Read Sumi Naga JEREMIYA 15 Bible Online

JEREMIYA 15 - Sumi Naga bible

JEREMIYA 15

¹Tileno AMPEU no ivilo pike, “Muse ngo Samuel pamano puthugho puzu ivilo timi hipaqo ghenguno qhuiniju aghi namu niye timi hipaqo shou kimiyeqhiyi keu piyemo nani. Panoqo pelo cheve pelo; panoqo pelo igizu lono wuve pelo.

²Kughou panonguno ovilo khilau wukepu kyapi inijuaye panoqo vilo pikeu pesu pilo:” Khamino ahakusashi kusukini lono thinikeu ani, panoqono tilau wu nanike! Khamino ahakusashi aghukishi lono thinikeu ani, panoqono tilau wu nanike! Khamino ahakusashi puqumiyekeu lono thinikeu ani panoqono tilau wu nanike! Kutamiye ahakusashi akughulo sawunikeu ani, panoqo no tilau wu nanike!

³Ni, AMPEU no kughathave ake akuighupu thime bidi panoqo lau shini cheni: panonguye aghukishi lono pithive nikeu; panoqo kithi sukumoye atsuqono sunhekishe nani; aghauqono tipaqo chu nani eno achili ghupuaghi keu tughashino kunho nanike.

⁴Ino ayeghiqhalo akemi kumtsu pelo panoqo jupesu akumsano kutuxoxoyivepe nani tiye kughenguno kumono Hezekiya nu Manase no Juda lo akukau shiakelo Jerusalem lo shikeu ghengunoke.

⁵“O Jerusalem lo kuamiqo khuno nongu jupe amlo ighiqhiyini eno khuno nongu shou mloqani kya? Khuno nongu vilo kiutoi ani kelapi ado peveghi iniju kya?

⁶Nowu timiqono ipeive nonguno ilau nongu zupo kughopuwo tsuke. Ike ino i-u chhopuwo nongu munuqhike kughengu niye iloghu ghasukeu lono ingaveke.

⁷Aghakhulo taun atsu-tsulo aghijini toi ino amlhu gholo nongu vepuwuke. Nongu iwu timiqo kutsaveke, ino notianuli pithivetsu kughengu nonguno alhoksa laghiqo lakhavemoke.

⁸Noyeghilo chimemino azughi phivilo asayethi akeu nguno alau akhanike. Ino nowu lhothemi aheagho lono pithivetsu eno tipaqo paza pelo aghime shipeke. Ino zuleno sukutukeu akuighupu pesu panoqo ghaqhike.

⁹Aza khuno pa nuli mitsuni puhave keno iluqive, atuthu shekukunoke. Li ghenguno pucho tsalaye zumoi keu shive; liye ajekusapu shive eno amlosa auve. Nongu itaghi puxupe aghikemiqoye ino aghumiqo pelo nonguqo pithive penani. Ni, AMPEU no piveake.”

¹⁰Niye kiutoi ahakusapu timi kela! kushiye iza polono ayeghilo ipunu supe kela! Niye aghakhulo timi kumtsu sasu muto eno kutsalakepu shike! Niye khuu vilo mu pisa nalu puamoe momu puna puamoe; ikeghi kumtsuno imusuinike.

¹¹AMPEU, ino akivishi oqecheghimo aye eno ighumino shiluksa shi eno avekusashi akelo panongu zuqhushi ino ovilo qhuiniju puaghimo aye panonguno ishou musuini akeu kumtsu kuchou shi shikupu tsulo.

¹²(Khunomu ayi hephomlake, akhotono ahuu akeu ayiye hephomlake, tiye alazayi kitekungo anike.)

¹³AMPEU no ivilo pi, “Ino aghumi puwu puzu iwu timiqo kini eno pekutsu kike puakeu xapuwuve penani, tishikeuye aghakhu qhalo panonguno axine shichekeu ghenguno panoqo ghimeqhi niyeke.

¹⁴Panonguno kiumu mthakeu yeghilo ino panoqo pelo aghumi qepe nani, kughengu imlo kighideye ami toike eno tiye alhokupuju piti ananike.”

¹⁵Tileno ino ishi pi, “O AMPEU, nono ithi khavae. Ikumsululo eno kuphulo. Ipelo ishikighimeqhi chekemiqo shou amukhu lupelo. Panoqo lau shishe kutu-u auve puzu panongu pelo ipithive kulupu shipe kevilo. Kumsulutsulo, oje ghenguno iphimokeu shichenike.

¹⁶Nono iputsake, eno ino atsa lothi kumtsu initsu chenike. Niye owuke O AMPEU, Akughushu Lhou, ikehu otsano imlolo alokivi chhitoi ani eno alokivi anike.

¹⁷Niye kutami gholo ido kilhe kunu eno zuphu zugha shi auve chemoke. Ou ishou bepukukeu ghenguno niye ilikhi ngo cheni eno aloghu ide acheni.

¹⁸Kushiye niye ishi ime akepushi kya? Kushiye ighuzakuye vimlakeu kya? Kushiye vimla nikeu shiauve kya? Noye mutsu tsalalo aghoki lakhi qhaiveke toi ilo shipusu tsu nike kumsupu ani kesha?”

¹⁹Ishipikeulo AMPEU no khochile, “Nono xaide ghi aye, ino osachilelu nani eno noye itaghi iqeu shipe nani. Akukumsu kuhakeu tsa pinikeu zuqhulo nono amekuapu tsa pesu asheshu aye noye itaghi iwu tungkupu shiluve nani. Timiqono olau ideighi nani eno noye panoqo lau wukepu shimo nani.

²⁰Timiqo sheloye ino okugha pesu alazayino shikeu tozu paphi shitsu nani. Panonguno omjo chile nani ikemu panonguye oshou tolu pemo nani. Ino osushoni eno akivishi okhenike ghenguno ogholo ache nani.

²¹Ino lhoksa kughami ngo heqhi buqhikemi ulono ohakholuve nani. Ni, AMPEU no piqhiveake.”