Read Sumi Naga JEREMIYA 16 Bible Online

JEREMIYA 16 - Sumi Naga bible

JEREMIYA 16

¹Itaghi AMPEU no iputsa eno ivilo ishi pike,

²“A-a hikithipu loye anipu lukepu kumoe momu atianuli lhokepu kumoe.

³Hilehi atianuli khunoqo punu pua khani eno tipaqo puaza lau kiu shiveni cheni keno ino ovilo pitsuni.

⁴Panonguye kusukini akumsapu lono thinanike eno khunomu panoqo ghenguno mloqamo nani momu panoqo kumo shiqhoni kemi kuha nani. Panoqo kithi kumoye tubatuzu toi ayeghilo hekutsu kumqope qhi nani. Panonguye aghukishi momu puqumiyekeu lono pithive nani eno panoqo kithi kumoye aghauqo ngo tughashi chuqupu shive nani.”

⁵“Aki khipaulo qanimlo aghini keno noye tipaulo ilokepu kumoe. Khuu ghengu nomu amlo ghime shikevilo. Niye iwu timiqo shou iquighaikeu pesu kitilamu kumghatsumo nani momu panoqo lau kikimiye eno amlo ighiqhiyikeu piyemo nani.

⁶Hipau yeghilo kinimi ghi kumlhomi ghi thive nani, ikemu milakhinomu panoqo kumo shiqho momu panoqo ghenguno qani mlomo nani. Timi khuumu amlo kusa shi akeushi ashi aji ghalekeu momu akutsusa miyevemo nani.

⁷Khuumu timi lakhino pa bolomi thive akelo akithiu bolomi lokughuno tsunike tipau sasu kuchu kusho shimo nanike. Khualano apuh momu aza thive aghi namu khunomu amlo saqhiyikeu piyemo nani.”

⁸“Aki khilehi timiqono aghulhu shiaghini keno tipaulo ilokevilo. Panoqo gholo kuchu kusho shinike iqa kevilo.

⁹Ni, Aqokitikhi MPEU no Israil Lhou no kiu pikepu shi nani keno inialo. Ino alokivi, ahukulu sutsa eno kulakupu ghulhu lokivi sutsaqo inaqhoivetsu nani. Hilehi akemi timiqoye hipau shikeu ithuluke kuto xu nani.”

¹⁰“Kughou nono panoqo vilo hipaqo kumtsu pinikeno panonguno ovilo niye kushiye mughachhoikeu lono panoqo ghimenikeu kughathaluve akelapi ovilo iniju nani. Panonguno panoqoye kiu kumla lhoksa shivekeu lono kuquve eno panoqo Lhou AMPEU shou kiu xine shive kelapi iniju nani.

¹¹Tileno panoqo vilo AMPEU no ishi pike pilo, nongu puasuqono ilauno tsughusu wuve eno kutau lhouqo qe eno mllauveke. Panonguno iqhive eno ino kutsupiyekeqo hebideveke.

¹²Ikemu nonguye nopuasuqo nguno alhoksa kutukeu kumla mla puani. Nongu kumtsu ghano kuthovilo, kixikila eno nonguno ihebideke.

¹³Tishike ghenguno ino ayeghi hipau lono nongu haphe pesu nongu momu nopuasuqono khilemu muthano achekeu yeghilo puwuve nani. Tilano nonguno putho pucho kutau lhouqo qenani eno niye kimiye qhiyi keu nongu lau piyemo nani.”

¹⁴AMPEU no pi, “Aghuloki wochenie, kughono timiqono tushoqhini eno Alhou no Ijip yeghi lono Israil saipeghikeuye xuanike ghenguno ipi pimo nani.

¹⁵Tipa zuqhulo, panonguno tushoqhi keulo Alhou no ayeghi ahuu akeu lono eno ayeghi kutau kumtsu khilehi pano panoqo hakughutsuve keu lono Israil saighikeuye xuanike ghenguno ipi pi nani. Ino pano yeghilo panoqo sachile saghi nani, ti panoqo puasuqo lau ino tsukeu yeghilo. Ni, AMPEU no piqhive ake.”

¹⁶AMPEU no piani, “Ino akha kukhami kutomo puwuno timi hipaqo kughalupe nike ighipe nani. Tithiuno ashihami kutomo puwuno naghuto ngo atoghi kumtsulo panoqo haqhipe nani.

¹⁷Panonguno shikeu kumtsu ino ithulu ani, ilauno kiumu kusuvemla; panoqo xineye igizu lono povemlake.

¹⁸Panoqo xine ngo lhoksakugha ghenguno kighishe kini ino panoqo pelo lochilepe nani kughengu panonguno asu-atu julho khikhi akuxu kuhano akithi kumo toi keu pesu iyeghi kitiqevetsuke eno panoqow kichileu lhouqo pesu tipa yeghi chhitoi anipeke.”

¹⁹AMPEU, nono isusho chekeuke eno akumto itsu cheni; shiluksa do ghulokilo nono ikuphuke. Ayeghi shekha kudauno ashiayehqono olau ighino pi nani, “Nipuasuqoye kichile lhouqo kumoaye kiumu kuhake, avehu kuhakeu asu atu julho thono kiumu kuhake.

²⁰Timi lakhi ye pa lhouqo mlalu nani kesha? Moe, pano tipau mlalu namu tipaqoye alhouqo kuchou kumoe.”

²¹“Tighenguno ghuthu khavino ashiayehqo pelo ikuka ikumto ithipe nani; panonguno niye AMPEU kepi ithi nani,” ipi AMPEU no pi.