Read Sumi Naga JEREMIYA 25 Bible Online

JEREMIYA 25 - Sumi Naga bible

JEREMIYA 25

¹Josiya nu Jehoiakim no Juda lo akukau shikeu ampe abidiulo, AMPEU launo ino atsape lakhi ithulu, tiye Juda lo akemi ghengunoke. (Hiye Nebukadnezar no Babilon lo akukau shikeu ampe atughiu loke.)

²Ino Juda ngo Jerusalem lo akemi vilo pike,

³“Amun nu Josiya no Juda lo akukau shikeu mpe chighi akuthuu lono ishi tsala kutolo, hi ampe muku kuthu dolo AMPEU no iputsa ke eno pano ivilo kiu pikeno niye khilemu nongu vilo pimovekeu shipuamoe. Ikemu nonguno amlo tsuqhiyikeu kuhae.

⁴AMPEU ye pa qemi tungkupmi nongu lau puwutsu acheni kemu nonguno initsumo momu amlo tsuqhiyimoe.

⁵Panonguno nongu vilo kixikila kuxu laghi lono eno alhoksa kumla shiakeu lono tsughu ighive penike nongu vilo picheke tishianguno alhokupuju mheghipu shi AMPEU no nongu eno nopuasu tsukeu yeghilo xualu kepu shilupeniyeke.

⁶Panonguno nongu vilo kutau lhouqo mllamoni keu eno qemonikeu pitsuke, eno nonguno ajulho mlape qhikeu mllakeu lono AMPEU loghu shipemo niyeke. Nonguno AMPEU gholuke aye paye nongu ghimeqhini chemoke.

⁷Ikemu AMPEU ampino pianike nonguno pa tsa initsumoe pike. Tishinike zuqhulo, nongu su-atu julhono pa mlo shikighideve tsuke eno nolikhi noshou aghimepu sughiveke.”

⁸“Nonguno pa tsa initsumoke ghenguno Akughushu MPEU no piani,

⁹‘Niye timiqo ghenguno ashiayeh ahuu akeqo kupuwuni cheni eno Babilon lo akukau iqeu Nebukadnezar kupuwuni cheni. Ino panoqo pelo Juda ngo tile akemiqo eno tipau cheaxulo ashiayeh akeqo sasu aghushi penike ino panoqo sasu ighini cheni. Niye ashiayeh hipau eno hipau cheaxulo akemiqo kutsanike ighini cheni eno panoqoye alhokupujulo hexapinyi qhive nani, akumsapu eno jukichi kepu shipe nani. Ni, AMPEU no piqhive anike.

¹⁰Panoqono alokivi shi eno amlo kiqishi ighakeu sutsa eno kulakupu ghulhu lokivi sutsa kumtsu ino hasuve nani. Panoqo kululo sukepu amizu kuhave nani eno athi kiumu kuhave nani.

¹¹Hipau yeghiqha kumtsu ixapiniyi qhive nani eno jukichi kepu shive nani, acheaxulo akeu shiayehqoye ampe lhotsuni ghenguno Babilon kukau qe nani.

¹²Tipathiuno Babilon ngo tipau kukau ngo ishi panoqo xine ghenguno ino aghime tsu nani. Ino tipau ghakhuqha kutsapiniyive tsu nani eno tiye alhokupujulo ixapiniyi qhivetsu nani.

¹³Kughou ino Jeremiya vechewo kaku hipaulo kutsakungokeu yekutsu puakeu kumtsu pipuatsu akeno, ashiayehqo shou kutsakungo sughinikeu shi ino kichipua keqo kumtsu pesu Babilon ghimeqhi nani.

¹⁴Babilonmi no kiu mlapuani keno tipau ino panoqo lochile nani eno ashiayeh kutomono eno kukami kijemino panoqo kughape aquaxemi shipe nani!’ ”

¹⁵AMPEU, Israil Lhou no ivilo pike, “Hilau aji jukhu lakhi iloghu kighideno chhitoi ani. Khuno shiayeh lau ino opuwuni keno tipaqo kumtsu lau hipau pewulo, panoqo pelo tipaulo akeu shopelo.

¹⁶Kughou panonguno tipaulo akeu shoni keno panonguye hevulalaive nani eno panoqo kukumsu ipokhave nani kughengu ino panoqo shou aghukishi puwuni cheni.”

¹⁷Ike ino AMPEU ulono ajukhu ikhiluve puzu AMPEU no khunoqo lau ipuwu keno tipaqo shiayeh kumtsu tipau tsuke eno panoqo pelo tipau shope.

