Read Sumi Naga JEREMIYA 10 Bible Online

JEREMIYA 10 - Sumi Naga bible

JEREMIYA 10

¹Israil lo akemiqo, AMPEU no nongu ghenguno atsape akeu inijulo.

²Pano pi, “Kutami shiayeh laghi pape kevilo; atsutsulo kiuala pakutakeu ithulukeulo thoghu thoghui kevilo, tipauno ashiayeh kutami kichimamave aghi pinamu.

³Timi hipaqo chineyehye amekuha ke. Aghasalo asubo lakhi yeqhi asukumlamino ananu pesu tipau chhithake,

⁴eno shunayi ngo tsandiyi pesu koghekughu shipuku tiye ikiqi pemo nike ayishu pesu yedape qhike.

⁵Asu atu julho tipaqoye akukalilo aluthu toike tipaqoye atsa pichemoe; tipaqoye ala chemlake ghenguno xapu nani. Tipaqo jumsa kevilo: tipaqoye kiumu nongu shipsa mlae, tipaqoye kiumu nongu kivipu shimlake.”

⁶AMPEU, otoikemi milakhimu kuhae; noye akuka kughushuke eno ojeye kije eno akuka ani.

⁷Khuuno ogihumoni kya? Ashiayeh kumtsu shou akukau? Ogihu kuzuke. Ashiayehqolo alokutsumi gholo momu panoqo kukami gholo milakhimu otoikemi kuhake.

⁸Panoqoye kumtsu mbomuzu eno anikhake. Panonguye asu julho launo kiu shikaluni kya?

⁹Panoqowu asu-atu julhoye Spein lowu tsandiyino kuzuke eno Ufaz lowu shunayino kuzuke, ti kumtsu atshamgha kishimi kumlake. Tipaqoye hughaikeu eno phalaikeu phimini aghi ghokithimino ghokeu pepuke.

¹⁰Ikemu AMPEU, noye kuchou Lhou ke, noye xuakeu Lhou eno lhokta kukau. Nono aloghu ide kelo ayeghiqhano itha; ashiayehqoye ologhu pumlake.

¹¹(Noye panoqo vilo pimoaye sake, ike ayeghi ngo atsutsu mlapuamokeqo lhouqoye kutsaleve nanike. Panonguye ayeghi shou khile khile pinamu qhimove nanike.)

¹²AMPEU no pa kuka pesu ayeghi mlake; Pa lokutsu pesu ayeghiqha lhopheke eno kungugha qhachhowoke.

¹³Pano ahza tsukeulo atsutsu kunguu azu akeuno igha; pano ayeghi shekha lono khungkusu saghi. Tsughu akelo pano tsutsupha kulo cheni eno pano pekutsupua kebo lono amlhu puwu.

¹⁴Hipau ithulu kelo, timiye mamaive eno kumsukulu hauve; Ajulho shichekemiye kujokhave, panoqono alhouqo mlape qhikeuye kichileu eno akuxu kuhake.

¹⁵Panonguye ame kuhae eno jumithi kepue; AMPEU no panoqo ghimeqhi kelo panoqoye kutsaleve nani.

¹⁶Jakob Lhou ye panoqo toimoke. thwokha kumtsu lhokeuye pa likhinoke, eno pawu timi shipenike pano Israil kishelue. Pa jeye Aqokitikhi MPEU ke.

¹⁷Jerusalem lo akemiqo, nongu lenike suhuluvae! Nonhemgha hekutsu lulo.

¹⁸AMPEU no ayeghi hipau lono nongu ikhipeveni cheni; nongu milakhimu aghike kutolo paye nongu chishedaqhini cheni. AMPEU no piveake.

¹⁹Jerusalem lo akemino ighamuku pi, “Shishe akumsapu shi ninguye izavae! nizakuqoye vimo nani. Ninguno kumsukeuno ninguye hipau puqhekulupu shi nani kepi acheke!

²⁰Niphikiqoye ixapinyivae; tipaqo tsugha puakeu kighiye itauvae. Ninuliqo kumtsu chekhavae; niphikiqo pepuku tsuni kemi lakhimu kuhavae; Shonhakeu phi pufuqhini kemi lakhimu kuhavae.”

²¹Ino khochile pi, “Niwu sakiphemiqoye mbomzu-miqoke; panonguye kichepiye penike ghenguno AMPEU vilo inijumoe. Tighenguno panonguye tomoveke, eno niwu timiye halepinyivae.

²²Inilo! Asutsa ighivae! Ahuu akeu shiayeh lakhilo muqhu- akeu kije ipeghi ani; tipaulo ghushimi lojino Juda lo aphughiqo asayeqha kughulhovetsu nani, eno sherno ngokeu-a shivetsu nani.”

²³AMPEU, timi khumu pa kuxu shekha shou ampiu kumoe, timi khumu pa likhi pa kuxu peithalu chemoe.

²⁴AMPEU, owu timiqo shikumzu tsulo; ikemu nishou ihulo mughachhoi kevilo momu nono aloghu idevekeulo nighime kevilo, tiye nighenguno ashekha shiveniake.

²⁵Omllamokeu shiayehqo shou ologhu ide eno opevekemiqo shou tipau pukulo. Panonguno owu timiqo pithivetsu; panonguno qhoyi ningu kutsa leveke eno niyeghi ixapinyi qhivetsuke.