Read Sumi Naga JEREMIYA 14 Bible Online

JEREMIYA 14 - Sumi Naga bible

JEREMIYA 14

¹AMPEU no qhaivekeu vehu ivilo pike,

²“Juda ye mloqa ani; tipau phughiqoye thi ayeake, tile akemiye amlokusashi ayeghilo ihozu, eno Jerusalem ye kuphulepi ighamuku ani.

³Kinimino panoqemi hapesu azu phuwupe; tipaqono azu tughukolo wu kemu azu phumlae; tipaqoye pano yeghili kumsa pesu idechile ighi. Amlo hauve eno avehu kughuzu shiveno panoqo gi kusuluve.

⁴Tsughumokeu ghenguno eno ayeghi qhaive kehu, alukichimiqoye amlo kusashi suake; panonguno pano gi kusuluve.

⁵Aluzalo ashe azano liti anileshi pitiqhikeu qhive, kughengu asutsani kuhaveke.

⁶Agha gadahano naghuto kutsuqa lo puthugho eno atine toi atuthu shekukuno; panoqo nhethino ithumlave kughengu panonguye achuqupu kuhake.

⁷Iw timiqono ilau ighamuku pi, ‘Ni xineno nishou ngukube anamu AMPEU, nono tushoqhiveke toi nikuphulo. Ninguye ghuthu kutomo olauno tsughusu wuveke. Ninguno oshou axine shiveke.

⁸Israilw lajupuye olikhiake; kutsakungokeu lono nixalukeuye nonoke. Noye kushiye nighakhulo inami toi ani, kicheghuzumi lakhino kijili lakhi ngokeu toi shi ani kya?

⁹Kushiye noye akichiqhi pesu akemi toi ani kya? Ghushimi lakhino kutami kuphunike akuka kuhano aketoi ani kya? Mutsuqheino AMPEU, noye nigholo anike! Ninguye ow timiqoke, niqhivetsu kevilo.’ ”

¹⁰AMPEU no timi hipaqo ghili ishi pi, “Panonguye ilauno pove nikeuno pano lokutu acheni eno pano likhi pano ghasuni chemoe. Ikehu niye panoqo lau amlo kiqi kuhae. Panonguno akumou jeli shikeu ino kumsupu che nani eno panoqo xine ghenguno ghimeqhi nani.”

¹¹AMPEU no ivilo pi, “Timi hipaqo kuphu peni keu ivilo khukevilo.

¹²Panonguno kumvu kuphupenike ighamuku pinamu niye initsumoke; eno panonguno akuchopu piti mllakeu ngo athi pesu mllakeu kumllagho itsue pinamu niye panoqo lau amlo qini chemoe. Tishike kumono, aghukishi ngo akhu-ava eno kusukini pesu ino panoqo heqhipithi nani.”

¹³Tileno ino ishi pike, “AMPEU Alhou, nono ithi anike tungkupmino timiqo vilo aghukishi momu akhu-ava ighimo nani kepi piani kughengu panonguno pikeuno nono tushoqhive keuno niyeghilo iquighakeu likhi anikepi piani.”

¹⁴Ikemu AMPEU no khochile pi, “Tungkupmiye ije lono akimki tsa piani, niye panoqo puwu puamoe momu niye ahza kiumu panoqo tsupuamoe momu atsa lothi lakhi mu panoqo putsa puamoe. Kungunhetsu ghili panonguno piakeu huye ilauno ighikeu kumoe; panonguno ashe-azu tsa shi piakeu huye ame kuhamithe keu pano kukumsulo akeu tsake.

¹⁵Tungkupmi hupaqoye ino panoqo puwumo amu ije lono aghukishi ngo akhu-ava ye hipa yeghi jole ighimo nani kepi pikeqo shou ino kiu shini cheni keno ni, AMPEU no ovilo piani, ike aghukishi ngo akhu-ava lono ino panoqo heqhipithi nani.

¹⁶Panoqono khunoqo vilo hipaqo tsa pipuani keno timi tipaqo ghi tikithipushi heqhipithi nani. Panoqo kithikumoye Jerusalem laghila lo vephepeve nani eno panoqo kumo shiqhotsuni kemi ghi kuha nani. Panoqo kumtsu lau hipau shinani, pano nipu, atianuli kiptimi totimi kumtsu sukuqha nani. Panoqo kixikila ghenguno ino panoqo pelo lope nani.”

¹⁷AMPEU no timiqo vilo imlokusa pipenike ahza itsuke. Ishi pilo pike; “Ipelo putho pucho qaita pemono inhezu qowu apeniu kughengu ni timiye aghuza kitikhi shi izavae eno ighono shipusuvae.

¹⁸Kughou ino aluzalo wuju keno, aghukishi lono thivekemi sukumo ino ithulu; kughou ino taunlo wuju keno, akhu-ava lono thivekemi ino ithuluke. Tungkupmi ngo achinemino pano kumla mla ake ikemu panonguye kiu shiani keno panonguno ithi amoe.”

¹⁹AMPEU, noye qhoi Juda peive akesha? Noye Zion lo akemiqo jumithini kesha? Noye kushiye shishe alhoksapushi nighuzavetsu no ninguye vimla vea kya? Ninguno alokughuno phujuke ikemu akivipu kiumu ipeghimoke; Ninguno shikipivi laju kemu tipa zuqhulo shikuighukeu ighike.

²⁰AMPEU, ninguno oshou axine shiveke; nino ni xine ngo nipuasu xine piphe ani.

²¹Nono tushoqhikeu kumsululo eno nijupe mithive kevilo; Jerusalem shou ajekusapu sughitsu kevilo; tiye ojekipi kuka lakhu akeu a ke. Nono ningu sasu puloshoqhi shikeu kubove kevilo.

²²Ashiayehqo su-atu julho lakhinomu tsutsughu puwutsumla; atsutsu ghi pa kutoshino ghuqhi tsumla ke. O AMPEU, niLhou, niwu lajupu oshou acheni kughengu nono hipaqo thime shi acheni.