Read Sumi Naga JEREMIYA 29 Bible Online

JEREMIYA 29 - Sumi Naga bible

JEREMIYA 29

¹Ino achinemi, tungkupmi, sakiphemi eno kutami khunoqo Nebukadnezar no Jerusalem lono Babilon lo akughumi shi kughasawuve keno tipaqo lau yekili lakhi puwu.

²Ino tipau yekeuye Akukau Jehoiachin, paza, kukakilo kijemi, Juda ngo Jerusalem lo sakiphemi, atshamgha kishimi eno akumla shitsami akughushi sawuve kethiunoke.

³Yekili tipauye Safan nu Elasa ngo Hilkiya nu Gemariya tsupuwuke. Pamaye Juda lo Akukau Zedekiya no Babilon lo akukau Nebukadnezar lau puwuniye aghike. Yekililo hitoi yeke:

⁴“Aqokitikhi MPEU, Israil Lhou no Nebukadnezar pelo Jerusalem lono Babilon lo akughumi shi sawuve peniye pano pulovetsu kemi timiqo kumtsu lau pi ani:

⁵‘Aki shino ngolulo. Aghutu shino tipaqolo ipeghikeu chululo.

⁶Kulakupu shino atianuli lholo. Tishipuzu nongu tianuli pelo kulakupu shipelo, tishianguno panongu ghi atianuli aluve kepu shipelo. Nonguye alau shi ikowoni thono kimkheve kepu kumoke.

⁷Ino khilehi nongu pesu akughumi shipuwu keno tipaqo phughi kivipu shi mulaithalo. Tipanoqo ghenguno ivilo khuinilo kughengu panonguno kinikulu shilu aye nongu ghi kinikulu shive nanike.

⁸Ni, AMPEU, Israil Lhou no nongu lau kutughuveake nonguye tungkupmi nongu gholo akeqo momu kutami khuu khumu panonguno ighinikeu vehu ashe-azu tsa pilu cheni kepi pichekemiqo pelo nongu pishiqhivepe kevilo. Panonguno asamo pumokeulo amlo tsukevilo.

⁹Panonguye ije lono akimki tsa pianike. Niye panoqo puwu puamoe Ni, AMPEU no piqhi anike!

¹⁰“AMPEU no pianike, ‘Kughono Babilon lo wukeu ampe lhotsuni kupuveni keno ino nongu ghenguno alokumsu anani eno noyeghilo nongu saideghini ke ishoqhi penani.

¹¹Nongu ghenguno kughu puakeu nongu lau kutsakungo keu kumo puzu kinikulu sughinikeu, nonguno ighini keulo laju achekeu sughi tsunikeu kughu puakeqo ilikhino ithi ani.

¹²Tileno nonguno iku ighi nani. Nonguno ighino ivilo khuini nani eno ino khochile nani.

¹³Nonguno ipunu ighino iphulu nani, kughengu nonguno amlo kuchopu pe ipunu ighi nani.

¹⁴Iye, ino piani, nonguno iphulu nani eno ino noyeghilo nongu sachilesawo qhi nani. Ino khile nongu hale puwuve keno tipaqo-a kumtsu lono, tipaqo ghakhu lono ino nongu hekutsu kumqo nani, eno khipa yeghi lono ino nongu hapupove keno tilau ino nongu sachile saghi nani. Ni, AMPEU no piqhiveake!’

¹⁵“Nonguno pikeuno Babilon lo AMPEU no tungkupmi nongu tsukeu ghili piani.

¹⁶Akukau khuno David no kachekeu kukaqha shou ka ani eno tipau phughilo akemiqo ghili AMPEU no kiu piani keno inilo; tiye nosholokumi khunoqo nongu gholo akughumi shisusu wumove keqo ghilike.

¹⁷Aqokitikhi MPEU no piani, ‘Ino aghukishi, akhuava eno kusukini panoqo shou sughini cheni, ino panoqo pesu khughuthi tsuwuve puzu chumlavekeu toi shitsuni cheni.

