.

⁵Kughou timi lakhino angsu shiveni keno paye axine piphe masake

⁶eno pa xine ghenguno lokepushi paye AMPEU lau bheriqu momu anequ lakhi akumllagho sughimasa. Achineu no timi tipau ghenguno aghashi pesu mllalo.

⁷Timi lakhino bheri momu ane sughimla kepu shi aye pa xine ghenguno lochile kepushi AMPEU lau amqhi momu kobutur kini sughilo, lakhino axine kumllagho eno lakhino piti mllakeu gho shikepushi.

⁸Pano tipaqo achineu lau sughilo, eno achineuno atughushi axine kumllagho paghi aghau pesu mllalo. Pano tipau kutsu sutha tsumo puzu akuo likhi pighechheve tsulo eno tipau jih hami pesu akiptia jibolo kuzute pukulo.

⁹Ahji aghikeuye akiptia bophilo leqhi khavelo. Hiye axine ikhisuwuve tsunikeu kumllagho lakhi.

¹⁰Tipathiu pano ayeh kiqi lono aghau akiniu pesu piti mllakeugho mllalo. Hikithipu ghola lono achineu no timi tipau xine ghenguno aghashi mllalo eno pa xine peivetsu nanike.

¹¹Timi lakhino amqhi momu kobutur kini namu tsumla kepu shi aye paye axine kumllagho asho mukhu kilogram lakhi sughilo. Paye tipaulo oliv teli na kutau tsungquikeu zu kiumu sukevilo kughengu tiye axine kumllagho lakhike, tiye athi kumllagho kumoke.

¹²Pano achineu lau tipau sughilo eno qhoi AMPEU no luvetsukeu toi achineuno tipau lono kie lakhi elulo eno tipau pesu amino piti mllakeu lakhi shi akiptia shouno pitilo. Hiye axine ikhisuwuve tsukeu kumllagho lakhi.

¹³Hipa ghola lono achineuno timi tipau xine ghenguno aghashikeu mllalo eno axine peive tsu nanike. Asho mukhu kutauqoye achineu sala shiniake, tiye athi pesu akumllagho tsukeu toike.

¹⁴AMPEU no peitha kepu yezah hipaqo Muse tsuke.

¹⁵Timi khualano AMPEU lau akimthepu tsukepushi akeu tsupuwuni keu mthave puzu tishimove aye paye lochilekeu kumllagho shinike bheri momu anetsu tukutiye kuhakeu lakhi AMPEU lau sughilo. Tipauye kiu me qhemi shikepu keno achine alo mighi chekeu qhemi lono hulo.

¹⁶Paye akimthepulo tsuni pipuakeu tsumove aye lochile masa eno tinguno alau saje pungu lo saje lakhi tipau gholo sukuqhano lochile masa. Pano tipau pesu achineu tsulo eno achineuno tipau xine ghenguno aghashikeu lhoxu pesu mllalo eno timi tipau kipimi peivetsu nanike.

¹⁷Timi khualano mthano AMPEU no ahza tsukeu lakhimu hexave aye paye angsu shivae eno tipau xine makho love masa.

¹⁸Paye lochilekeu kumllagho shinike tukutiye kuhakeu bheritsu momu anetsu lakhi achineu lau sughi masae. Tipau meye kiu qhemi shikepu keno achine alo mighi chekeu qhemi lono hulo. Timi tipau xine ghenguno aghashi keu achineuno pesu mllalo eno timi tipau kipimi peivetsu nani.

¹⁹Tiye pano AMPEU shou axine shivekeu ghenguno lochilekeu kumllagho ke.