Read Sumi Naga JEREMIYA 21 Bible Online

JEREMIYA 21 - Sumi Naga bible

JEREMIYA 21

¹Juda lo akukau Zedekiya no Milkhiya nu Pashur ngo Maaseiya nu achineu Zefaniya pama pelo qhuinijukeu hipau pesu ilau puwu:

²“Kishimo kutuake nighenguno AMPEU putsa tsulo, kughengu Babilon kukau Nebukadnezar ngo paw ghushimino aphughi khasupe le anike. Ishiake AMPEU no pano akumzapu kumla shichekeu lakhi ni ghenguno shipuzu nilauno Nebukadnezar hachileve tsu luvike.”

³Tileno AMPEU no iputsa eno ilau timi khunoqo puwukeno tipaqo vilo

⁴Zedekiya vilo pilopikeu pesu ino pike: “Zedekiya, owu ghushimi qono Babilon kukau ngo pa ghushimi sasu aghushi akeulo ino nongu pelo tomlave peni cheni. Aphughi mtsalono ino owu ghushimiqo ghunanu kisheqhipe qhi nani.

⁵Ikumto, iloghu kighide, ixu kighide eno ino muqhu mzakeu kumtsu pesu nongu shou aghushipuku nani.

⁶Hipau phughilo xuakemi kumtsu ino pithikhave nani, timi pina tikishi lhoxu namu akusu lhoksa lono thive nani.

⁷Ikemu no ngo owu kijemiqo eno timi khunoqono aghukishi, puqumiyekeu eno kusukini lono puxupe aghini keno nongu kumtsu ino akukau Nebukadnezar ngo pawu timi noghumiqo pelo kughalukhavepe nani, nongu kuxuluve tsuniye phuchekemi ulo suvetsu nani. Pano nongu pithi khave nani. Pano nongu lakhimu ghumo nani momu nongu kimiyeqhiyikeu piyemo nani. Ni, AMPEU no piqhiveake.”

⁸Tithiu AMPEU no timiqo vilo ishi pilo pike, “Julo, ni AMPEU no nongu zulo akuxupu laghi ngo akithipu laghi pesu qhitsu ani.

⁹Timi khuno aphughi alou ngoni keno aghukishi momu akhuava momu kusukini lono pithive nani. Ikemu khunono aphughi lono ipeve puzu Babilonmi aphughi le-akemiqo ulo liqhi suvetsuni keno tipaqoye pithivemo nanike; paye pa kuxu likhimu kajowuluni ake.

¹⁰Niye aphughi hipau qhitsumoveni keu shi ino kumsupuvae ikemu hipau kutsavenie. Hipauye Babilon kukau ulo suvetsu nani eno pano tipau ayeghilo pitileqhive nani. Ni, AMPEU no piqhiveake.”

¹¹AMPEU no atsape hipau pesu Juda lo kukau kibo, David laghamiqo lau tsulo pike:

¹²“Ni, AMPEU no piakeu inilo. Tsala kipetsulo kuchou xakutha shitsunikeu shilo. Timi khuno pishiqhiluve puzu itaghi qoda qhi pesu anikeno pishiqhiluve keu timi ulono pa susholuve tsulo. Nonguno tipau shimo aye, nonguno alhoksa shikeu huno ami pinhemlakeu toi iloghu kighide iqu auvepe nani.

¹³No, Jerusalem ye akhila shou qhemghai iqa ani, aqalo atuqu ipeghi akeshi ani. Ikemu ino oshou aghushini. Nono pikeuno khunomu olemla nani momu nono susho kepushikeu hepho iloghi mla nani pike.

¹⁴Ikemu nono kiu shipuani keno tipau ghenguno ino oghimeqhi nani. Ino okighikiqolo ami sutsu nani eno tipau sukumxalo akeu kumtsu amino pitileqhive nani. Ni, AMPEU no piqhiveake.”