Read Sumi Naga JEREMIYA 30 Bible Online

JEREMIYA 30 - Sumi Naga bible

JEREMIYA 30

¹AMPEU, Israil Lhou no atsape itsuke:

²“Ino ovilo pivekeu jeli kumtsu kaku lakhilo yepe qhivelo.

³Kughengu ino iwu timi Israil ngo Judami sachile saghinikeu ghuloki wochenike. Ino panoqo puasu tsukeu yeghilo panoqo saideghi nani eno panonguno tipau pighicheuve nani. Ni, AMPEU no piveake.”

⁴AMPEU no Israil ngo Juda lo akemi ghenguno pikeu tsake:

⁵“AMPEU no ishi piani: Ino vekuchokile keu ghugha lakhi chiluvae, akumsapu sutsa eno iquighaikeu sutsa.

⁶Itehiye ngovelo eno kumsujulo! kiptimi lakhiye anga punulu nani kesha? Tishiaye kushiye timi kumtsuno pau pesu achita tsuqupesu totimino pununiye suake shi ani kya? Kushiye timi kumtsu ighono phalai ani kya?

⁷Aha! Atsala tipauye akumsapuke; tipa tsalaye kiunomu kimighimla keu tsalake; tiye iwu timiqo ghenguno shilukusa aghime ghulokike, ikemu panongu puxutsu nani.”

⁸Aqokitikhi MPEU no piani: “Kughono tipa tsala ighini keno panoqo kuolo kuokhasu veho puakeu ino kuboleve tsu nani eno panoqo yikichhe ikhivetsu nani, eno panonguye khilemu inaghami quaxemi shimo nani.

⁹Tishinike zuqhulo, panonguno ni, AMPEU panoqo Lhou qe nani eno David laghami lakhi pesu akukau shipe nike ino kughuqa nani.”

¹⁰“Iwu timiqo, musa kevilo; Israil lo akemiqo, musa ichhive kevilo. Nonguno putosuu akughushi achekeu yeghi kudauno ino nongu xaphe saghi nani. Nonguye noghakhulo ideighi nani eno alokughuno shi xu nani; Nonguye sushokululo anani eno khunomu nongu shikumsamo nani.”

¹¹“Ino nongu lau ighino nongu xalu nani. Ino khilehi nongu halepuwuve keno tipaqo shiayeh kumtsu ino kutsaleve nani, ikemu niye nongu kutsale vemo nani. Niye nongu ghimemono puwuvemo nani; ikemu ino nongu ghimeqhi keulo aghibiu lono shi nani.”

¹²AMPEU no pawu timiqo vilo piani, “Nongu ghuzakuye shipivikulupu kumoe, nonguno ghuza ghugha shilukeuye vilumo nani.

¹³Nongu tucho hijuni kemi milakhimu kuhae, nongu piyiye vikulupu kuha ke, nongu ghengu shipivi kepu lakujupu kuhae.

¹⁴Olojipumi kumtsuno okumsumavae; panonguye kiumu nongu hijuni chemoke. Ino aghumi lakhi toi shipuzu nongu haqhike; nonguye mughachhoi keu lono ghimeqhike eno nongu lhoksaye kijeke.

¹⁵Nongu ghuza ghugha ghenguno muchho kithe kevilo, nongu ghenguno shikipivi kuhae. Ino hitoi nongu ghimeqhi kughengu nongu xineye kutomo eno nongu lhoksaye kijeke.

¹⁶Ikemu itehiye, nongu tsukuchumi kumtsu tsuchukhave nani, eno noghumi kumtsu akughumi shi sawuve nani. Nongu qoda chekemi kumtsu qoda qhive nani, nongu xulepu wuve kemiqo kumtsu xulepu wuve nani.

¹⁷Ino nongu pelo itaghi vithaivepe nani; Ino nongu ghuzaqo shipivi nani, noghumiqono ishi piaghi pinamu: ‘Zion ye haphevekeu lakhike; khunomu li tucho hijumoke!’ Ni, AMPEU no piveake.”

¹⁸AMPEU no piani, “Ino iwu timiqo pano yeghilo sachilesaghini eno akibokumtsu shou kimiyeqhiyi nani. Jerusalem ye shiqhe kitheve nani, tipaulo kukami kiye thosulo toive nani.

¹⁹Timi khunoqono tilehi xuacheni keno shekiqhe lephe nani; Panonguno alokivi launo igha asheshu nani. Ikukumgha vechewo panonguye timi lhoxu ikowoluve nani; ikukumghano agigihupu panoqo lau sughitsu nani.

²⁰Iwu timiqo shiayeh kha-ghi kuka ino tsuchile nani eno tipau itaghi mutotoi qhi nani; Panoqo qodaneda kemi kumtsu ino ghimeqhini.

²¹Panoqo shou ayehkipeuye panoqo shiayeh lono ighi nani, pano sakipheuye pano timi gholono ipeghi nani. Ino pa kukusu shikelo pano ikupunu ighi nani, kughengu khuno kukusu shimoamu ighikeu ighumoni kya?

²²Panonguye iwu timi shive nani eno ino panoqo Lhou shive nani. Ni, AMPEU no piqhive ake.”

²³AMPEU loghu kighideye pasapagha lakhi, amlhu kumgha lakhike, alhoksa kumlami kutsu shou muqhumuzai nanike.

²⁴Hiye pano kiu shinikeu shi kumsupu ani keno shi khavemoke kutolo tiye ashekha shimo nani. Ighinikeu tsala lo paw timiqono hipau mutsumishei vethaluve nani.