Read Sumi Naga JEREMIYA 2 Bible Online

JEREMIYA 2 - Sumi Naga bible

JEREMIYA 2

¹AMPEU no ivilo

²hipau tsape pesu Jerusalem lo timi kumtsu lau asheshulo pike. “Kughou nonguno alhothe shi akeno nonguye kiutoi pukhukulu keno ino kumsulu ae, ningu kulakupu shitughuloye nonguye kiutoi ikimiye chekeno; Nonguno asayeqhalo kishi ipapelu chekeno, yisumokeu yeghilo achekelo.

³Israil, noye iwu likhike; noye ilulo xathi amsuuke. Ino oshipusakemi kumtsu shou aghime eno kutsakungo keu ino puwuke. Ni, AMPEU no piveake.”

⁴Nongu Jakob laghaqo, AMPEU tsape inilo, nongu Israil shiayehqo,

⁵AMPEU no pike: “Nongu puasuqoye ino vimono akeu kiu ithulu keno panonguye ilauno putosuve kya? Panonguye ame kuhakeu asu atu mlla eno panongu ampino ame kuhakeu shiuveke.

⁶Panonguye Ijip lono ino xaphe saghi keghi panonguno niye khuu kela mthake; ino timi kughunamoke alo panoqo sapiye: asayeqha eno balu saye toghi yeghilo, qhayikeu eno akumsapu yeghilo, timi khuumu ngochemokeu alo eno khiu nomu kicheghuzu shichemokeu alo.

⁷Aghuma yeghilo ino panoqo sasu ighi, tipaulo ipeghikeu xa eno thime kivi kutau jupesu alopeniyeke. Ikemu panonguno tipaulo iloghikelo iyeghi shipixive tsu; ino pano- qo tsukeu yeghi panonguno kitiqevetsu.

⁸‘AMPEU ye khile ani kya?’ ipi achinemino inijumoe, iwu achinemino imthaveke. Ayehkipemino ihebide ipeghive; tungkupumino Baal jelono pi cheuve eno avehupu kuhakeu julho mllauveke.”

⁹“Ikehu ni, AMPEU ye itaghi iwu timi qo shou kughakepu akeu pini cheni. Ino panoqo tianuli shou ngukubeni cheni.

¹⁰Kulolau Cyprus yeghilo wulo, kipela kudau kedar yeghilo khuala puwu lo. Nonguno ithulu nanike hikithipu khilemu shipua mphike.

¹¹Khuno shiayeh mu pano lhouqo kusukidi puamoe, alhou hipaqoye kuchou kumo ke. Ikemu iwu timiqoye ipesu kusukidivae, panoqo lau agigihu sughikeu Lhou pesu panoqo ghenguno kiumu shimlakeu lhouqo kilivae.

¹²Ikehu atsutsu pelo akuighupu shi sukini peni, akumzaqhiyi eno akichiqhiyi penike ino ahza tsuke,

¹³kughengu iwu timiqono axine kini shivae: panonguye ni azu kuxu zupuki launo tsughusu chevae, eno panonguno atu tughuko chhu ani, ipovekeu tughuko loye azu mighepe puamla nanike.”

¹⁴“Israil ye aquaxemi kesha? Moe, paye aqu axe shipe nikeu shi punusu puamoe. Tishiaye kushiye pa ghumino pa haqhi ani kya?

¹⁵Panonguno abongushu toi pa shou ighapuku, panonguno pa yeghi pesu asayeqha shivetsu, pa phughiqoye ixapiniyi ani eno qhoyi qhivae.

¹⁶Iyei, Memfi ngo Tapanhe lo akemi qono pa boghe kubolevetsu.

¹⁷Israil, olikhi nono oshou hipau sughike! Ni nongu Lhou AMPEU hu, ala kupujulo ino nongu sachekeghi nonguno ipheveke.

¹⁸Ijip lo iqikeu lono kiu ala shilu nani kepi nonguye kumsuve kya? Nayil ghoki zu yeniye kesha? Asiriya lo wukeu lono kiu ala shilu nani kepi nonguye kumsuve kya? Eufrati ghoki zu yeniye kesha?

¹⁹Nolikhi nolhoksano nongu ghimeqhi nani, eno nonguno ilauno tsughusu wuvekeuno nokideqhive nanike. Ni nongu Lhou AMPEU phevekeu eno ikidiu amikucho shi xuche- move aye kiutoi kukhu kimji eno alomo kepu keno nonguno ithilu nani. Ni Aqokitikhi MPEU Akughushuuno piveake.”

