Read Sumi Naga JEREMIYA 28 Bible Online

JEREMIYA 28 - Sumi Naga bible

JEREMIYA 28

¹Tipa mpelo, tiye Zedekiya no akukau shikeu mpe abidiu aqhi apunguulo, Gibeon taun lono tungkupu lakhi Azur nu Hananiya no Achineki lono iputsake. Achinemi ngo timiqo nhekithe lono pano ivilo pikeuno

²Aqokitikhi MPEU, Israil Lhou no ishi pa vilo piepike: “Ino Babilon kukau kumto hepholeve tsuake.

³Ampe kini dolono Akukau Nebukadnezar no Babilon lo puwuve keu achinekilo akini pekutsu puachekeu kumtsu hipa-alo suchile sughive nani.

⁴Ino Juda kukau Jehoiakim nu Jehoiachin ngo pa gholo Juda lo akemi khije Babilon lo halesawuve keno tipaqo ghi sachile saghi nani. Iye, ino Babilon kukau kuka kumto kubolevetsu nani. Ni, AMPEU no piqhiveake.”

⁵Tileno achinemi ngo Achinekilo timi puthugho akemi kumtsu nhekithe lono ino Hananiya vilo pike:

⁶“Akumzapuke! AMPEU no tipau shinikeu niye laju anike! Niye nono tungkuptsa pikeu kuchou shi pano shitsu penike niye laju anike, Babilon kudauno achinekilo akini pekutsu puakeu kumtsu eno timi khijehi akughumi shi sawuve keno tipaqo kumtsu sachile saghi penike.

⁷Ikemu nongu vilo ngo timiqo vilo ino kiu pikeno initsulo.

⁸Tungkupmi khunoqono ighuloki eno nongu ghuloki ighinikeu ado-kushuwa chephi lono aghukishi, akhuava eno kusukini ashiayeh lau eno akukaqha akuka-kumto shi kakeqo lau ighini chekeu ashe-azu tsa shi pipuani.

⁹Ikemu tungkupmi khuno iquighai keu ashe-azu tsa pinikeno tipauye kuchouno AMPEU no puwu puani keo mokeno kimchilu nikeuye pano ashe-azu tsa pikeu shikupu keu lonoke.”

¹⁰Tileno Hananiya no ikuo lono kuokhasu ikhiluveno tipau hechhe pinyive,

¹¹timi kumtsu nhekithe lono ishipi, “AMPEU no pike hikithipushi kuokhasu khipaqo Nebukadnezar no ashiayehqo kuolo pipekeno AMPEU no hechheve nani ke, eno ampe kini dolono pano hipau shi nani ke.” Tipathiu niye cheve.

¹²Hananiya tungkupuno Jeremiya kuo lono kuokhasu ikhipe kuboleveo ado kushuwa kumo thiu AMPEU tsa Jeremiya lau ishi ighi:

¹³“Wulo eno Hananiya vilo pilo. AMPEU no pike, Noye asuno shikeu kuokhasu kubolevae, ikemu ino tipau zuqhulo ayino shikeu kuokhasu shitsu nani.

¹⁴AMPEU Akughushuu, Israil Lhou no pike pano ayi kuokhasu pesu ashiayeh hipaqo kumtsu shou pipe nani eno panonguno Babilon kukau Nebukadnezar qe nani, kughengu ino aluzalo tughashi ghi pa qe penikeu shi pa tsuvae!”

¹⁵Tileno ino tipau pesu Hananiya vilo pi eno highi pikuqhatsuke, “Hananiya, inilo! AMPEU ye opuwu puamoe, noye timi hipaqo pelo akimki pulu anipeke.

¹⁶Tighenguno AMPEU ampino pike pano noikhiveni cheni. Hipau mipe wokha mphi lono noye thive nani kughengu timiqo pelo AMPEU shou hebide penike nono pianike.”

¹⁷Ike Hananiya ye tipa mipelo aqhi akutsuniu lono thiveke.