Read Sumi Naga ACHINE 8 Bible Online

ACHINE 8 - Sumi Naga bible

ACHINE 8

¹AMPEU no Muse vilo pi,

²“Aron ngo pa nuliqo sasu ino achekeu Phiki hukikhalo wulo eno achinemi phimini ngo nukepu teli, axine kumllagho ghenguno amshitsu alhothe, bheritsu kini eno kholaqhi sumokeu sho ashoghi lakhi ishi sughilo.

³Tishino aqoaho akuchopu ku kumqolo.”

⁴AMPEU no ahza tsukeu toi Muse no tipau shi eno kughou aqoaho kuchopu kumqoluve keno

⁵panoqo vilo pano pi, “Ino itehi kiu shiniye kuto ani keno tiye AMPEU no ahza tsukeuke.”

⁶Muse no Aron ngo panuliqo azuu saghi eno panoqo vilo achine shinike azu kuchhulo pive.

⁷Tishino pano aphikuzu ngo akuu phi pesu Aron pu-u eno aphi ghopilikeu pesu papokha shipipe. Pano ephod phikuzu pa pipe eno tipau khapu kepu muduniyi ghokeu pokha pesu pa po khapipe.

⁸Pano amlalo khapukeu pesu pa pipe eno Urim ngo Thumim[1] tipaulo pipeve.

⁹Pano Aron kutsulo qhopu phi pipe eno tipau agizuu shunano shikeu yipa pipe, AMPEU no pa vilo ahza tsukeu toi tiye ikhiphe tsuve keu akimthe michike.

¹⁰Tipathiu Muse no nukishe keu teli ikhilu eno AMPEU no achekeu Phikilo qhi eno tipaulo akeu kumtsu suwo qhi, hitoi shikeu lono tipau kumtsu AMPEU lau ikhiphepe tsukeu shive.

¹¹Pano teli hami lepesu akiptia shou ngo tipau lo peithache keu nhemghaqo shou eno chithakhu shou eno tipau boqha kudau kuzute puku, tiye AMPEU lau akimthepu shi ikhi phevetsu keu shike.

¹²Pano nukishe kepu teli hami pesu Aron kutsulo lepukutsu puzu pa pesu akimthepulo kishelu.

¹³Tipa shelo AMPEU no ahza tsukeu toi Muse no Aron nuliqo azuu saighi no aphikuzu panoqo pipe, aphi kipili pesu panoqo pokha khapipe eno panoqo kutsu shou akutsu kunha pipeke.

¹⁴Tipathiu Muse no amshitsu alhothe lakhi axine kumllagho ghenguno saghi eno Aron ngo pa nuliqono tipau kutsulo inape ngo pe.

¹⁵Muse no tipau ghiqhi puzu tipau jih hami pesu pa uloti lo dipuzu akiptia chekulo ichushei keu shou dipuku, tipau shikimthepe tsuvekeu shiniyeke. Tithiu pano ahji aghikeqo pesu akiptia bophilo leqhive. Hitoi shipuzu pano tipau shikimthepe tsuvekeu eno ikhiphetsuve keu shike.

¹⁶Muse no kighi kuxa tha kumtsu, aloshi leqhi akiviu eno amchilothi eno atha tipaqolo akeu lupuzu akiptia lono kumtsu pitive.

¹⁷Pano amshitsu yiko ngo ashi, akighiqo kumtsu pesu ngochekeu ghazu bocho khalauno pitive, tiye AMPEU no ahza tsukeu toi shike.

¹⁸Tipashelo, pitikeu kumllagho ghengno Muse no bheri tsu lakhi saghi eno Aron ngo pa nuliqo pelo tipau kutsu shou panoqo u bepeke.

¹⁹Tishino Muse no tipau ghiqhi eno tipau jih pesu akiptia jibo bidi kujo shou vepuku.

²⁰Muse no bheri hu aleqhi shi ghethave, kighinoli ngo aluko kuma azu pesu qhuve eno AMPEU no ahza tsupuakeu toi tipau kutsu ngo atha eno bheri tipau kumtsu pesu akiptia shou no pitike. Pitikeu kumllagho hipauye amino piti mllakeu lakhi ke eno tipau xoye AMPEU lopu shichenike.

²²Tipathiu Muse no bheri akiniu saghi, tiye achinemi akimthepu shinikeu ghengunoke, ike Aron ngo panuliqono tipau kutsu shou panoqo u bepe.

²³Tishieno Muse no tipau ghiqhi puzu ahji hami pesu Aron kini ajeu aniqelo ngo pau loqu ajeu, papukhu loqu ajeu ditsu.

²⁴Tipathiu pano Aron nuliqo azuu saghi eno ahji hami pesu panoqo kini ajeu aniqelo ngo panoqo uloqu ajeu eno apukhu loqu ajeu ditsu. Muse no ahji aghikeu pesu akiptia jibo bidi kujolo vepu ku.

²⁵Pano atha ngo ashomhi tha, kighikuxa tha aghikeu kumtsu eno aloshi aleqhi akiviu, amchilothi eno tipaulo atha akeu ngo aluko ajeu ishi ikhiluve.

²⁶Tishieno pano ashoghilo kholaqhi sumokeu sho akeu AMPEU lau ikhiphepe tsuve keu lono ashopa lakhi teli pesu shikeu shopa lakhi eno tsa tsaikeu sho lakhi ishi pesu atha ngo aluko ajeu akeqo shou beke.

²⁷Pano achuqupu hipaqo kumtsu pesu Aron ngo panuliqo ulo sutsu eno panonguno tipaqo pesu akimchi gho lakhi shi AMPEU lau tsu.

²⁸Tipathiu Muse no achuqupu panongu launo ikhiluno akiptia lono tipau pesu pitikeu kumllagho shouno pititsu, tiye akimthepu shikeu kumllagho lakhi shike. Hiye achuqupu kumllagho lakhike eno tipau xoye AMPEU lopu shichenike.

²⁹Tishi puzu Muse no amlashi ikhiluno akimchi gho lakhi shi ghi AMPEU lau pesu tsu. Tiye akimthepu shikeulo bheri peithakelo tipauno Muse shileqhi ke. AMPEU no ahza tsukeu toi Muse no thwokha kumtsu shike.

³⁰Muse no nukishe teli hami ikhilu eno akiptialo ahji hami akeu ikhilu puzu Aron ngo panuliqo shou eno panoqo phimini shou kuzute. Hitoi shipuzu pano panoqo pesu eno panoqo phimini pesu AMPEU lau ikhiphepe tsuvekeu shike.

³¹Muse no Aron ngo pa nuliqo vilo pi, “AMPEU no achekeu Phiki hukikhalo ashi pesu wulo eno tipau lhopuzu tila akimthepu shi tsuvekeu kumllagho shoghilo ashopa akeu gholono chulo, AMPEU no ahza tsuvekeu toi shilo.

³²Ashi na asho namu achili shivekeuye pitivelo.

³³Nonguye akimthepu shikeu chini tamphi loye atsala tsuni kutolo Aphiki hukikha lono cheve kevilo.

³⁴Ishi ninguno kiu shive akeno AMPEU no shilo pi ahza ningu tsuke, tiye axine ikhivetsu niyeke.

³⁵Nonguye atsala tsuni dolo puthotsu puchotsu Aphi hukikhalo AMPEU no kiu shilopi ahza tsukeno tipau shi ghi ngo mayesae. Nonguno tipau shimo aye nonguye thi nanike. Hiye AMPEU no ahza itsuve keuke.”

³⁶Ikehu AMPEU no Muse vechewo ahza tsukeu thwokha kumtsu Aron ngo panuliqono shie.