Read Sumi Naga JEREMIYA 22 Bible Online

JEREMIYA 22 - Sumi Naga bible

JEREMIYA 22

¹AMPEU no ivilo David laghami Juda lo akukau ki kuloghilo wulo pike,

²tilano akukau ngo, pawu kijemi eno Jerusalem lo akemiqo vilo AMPEU no pikeu inipe nike pilo pike:

³“Ni, AMPEU no nongu vilo kiuno achipiu eno amikucho keno tipau shilopi ahza tsuke. Pukaluvekeu launo pukaluvetsu keu timi hu susholu lo. Inaghami, mighimghaqo momu chimemiqo peithapusa momu qodaqhi kevilo; eno akimthe-a hipaulo pimipuamo kemi heqhi pithi kevilo.

⁴Nonguno kuchouno ino ahza tsukeu shi aye tileno David laghamiqono kukami shi ache nani. Eno panonguye pano kijemiqo ngo timiqo kumtsa hipau ki kuloghi kikha kathasu khurkulu ngo khurshi shouno ipe ilo ache nani.

⁵Ikemu nonguno ino ahza tsukeu pelumo aye ino nongu vilo ashoqhi shive anike akighiki hipauye ixapiniyive nani. Ni, AMPEU no piqhive anike.

⁶“Ighenguye Juda lo kukami kighikiye Gilead yeghi ngo Libanon naghuto toi ajukivike; ikemu ino tipau pesu timi khunomu ngomovekeu kughukughalei keu a lakhi shivetsu nani.

⁷Tipau kutsavepe nike ino timi puwuni cheni. Panongu kumtsuno pututa mughu sughi nani eno kedar suno shikeu jukighilepu tsukuchoqo ghichheqhi puzu amilo tipaqo vesuve nani.

⁸“Hithiuno inaghami kutomono tipau vechesu wuche kelo lakhino lakhi vilo kushiye ni, AMPEU ye aphughi kuloghi hipau shou hikithipu shivetsu kelapi inijukile nani.

⁹Tileno panonguno ishi khochilekile nanike, ‘Kughengu Juda lo akemiqono AMPEU panoqo Lhou sasu puloshoqhi shikeu pheveke eno kutau lhouqo mllawuve eno tipaqo qeuve kehue.’ ”

¹⁰Juda lo akemiqo, Akukau Josiya ghenguno qah kevilo; pano thivekeulo mloqa kevilo. Ikemu panu Joahaz ghenguno itapini mloqalo; panonguno pa sasu wucheni, khilemu ideghi pemo nanike, pa punukeu ghakhu khilemu ithulukithe pemo nanike.

¹¹Josiya nu Joahaz, khuuno papu shelo Juda lo akukau shi-ghi qhusulukeno, AMPEU no pa ghenguno hipau pike, “Paye hileno wuveake.

¹²Panoqono pa sawuvekeu yeghi lono paye thive nani eno paye khilemu aghakhu hipau ithulu kithemo nani.”

¹³Khuuno kuchou kumo pesu paki shipuku acheni, eno achipikumo pesu tipau pekho cheni keno pa hasapuke; timi khuno panowu timiqo pelo adou lono mla chenipe, eno panoqo jume tsuchemo keno pa hasapuke.

¹⁴Khuuno, “Niye isala aki kuloghi lakhi shipuzu kunguu jolha achebo ililaikeu shini,” ipi keno pa hasapuke. Ikehu timi tipauno pa kilo alashe shepeqhi, kedarsu pesu tipau lashe shi, eno huchuikeu ta pesu nudake.

¹⁵Nono kedar pesu kutami ki nguno jukiviushi aki shikeu lono noye akukau akiviu shiluve anipe kema? Opuye akuxu chhikhoyi xuke. Paye pulhapujulo achipiu eno aghibiu shicheke eno pano shikeu kumtsulo alokepu shicheke.

¹⁶Pano kumlhomi ngo kuhakemi ghenguno aghibiu xakutha tsuche ke eno paye thwokhalo akivishi aluke. AMPEU ithikeu kiqiye tipau pesu pichenike.

¹⁷Ikemu noye olikhi osala phukeu lo likhi amlo tsuke; kiumu pimimokemi nono pithive cheni eno owu timiqo heqhi buqhi qoda cheni. AMPEU no piveake.

¹⁸Tighenguno Juda kukau, Josiya nu Johoiakim ghenguno AMPEU no piani, “Timi lakhimu pa kithilo mloqamo nani, momu ‘Kishi akumsapu kela, ishou, kishi akumsa- pu kela’ ipi pimo nani. Timi lakhimu pa ghenguno qamo momu, ‘Impeu! Ikukau!’ ipi ighamukumo nanike.

¹⁹Gadaha kumo qhokelo shichekeu toi paye sunhekiti sawuve nani eno Jerusalem khagho khalau vepheve nani.”

²⁰Jerusalem lo akemiqo, Libanon lo wulo eno ighalo, Bashan ghakhu lo wulo eno ighamukulo; Muab naghutoqo lono kujulo, kughengu ogholo kuqha akemi kumtsu leluvae.

²¹Nono kinikulu shi acheke lono AMPEU no oputsake, ikemu nonguno initsumoveke. Tiye nongu kuxu kupujulo tipau mla acheni; nonguye khilemu AMPEU gholu chemoke.

²²Nowu sakiphemiqoye amlhuno fupewuve nani, no gholo kuqha achekemiqoye aghushi lono kughalu khavekemi shi sawuve nani, nophughiye jukusapu shiveno kujovepe nani kughengu nonguno alhoksa kumtsu shike.

²³Libanon kudauno Kedar sughikeu gholo nonguno sushokulushi ngo cheke; ikemu kughono akusupuno nongu hekuluni keno nonguye amlo kiyighipu shi nani, sakutukeu tiye totimino apunu kusu shiake toi nani.

²⁴AMPEU no Juda lo akukau Jehoiakim nu Jehoiachin vilo pi, “Niye kucho kuchono xuakeu Lhou ke, Noye iu ajeu jedapu ulotikukha shianamu ino otujove nani

²⁵eno opithivenishi achekemi eno nono musa achekemiqo tsuve nani. Ino okugha pesu Babilon kukau Nebudadnezar ngo pawu ghushimiqo lau tsuve nani.

²⁶Ino anguka lono no eno oza okujo pesu hakughutsuve nani. Okujo khuumu punumokeu yeghilo puwuve nani eno okujo kinikujo tilauno thive nani.

²⁷Noye aghakhu hipau ithulu kithenishi kutu nani ikemu noye khilemu ideghimo nani.”

²⁸Ino pike, “Akukau Jehoiachin ye ayeghili kubove no peveke toi khunomu lumove nani kesha? Tighenguno paye pa tianuli sasu panonguno kitilamu mtha keu yeghilo hale sawuvepe kesha?”

²⁹O aghakhuo, aghakhuo, aghakhuo! AMPEU no kiu piani keno initsulo:

³⁰“Timi hipauye pa tianuli puhakhave penikeushi peveake, timi hipau ye khilemu kalu pemo nikeu shiani. Paye Juda lo David qhusulukemi shikulupu atikughukomi kuha nani. Ni, AMPEU no piqhiveake.”