Read Sumi Naga JEREMIYA 32 Bible Online

JEREMIYA 32 - Sumi Naga bible

JEREMIYA 32

¹Zedekiya no Juda lo akukau shikeu mpe achighiu lo AMPEU no iputsake, tiye Babilon lo ghi Nebukadnezar no akukau shikeu ampe chighi akutacheu shiake.

²Tipa ghulokilo Babilon kukau ghushimino Jerusalem leighi ake eno niye akukau kikuloghi bokutha bocholo ikhathasupe puake.

³Akukau Zedekiya no tilehi ikughape akughu shive eno AMPEU no ishi pikeu ino pesu asheshukeu ghenguno ihakhake, tiye: “Ino Babilon kukau pelo aphughi hipau leluve peni cheni,

⁴eno Akukau Zedekiya ye pomla nani. Paye Babilon kukau ulo phesuve tsuni cheni; pano tipau kukau sasu agi kinheqhi kushono ampino kuptsa nani.

⁵Zedekiya ye Babilon lo sawuve nani eno ino pa peithamoke kutolo paye tilau ache nani. Pano Babilon sasu aghushie pinamu tomla nani. Ni, AMPEU no piqhiveake.”

⁶AMPEU tsa ilau ighikeuno

⁷ipu Shalum nu Hanamel ye ilau ighini chenike tiye Benjamin lughi bocholo Anathot phulo pa lu akeu qhulu penike iqhuinijuniyeke, kughengu niye pa sholokumi eno tipau qhulu kuzupu ayehlo achipike.

⁸Tileno AMPEU no pike toi Hanamel no tilehi kughatha chekeu bocho akeulo ighino ivilo alu qhuluvelo pike. Ikehu AMPEU no kuchouno iputsa kepi ino ithive.

⁹Ino Hanamel launo alu qhuluve eno pisa kihi pesu pa tsu; tiye tsandiyi chighi tsuni me shiaghike.

¹⁰Kughathalu keulo ino jemichi shipukuve, tipau mekhave eno thopimi saghi puzu akimighipu lono pisa mighivetsu.

¹¹Tipathiu qhukeu kughakutha kaku, mekhave keu kaku alou eno lhapesu akeulo pulokilevekeu ngo peithawoni keu ghola akeu kini kujo

¹²ikhipesu Neriya nu Baruk tsuveke, pasuye Mahesiya. Ino tipaqo pesu Hanamel ngo qhuakelo kughathatsu kemi thopimi ngo kughakutha bocholo iqa akemiqo nhekithe lono Baruk tsuveke.

¹³Timi tipaqo kumtsu gizu lono ino Baruk vilo pike,

¹⁴“Aqokitikhi MPEU, Israil Lhou no ahza otsu akeuno kughakutha kakuqo hi mekha puakeu ngo lhape puakeu kaku kini kujo ikhilu puzu ayeghililo supe qhilo, tishianguno tipaqoye ampe kushuwa kutsupe qhike pushi.

¹⁵Aqokitikhi MPEU, Israil Lhou no pikeuno hipau yeghilo itaghi aki alu eno atsayili kuqhukili shinanike.”

¹⁶Qhuluvekeu kughathalu keu kaku Baruk lau tsuve kethiu ino ishi inikhu,

¹⁷“AMPEU Alhou, nono okuka kije eno okumto pesu ayeghi ngo atsutsu mlake; oghenguye kiumu kupunakeu kuhae.

¹⁸Nono iqemokeu kikimiye qhethonhe lau piye puanike, ikemu noye apuaza xine ghenguno ghi timiqo ghimeqhi cheni. Noye kije eno akuka akeu Lhou ke; noye Aqokitikhi MPEU ke.

¹⁹Nono alokutsushi kughu cheni eno akumzapu kumla shi cheni; timino shikeu jeli thwokha nono ithuluke eno panongu kumla kiqi lono nono asaxu tsu cheni.

²⁰Kha-ghi nono Ijip lo akumzapu eno amichipu kumla mlaqhi puani, ishi tsala kutolo Israil lo ngo ashiayeh kutami gholo nono tipaqo shi acheni, tishianguno itehiye aqha kumtsulo no ithi anipeke.

²¹Akumzapu eno amichipu kumla peitha puzu nighumi shikumsake, nono okuka ngo okumto peitha puzu Ijip lono owu timi Israil saipeghike.

²²Nono panoqo puasu lau tushoqhive ketoi nono aghuma eno akini kua yeghi hipau panoqo tsuke.

²³Ikemu kughou panonguno ayeghi hipaulo iloghi eno hipau amheghi shiluve keno, panonguye nono ahza tsukeu gholumove momu nono shikakeu kiqi lono xumove; nono panoqo pelo shipeniye ahza tsukeu panonguno kiumu shitsumoveke. Ikehu nono kutsakungokeu hipaqo kumtsu panoqo shou sughike.”

