Read Sumi Naga JEREMIYA 19 Bible Online

JEREMIYA 19 - Sumi Naga bible

JEREMIYA 19

¹AMPEU no ivilo wupuzu ayeghili lakhi qhulo pike. Pano ivilo sakiphemi khami eno achinemi muchomi khami kupuzu

²Alitsa Khagho vechesu Hinom Khila kudau wulo pike eno tilauno pano atsape itsunikeu shi akeu pesu ivilo asheshulo pike.

³AMPEU no ivilo ishi pilo pike, “Juda lo kukamiqo eno Jerusalem lo akemiqo, ni, Aqokitikhi MPEU, Israil Lhou no kiu piani keno inilo. Ino a-a hipau shou kutsakungo keu lakhi sughini cheni eno tipau shikeu chilukemi kumtsu mamaive nani.

⁴Niye hipau shini putsake kughengu timiqono iqhive eno a-a hipau lono kutau lhouqo lau lhoxu heqhipe mlla puzu hipau-a kitiqeveke; alhou tipaqoye panoqo ghi momu pano puasuqo ghi momu Juda lo kukamiqo ghi kitilamu mthano achekeqoke. Timiqono pimimokemi ji pelevetsu keu pesu a-a hipau chhitoiveke,

⁵eno panonguno Baal ghenguno akipti-a mlape qhike, tishi puzu panoqo tianuli heqhipe ami lono pitipe mllakeu shiniyeke. Niye panoqo vilo hipau shilopi khilemu ahza tsumoe; hiye ikukumsulo ghi kuhakeuke.

⁶Tighenguno hipa-a pesu Tofet momu Hinom Khila ipi kumonikeu doghuloki wo cheni. Tishinike zuqhulo, tipa-aye Ghikiqhi Khila kepi piwove nani.

⁷Hipa-a lono Juda ngo Jerusalem lo akemi qono kughuchhope aghikeu kumtsu ino hexavetsu nani. Ino pano ghumiqo pelo panoqo shou toluvepe eno aghukishi lono panoqo pithivepe nani. Ino panoqo kithi kumo pesu aghau ngo tughashiqo chuqupushi tsuve nani.

⁸Ino aphughi hipau shou kutsapiniyi keu akuighupushi sughi nani kehu tipau vechewu chekemi kumtsuno juighu kelauno kutuxoxo akichiqhive nani.

⁹Aghumino aphughi suholuve nani eno tile timi akeqo pithiveniye shi nani. Aghumino akumsapushi timiqo khasuluve kelauno aphughi alou akemiye lakhino lakhi shi chu nani eno pututa tianuli shi ghi chu nani.”

¹⁰Tileno AMPEU no ivilo timi isasu wukeqo zulo no ayeghili kubole piyelo pike,

¹¹eno panoqo vilo Aqokitikhi MPEU no pilo pikeuno, “Ino timi hipaqo eno aphughi hipau kubole nani eno tiye ayeghili kughupo hipau itaghi kimemlavekeu toive nani. Timiqono pano timi thivekeqo pesu Tofet loghi qho nani kughengu panoqo pesu khilehi qhomove nanike.

¹²Ino tushoqhi ani hipau phughi ngo hile kughuna akemiqo pesu Tofet toi shivetsu nani.

¹³Jerusalem lo aki akeqo, Juda lo kukamiqo ki eno aki khijehi kutsuqalo tsungquikeu ta pesu ayepuqo lau pitikumna cheni eno khilehino kutau lhouqo mllakeu shi aji peleqhi cheni keno tipaqo kumtsu Tofet toi mithekumo shive nani.”

¹⁴Tithiu AMPEU no pa tsape tilehino asheshu penike ipuwukeu-a Tofet qhive. Ino wu puzu Achineki khalalo puthughono timiqo vilo

¹⁵Aqokitikhi MPEU, Israil Lhou no pilo pikeu pesu ishi pi, “Ino aphughi hipau shou eno taun akupunulo akeqo shou aghimepu shinikeu shi pipuakeu kumtsu sughiniye ani, kughengu nonguye kuthoviloke eno ino kiu piniye anikeno nonguye initsumo nanike.”