Read Sumi Naga JEREMIYA 40 Bible Online

JEREMIYA 40 - Sumi Naga bible

JEREMIYA 40

¹Ahza kutsuu akijeu Nebuzaradan no Rama lo iphepuwuve kethiu AMPEU no iputsake. Nighi Jerusalem ngo Juda lo akemi kutamiqo kumtsu Babilon lo akughumi shi sawuveniye chekemiqo gholono ayikichhe pesu tshusasu wuke.

²Ahza kutsuu akijeuno ilikhi isawu puzu ivilo pi, “AMPEU oLhou no ayeghi hipauye kutsa kungoveni keu shi shikichi cheke

³eno itehiye pano shiniepi kiu pikeno tipau shivae. Hipaqo kumtsu shivekeuye kutau ghenguno kumono nowu timino AMPEU shou axine shive eno pa gholumoke.

⁴Itehiye, ino oulo ayikichhe pesu tshupuakeu kuqhovetsu ani eno ophepuwuve anike nono igholo Babilon kudau wunishi aye noye tishilu nani eno ino otucho hiju nanike. Ikemu nono wunishimo aye noye tishimasake kumoe. Aghakhuqha kumtsu khikhiu kishe lunishi keno oghoke eno khile khilemu nono wunishi keu alo wulu nanike.”

⁵Ino kiumu khochilemo kelauye [2] Nebuzaradan no pi, “Ahikam nu Gedaliya lau idewovelo, pasuye Shafan ke; Babilon kukauno pa pelo Juda lo taunqo shou ahng shipe qhipuanike. Noye pa gholo ngolu nani eno timiqo gholo xuachelo momu nono khile khilemu wukepushi kumsulukeulo wulu nanike.” Tishi puzu pano agho lakhi itsuke eno ipelo wuvepeke.

⁶Niye Mizpa lo Gedaliya gholo ngoniaye wuve eno aghakhulo timi aghikeqo gholo xuacheke.

⁷Judami kijemi ngo ghushimi khamiye qhoi liqhipe tsuvekeu shimove. Babilon kukauno Gedaliya pesu aghakhulo Ahng shivepekeu eno tipa ghakhulo kumlhomi khijehi Babilon lo sawumono qhivekeno tipaqo shou ampiu shipe nike Gedaliya pichevekeu panonguno chiluve.

⁸Ikehu Nathaniya nu Ishmael, Kareya nu Johanan, Tanhumet nu Seraiya eno Netofa lo Efayi nuliqo eno Maaka lo Jezaniya ishino panoqo wu timi sasu Mizpa lo Gedaliya lau wu.

⁹Gedaliya no panoqo vilo pi, “Ino itsa hipau nongu tsuanike nonguye Babilonmi lau qhoi liqhipe tsuvenikeu musaichi akepu kuhae. Hipau ghakhulo kughuna cheuvelo eno Babilon kukau qechelo tishiaye nongu ghenguno akivipu shi nanike.

¹⁰Ni ampino Mizpa lo ache nani eno Babilonmi tilau ighi aye ino nongu zuqhushi puthughotsu nanike. Ikemu nonguye atsayiji ngo axathi eno oliv teli pekutsu pesu kikelu nani eno nonguno akeu phulo xualu nani.”

¹¹Tishiakelo Muab, Amun, Edom eno ayeghi kutaulo Israilmi akeqono chilukeuye Babilon kukauno Israilmi khuu pelo Juda lo apeni keu pulovetsu eno pano Gedaliya pesu panoqo shou ahng shivepekeu chiluke.

¹²Ikehu panonguno khipa yeghilo apanagha povekeno tilauno idechile susu Juda lo ighi. Panonguno Mizpa lo Gedaliya lau ighi eno tile panonguye atsayiji ngo axathi kumzapu pekutsuluke.

¹³Hipathiu Johanan ngo ghushimi sakiphemi khunoqo qhoi liqhipe tsuvemo keqono Mizpa lo Gedaliya lau ighino

¹⁴pa vilo pi, “Amun kukau Balis no oghiqhive penike Ishmael puwukeu noye mtha kesha?” Ikemu Gedaliya no tipau pulutsumoe.

¹⁵Tileno Johanan no lomotsa shighi pa vilo pi, “Ipelo wupuzu Ishmael ghiqhive pelo, timi lakhimu khuno tipau shikeno ithimo nanike. Kushiye pa pelo oghiqhive apeni kya? Tishive aye Judami ogholo hekutsupe akeqo kumtsu apanagha kohavepe nanike eno tishive aye Juda lo timi khunoqo ghupe puani keno tipaqo shou kutsakungo keu sughive nanike.”

¹⁶Ikemu Gedaliya no ishi khochileve, “Tipau shikevilo! Nono Ishmael ghili kiu piani keno tiye kuchou kumoke!”