²⁴“Julo, Babilonmino lekepu yeghi toghi shipesu aphughi sumxavae, tipau leluveniyeke eno panonguno leanike. Aghukishi, akhuava eno kusukinino aphughi pesu panoqo ulo ikiqi iloveni cheni. Nono pivekeu kumtsu kuchou shi shikupu ighinike.

²⁵Tishimu AMPEU Alhou, nono ivilo thopimi nhekithe lono alu qhupenike ahza itsuke, aphughiye Babilon mino leluvenikeu shive keghi nono ahza itsuke.”

²⁶Tileno AMPEU no ivilo pi,

²⁷“Niye AMPEU ke, timi kumtsu Lhou ke. Ighenguno kiumu kushokutsupu kuhae.

²⁸Niye aphughi hipau pesu Babilon kukau Nebukadnezar ngo pawu aghushimi tsuve nikeu shiani; panonguno hipau leluve nani

²⁹eno ami pesu pitile nani. Panonguno tipau gholono aki kutau ghi pitile kuqha nani, timiqono aki kutsuqo lono Baal lau tsungquikeu ta pitikumna eno kutau lhouqo lau aji kumllagho leqhi tsukeu ghenguno imlo shikighideke.

³⁰Inahu abothu xughili lonomu Israil lo timiqo ngo Juda lo timiqono kiu mulaqhi keno tipauno imlo shikighide acheni iloshipusu achenike.

³¹Hipau phughi shiluveke tsala lono hile akemiqono ipelo aloghu ide ipelo muqhumuza achenipeke. Niye hipau kutsaveni keu shi xathavae.

³²Kughengu Juda ngo Jerusalem lo akemi ngo panoqo shou kukami eno sakiphemi, achinemi, tungkupmino alhoksa jeli kumtsu shichenike ghengunoke.

³³Panonguno azupo ilau kughopuwo veke eno ino panoqo shika piye apulaghi panonguno initsumo eno ithulumoke.

³⁴Panonguye imlla nike Achineki shipe qhipuakeulo thotsu panoqo wu niqhunilai keu su-atu julho pewo qhike eno achineki tipau kitiqeveke.

³⁵Panonguno Hinom Khila lo Baal lau eno panongu tianuliqo Molek lhou lau heqhi mllanike akipti-aqo mlape qhike. Niye hipau shipenike ahza tsupuamoe eno panonguye hikithipu shipuzu Juda lo timiqo pelo axine shipe nanike pikeu ikukumsulo pinamu iloghi moke.”

³⁶AMPEU, Israil Lhou no ivilo pike, “Jeremiya, timiqono piakeuno aghukishi, akhuava eno kusukinino aphughi hipau pelo Babilon kukau ulo ikiqi iloveni cheni kepi piani. Itehiye ino kutau kiu pikepushi ani keno inilo.

³⁷Ino iloghu kighide lono ayeghiqha khilehi panoqo hale puwuve keno tikudauno timiqo hekutsuni cheni eno hipa-alo panoqo sachile saghini cheni eno kiunomu kupuna pemono panoqoye hile kughuna peni cheni.

³⁸Tithiuye panonguno iwu timi shive nani eno ino panoqo Lhou shive nani.

³⁹Ino panoqo lau akuxulo akimijipu lakhi pesu tsu nani: ado kumtsulo igihunikeu, tiye panoqo kivipu eno panoqo laghami kivipu ghenguno.

⁴⁰Ino panoqo sasu lhokta puloshoqhi lakhi shi nani. Niye panoqo ghenguno akivipu kumla khilemu shitavemo nani, ino panoqo pelo amlo kuchopu pesu isumsape nani, tishikehu panonguye ilauno khilemu wuvemo nani.

⁴¹Niye panoqo ghenguno akivipu shikeulo izukuvupu shi nani eno hipau yeghilo panoqo pelo ithamono ngolupe nanike.

⁴²“Ino timi hipaqo shou kutsakungokeu hipau sughikeu kiqi lono ino thime kivi kumtsu tushoqhipua keu pesu panoqo tsuni cheni.

⁴³Timiqono piakeuno hipau yeghiye asayeqha khilehi timi momu tughashi xumlakeno tipau toivenikeu piani eno tiye Babilonmi lau tsuveni chenike piani. Ikemu hipau yeghilo itaghi alu qhunikeu shiani.

⁴⁴Timiqono tipaqo qhu nani eno kughakutha kaku yemichi shi, mekhave eno thopi shikeu shinani. Hiye Benjamin lughi bocho lono shini cheni, Jerusalem sukumxalo aphu akeqolo, Juda lo taun akeqolo eno atokujolo taun akeqolo, naghuto pukhu kuxalo eno Juda apeu kudaulo shini cheni. Ino timiqo pano yeghilo sachilesawo sunani. Ni, AMPEU no piqhiveake.”