²⁰Akughushu AMPEU no pi, “Israil, puzuu nomu noye ikuka gha hebideke; Nono imlla nikeu eno igholu nikeu lo mopike. Naghuto qhemghai keu kumtsu eno asu minipho qholo nono lhoipeghi penikeu lhouqo mllake.

²¹Kishekidelu keu tsayibo, alothi akiviu lono ipeghikeu lakhi toi ino oshosuke. Ikemu noye kiu shiuvea kela julo! noye tsuwuveno amekuhave keu tsayibo toivae.

²²Nono sapun akumghau pesu qhua namu niye okipimi oxine ithuluni aphike.

²³Noye kishi puzu olikhi oshipusa mphi kepi pilu nani, eno noye khilemu Baal mlla mokepi nani kya? Akhilalo nono kishi axine shikeno julo; nono kiu shivea keno julo. Noye tughalo akeu kemel no mutho ipeghi akeshi poiqho iqike, asayeqhalo koha wuke.

²⁴Lino mutho ipeghi kelo khuno li ghasuluni kya? Li avehupushi akeu kemel attsuye kiumu akupunapu shimo nanike, liye aghupa ghulokilo pulhapuju aghive nanike.

²⁵Israil, kutau lhou hachekeu lono opukhu pelo qeivepe kevilo momu okughoki qhaivepe kevilo. Ikemu nono pike, ‘Moe! Niye athiu tsughu ighimoake. Niye inami lhouqo kimiye auvae eno tipaqo papewunike.’ ”

²⁶AMPEU no pi, “Kupkami lakhi kughaluve kelo shikukujo kehu toi nongu Israil lo akemi kumtsu shikukujo qhi nani, nowu kukami, kijemi, achinemi eno tungkupumi kumtsu shikukujo qhi nani.

²⁷Nongu khunoqono asuboye nongu papu eno atuquye nongu paza kepi picheni keno, tipanoqo kumtsu shikukujoqhi nani. Hiye shini putsa kughengu nonguno ilau tsughu ighi nike zuqhu ilauno tsughusu wuveke. Ikemu nonguno kughou shiluksa shini keno ivilo nongu lau ighieno nongu xalutsu lopi iniju chenike.”

²⁸Nolikhi nonguno alhouqo shipesu qhikeu khile ani kya? Nonguno kughou shiluksa shini keno tipaqo pelo nongu xalu pelo, panonguno tishikulupu shiaghiaye! Juda, noye aphughi khijehi ani keno tijejehi alhouqo kutomo puanike.

²⁹Nonguye kiu muchho ani kya? Nonguye kushiye ihebide ani kya?

³⁰Ino nongu ghimeqhiju kemu kiumu akivipu shimlake; nonguye ipelo nongu achipiulo shikithetsu pemoke. Abongushu loghu toi, nonguno nowu tungkupumi ghiqhiveke.

³¹Israil lo akemiqo, ino kiu piani keno inijulo. Nongu lau niye asayeqha lakhi toive, momu zumoi akumsapu yeghi lakhi toive kesha? Tishiaye nonguye kushiye nongu pulou shinikeu pi kya? Nonguye khilemu ilau ideighimopi pikya?

³²Ilimi lakhiye liwu akughupuchi kumsumaveni kesha? Momu kulaliuye kulakupu phimini kumsumaveni kesha? Ikemu iwu timiqoye atsala phikha kumlapushi ikumsumavae.

³³Nonguye alojipumi papesu kishi haunikeno mutsuqheyino ithi ani. Totimi alhoksau kutolono nongu launo shikalu nanike.

³⁴Nongu phiminiye kumlhomi eno kiumu pimipuamokemiqo jino dapusu ani, eno xulepuwukemiqo ji kumoke. “Ikemu hipau shivekethiu ghi,

³⁵nonguno pike, ‘Niye kiumu pimi puamoe; kuchouno AMPEU ye ishou amlo idenichemoke.’ Ikemu ni, AMPEU no nongu ghimeqhi nani kughengu nonguno axine shimphi kepi lake.

³⁶Nonguno ashiayeh kutami lhouqo lau tsughusu wukeu lono nolikhi no pesu lhalhaive ani. Asiriya no nongu mlo kusapu shivetsu keshi Ijip no nongu mlo kusapu shitsu nani.

³⁷Nonguye kujokelauno nogi pishiqhope Ijip launo tsughusu wuve nani. Ni, AMPEU no nonguno pukhu chekemiqo milive; nonguye panoqo launo kiumu ala shimla nani.”