¹⁸Jerusalem ngo Juda lo taun akeqo kumtsu eno tipaqolo kukami ngo sakiphemi akeqo pelo tipau shope nani, tishianguno tipaqoye kughu-kughalei timi kughunamove pe nani, akumsapu eno jukichi kepuke, tishianguno itehi kutolo timino panoqo je pesu musuinikeulo peithake.

¹⁹Kutami khunoqono ajukhu lono shokepu shikeno tipaqo kumtsu je hitoi apasu shi ani: Ijip kukau eno pawu kijemi eno sakiphemiqo; Ijipmi eno inaghami Ijip lo akemi kumtsu Uz ghakhulo kukami kumtsu; Filistiyami phughi Ashkelon, Gaza, Ekron eno Ashdod lo ghupe puaghi keqolo kukami kumtsu; Edan ngo Muab eno Amun lo akemi kumtsu; Tur ngo Sidon lo kukami kumtsu; Meditereniya sukumxa yeghilo kukami kumtsu; Dedan, Tema eno Buz phughiqo; Timi khunoqono asa ikhonhei tsave cheni keno tipaqo kumtsu; Arabia lo kukami kumtsu; Asayeqhalo akeu shiayehqo shou kukami kumtsu Zimri, Elam eno Media lo kukami kumtsu; Kukami ahuu, putou eno akupunu lo lakhino lakhi shelo akeu kumtsu. Ayeghiqhalo ashiayeh akemi lakhikhino tipau jukhu lono shokepu shinani. Ashekhashi Babilon kukauno tipau sho nani.

²⁷Tileno AMPEU no ivilo pike, “Timi vilo pilo, Aqokitikhi MPEU, Israil Lhou no panonguye shomzu mughulemo ke kutolo shopenike, panonguno veqhiveno ithughimlake kutolo shopenike panoqo ahza tsu ani, kughengu panoqo shou ino aghukishi puwuni cheni.

²⁸Panonguno aulono ajukhu ikhilu tsumopi aye eno tipau shomo piaye tileno panoqo vilo Aqokitikhi MPEU no pikeuno panonguye tipau lono shoni aphike pilo.

²⁹Aphughi lono ino kutsaleve nikeu kumla huthuni cheni. Panonguye ghimeqhimoveno wuluve nani kepi kumsu ani kesha? Moe, panonguye ghimeqhi nani, kughengu ayeghilo akemi kumtsu shou ino aghukishi puwuni cheni. Ni, Aqokitikhi MPEU no piqhiveake.

³⁰“No Jeremiya ye ino pivekeu kumtsu pesu asheshu masa. Noye timi hipaqo vilo ishi pilo, ‘AMPEU no kungugha kudauno ighamuku ani eno kungugha kuchuqu lono tsutsu su nani. Pano pawu timiqo shou ighapuku nani; paye timi lakhi atsayithi qole akelo toi ighamuku nani. Ayeghi shou akemi kumtsu tipau chilu nani.

³¹tipau sutsaye ayeghi shekha kutolo vekuvava nanike. AMPEU no ashiayehqo shou kughakepu lakhi ani. Pano timi kumtsu shou kughajunike saghi nani eno kusakughamiye pithive nani. AMPEU no piqhiveake.’ ”

³²Aqokitikhi MPEU no piani: Julo, kutsakungo keuye ashiayeh lakhi launo lakhi shelo cheni eno pasapagha kije lakhi ayeghi shekha kudauno hekutsu ani.

³³Tipa tsalalo AMPEU no ghiqhile kemiqo sukumono ayeghi shekha lakhi lono lakhi kutolo nhakhawo nani. Khunomu panoqo ghenguno mloqamo nani eno panonguye pesuwo qhokepu shimo nani. Panonguye xinexigha xukutsupe puakeshi ayeghilo dapesu anani.

³⁴Ighilo, nongu sakiphemiqo, nongu iwu timi khemiqo, ighamukulo! Mloqalo eno ayeghi mukhulo ihilo. Ningu ghiqhive kepu do ighiveake, nonguye bheritsu toi ghiqhile khave nani.

³⁵Nongu ihjelukepu-a kuha nani momu polukepu laghi kuha nani.

³⁶Nonguno amlo kusashi igha mloqake.

³⁷Kughengu AMPEU no pa loghu kighide lono noshiayeh kutsaleve eno noghakhu iqunei achekeu huye ixapiniyi qhiveake.

³⁸AMPEU ye abongushuno pa tukiqhiveke toi pawu timiqo qhivae. Aghukishilo kumsa kimshipu ngo AMPEU loghu kighideno ayeghi pesu asayeqha kughulhovetsu ake.