¹⁸Ino aghukishi, akhuava eno kusukini pesu panoqo hakuqoni cheni, ayeghiqhalo ashiayeh akeqo kumtsuno tipau ithulukelo kichimamave nani. Khipaqhalo ino panoqo halepuwuni keno, panoqo shou kiu shivekeno tipaulo timiqono jukichive eno musave nani. Timino panoqo thaigha nani eno panongu je pesu musuini keu lakhi shi peitha nani.

¹⁹Panoqo shou hipau shinani putsake kughengu ino panoqo lau iqemi, tungkupmi vechewo atsape puwu achekeu panonguno agholumoke. Panonguno initsumoke.

²⁰Nongu khunoqomi ino Babilon lo halepuwuve keno nongu kumtsu ni, AMPEU no kiu piani keno inilo!

²¹“Aqokitikhi MPEU, Israil Lhou no Kolaiya nu Ahab ngo Maaseiya nu Zedekiya pama ghili piveake, pamaye nongu vilo paje lono akimki tsa piani. Pano pive ake pano hipama pesu Babilon lo Akukau Nebukadnezar ulo suvetsuni cheni eno nongu gizu lono pano pama pithive nani.

²²Kughono timi khunoqo Jerusalem lono Babilon lo akughumi shi sawuve keqono kutami shou musuini pukunishi nikeno, panonguno ishi pinani, ‘Zedekiya ngo Ahab pama Babilon kukauno akuxu ghiqhi pithive keshi AMPEU no okutotsu peni!’

²³Panongu kuxuye tishive nanike kughengu panonguye axine lhoksa shivekeu lono kuquvae, panonguno salhashupuke eno AMPEU jelono akimki tsa pike. Hiye AMPEU pulou kumoke; panonguno kiu shive keno pano ithi ani eno pano panoqo shou thopiu ke. AMPEU no piqhive ake.”

²⁴Aqokitikhi MPEU, Israil Lhou no Nehelam ghami Shemaiya ghenguno atsape lakhi itsuke, pano pa likhi paje lono Jerusalem lo akemiqo lau eno Maaseiya nu achineu Zefania lau eno achinemi kutamiqo lau yekili lakhi tsupuwuke. Yesu hipaulo Shemaiya no Zefania lau ishi yeke:

²⁶“AMPEU no Jehoiada zuqhulo opelo achineu shipeke! itehi noye Achinekilo kijemi atou shianike. Okumlapu sajeye kughuzumi khijeno tungkupmi lakhi kepi amuqukini tsa pini keno tipaqoye ayikichhe pesu tshu puzu pa kuolo ayikuo kukha pipe kepuke.

²⁷Nonguye kushiye Anathotmi Jeremiya, paye tungkupu lakhi kepi timiqo putsa achekeu pesu tishivetsumo kya?

²⁸Pa lakhave masake kughengu pano Babilon lo akemiqo vilo panonguye tilau ado kushuwa akughumi shi anani eno akialu shipuzu ngolu, aghutulo axathi pighilu eno tipaqo lono ipeghikeu chulopi pipuanike.”

²⁹Zefania no yekili tipau phi ipiye,

³⁰ike tileno AMPEU no ivilo

³¹Babilon lo akughumiqo lau Shemaiya ghili hipau pesu tsupuwulo pi pike:” Ni, AMPEU no Shemaiya ngo pa laghami kumtsu ghimeqhi nani. Niye pa puwu puamoe ikeghi paye tungkupmi lakhi toi nongu putsa ke eno panongu pelo akimki pulu peke.

³²Paye nongu gholo alimi alagha kuha nani. Paye ino iwu timiqo ghenguno akivi jeli mlaniye akeu ithulumono thive nani, kughengu pano panoqo pelo ihebide penikeu pitsuke. Ni, AMPEU no piqhivae.”