Read Sumi Naga ACHINE 7 Bible Online

ACHINE 7 - Sumi Naga bible

ACHINE 7

¹Hipaqoye lochilekeu kumllagho yezahke eno hipaqoye ighono akimtheke.

²Hipau kumllagho lhoxuye akiptia ahuu kudauno heqhilo, pitikeu kumllagho lhoxu heqhi chekeua lono tipau jih pesu akiptia jibo bidi kujolo vepukulo.

³Tipau tha kuchopu ikhilu puzu akiptia shouno mllalo: ashomhilo atha akeu, kighikuxa tha akeu,

⁴amchilothi eno tipaulo atha akeu eno aloshi leqhi akiviu.

⁵Achineuno atha kumtsu akiptia shouno mllakeu gho lakhi shi piti pesu AMPEU lau tsulo. Hiye lochilekeu kumllagho lakhike.

⁶Achinemi kibolo kiptimi thaqhuno tipau chulu nani ikemu tiye akimthea lakhi lono chumasake kughengu tiye akimtheke.

⁷Axine kumllagho ngo lochilekeu kumllagho kini kujo ghenguno ayezah lakhi pepimhe kulupu shi ani: ashiye achineu khipauno lhoxu aghashipe mllatsu ani keno tipau salake.

⁸Pitikeu kumllagho shikeu lhoxu yikoye achineu khipauno peithatsu ani keno tipau salake.

⁹Athi kumllagho kumtsulo khipaqono amikulu lono shupugha, momu ali lono be-lhoni momu ayipali lono shupughani keno achineu khipauno Alhou lau tipaqo pesu mllani keno tipau salake.

¹⁰Ikemu bevemokeu athi kumllagho teli pesu kunuvekeu na momu qhaikeu pinamu kumtsu Aron laghalo achinemiqo salake eno panoqo dolo aqhemi shi kusajelu masake.

¹¹Kuposhukulu kumllagho AMPEU lau tsukeu ghenguno ayezah hipaqo anike.

¹²Timi lakhino hipau kumllagho pesu Alhou lau shikimthi kumllagho lakhi shi aye, paye lhoxu aghashi akeu gholo kholaqhi sumokeu asho pesu mllakeu lakhi shi kumtsa tsulo: tiye oliv teli pesu shishoi kunu keu momu qhaikeu sho oliv teli pesu nukeu momu oliv teli pesu kununo akumtsha sho shikeu.

¹³Tinguno alauno, paye kholaqhi sumo no asho shikeu pesu mllalo.

¹⁴Pano asho jeli lono apa lakhikhi pesu pakutakeu shi AMPEU mllalo; tipauye achineu khipauno lhoxu jih ikhi pesu akiptia shou vepuku keno tipau salake.

¹⁵Lhoxu shiye tipau pesu aghashivekeu tsalani lono chuve masa; tipau shi kitilamu thanau kutolo pekishe kevilo.

¹⁶Timi lakhino pa shoqhi shikupu akeu shi momu pawu puloniqhi keu kumllagho lakhi shi kuposhukulu kumllagho sughi aye tipau kumtsu mllakeu tsala lono chukhave masake kumoe ikemu chukhamono qhivekeuye thoghiuno chuluvi.

¹⁷Akuthuni kutolo ashi chukhamono aghi keuye pitileve masake.

¹⁸Akuthunilo tipau kitilamu chu aye timi tipau kumllaghoye Alhou no ikhilutsumo nani. Akumllagho huye pa launo kihi tsumove nani ikemu mithekumopu shi kihive nani eno khunono tipau chuni keno tipau makho ye aghime shinani.

¹⁹Ashi tipauno kiu kiumu chinikeulo mithemo keu diluni keno tiye chukepu kumovae ikemu pitive masae. Khuu khuu pinamu chinikeulo mithe aghi aye akumllagho hu chulu nani,

²⁰ikemu timi lakhino mithemo puzu tipau chu aye paye tinguno tilauye Alhou wu timiqo gholo lakhi kepi kihisu move masa.

²¹Itaghi timi lakhino achinepulo mithemokeu kiu kiumu buve puzu akumllagho hipau chu aye timi momu lhoxu kudauno mithemokeu shipuaghi pinamu paye Alhou wu timi gholo lakhi kepi tinguno tilauye kihisumove masake.

²²AMPEU no Muse lau ayezah hipaqo pesu

²³Israilmi ghenguno tsuke. Amshi, bheri momu ane tha chukevilo.

²⁴Lhoxu khipauno pa likhi pa kutoshi thiveni momu tughashi kutauno tsuve ni keno tipaqo thaye chukepu kumoe, ikemu kutau vehupulo peithalu nani.

²⁵Timi khuno AMPEU lau piti mllakeu lhoxu tha chuni keno paye Alhou wu timiqo gholo kihisumovelo.

²⁶Israilmi ye khile khile xu aghi pinamu panonguye khilemu ashi aghau jih chukevilo.

²⁷Timi khuuno ayezah hipau hexaveni keno paye Alhouw timiqo gholo kihisumove nani.

²⁸AMPEU no ayezah hipaqo pesu Muse

²⁹pelo Israilmi tsupeniyeke. Khuuno kuposhukulu kumllagho mllani keno tipaulo saje lakhi pesu AMPEU lau pakutakeu gho lakhi sughilo,

³⁰tipau pesu piti mllakeu shi pa ulono peighilo. Paye lhoxu tha gholo amlashi ghi sughilo eno pakutakeu gho lakhi shi AMPEU lau qhitsulo.

³¹Achineuno akiptialo atha pitilo ikemu amla shiye achinemi salake.

³²Lhoxu tipau luko ajeuye akimchi leqhi tsukeu shi pesu

³³achineu khuuno kuposhukulu kumllagholo ahji ngo atha pesu mllakeu peitha akeno tipau tsulo.

³⁴Amlashiye akimchi gho ke eno aluko ajeu pesu akimchi gho shi tsukeu huye AMPEU no Israilmi launo lukeuke eno tipau pesu achinemi tsuveake. Israilmiye hithiu ghi hipaqo pesu achinemi tsu ache masae.

³⁵Hipau leqhiye AMPEU lau piti mllavekeu lono Aron ngo panuliqo pesu achinemi shipenike akimthepu shiveke tsala lono panoqo tsuvekeuke.

³⁶Tipa tsala lono AMPEU no Israilmi lau ahza tsu puzu akumllagho lono hipau leqhi pesu panoqo tsupenikeu shike. Ayezah hipauye Israilmi pelo hithiu ghi pepimhelu masakeu lakhi.

³⁷Tishiaye hipaqono pitikeu kumllagho, athi kumllagho, axine kumllagho, lochilekeu kumllagho, akimthepu kumllagho eno kuposhukulu kumllagho yezahqoke.

³⁸Asayeqhalo Sinai Toghi lono AMPEU no ahza hipaqo pesu Muse tsuke, tiye pano Israilmi vilo pano kumllagho tsupenike pikeu tsala lonoke.