Read Sumi Naga JEREMIYA 41 Bible Online

JEREMIYA 41 - Sumi Naga bible

JEREMIYA 41

¹Tipa mpe aqhi akutsuniulo, Nethaniya nu Ishmael pasuye Elishama ke eno paye kukami bolomi lakhi eno akukau wu akijeu atou gholo lakhike, pano pa gholo timi chighi sasu Gedaliya putsaniye Mizpa lo wu. Panongu kumtsu kumtsa aghulhu lakhi shiake lono,

²Ishmael ngo pa gholo timi chighi akeqono panoqo zutakihi sujo pesu Gedaliya ghiqhive.

³Ishmael no Mizpa lo Israilmi khijehi Gedaliya gholo aghikeno tipaqo kumtsu ghiqhive eno Babilonmi ghushimi tilehi aghikeqo ghi ghiqhikhave.

⁴Tishiwo thoghiu, timi khunomu Gedaliya ghiqhivekeu mtha aphi lono,

⁵Shekhem ngo Shilo eno Samaria kudauno timi lhotache ighive. Panonguye panoqo kichi mhi miyeve, panoqo phimini suxuleve eno pano likhi panoqo phi au kiheleve. Panonguye Achinekilo akumllagho tsunike athi ngo tsungquikeu ta pesu cheke.

⁶Ikelauye Ishmael no panoqo sasu kushoniye Mizpa lo ipe eno paye qasusu wuke. Panoqo lau ighi puzu pano pi, “Kishimoake iloghi puzu Gedaliya julo.”

⁷Panonguno aphughi alou iloghive kemtsa Ishmael ngo pawu timiqono tipaqo ghiqhive eno tipaqo kithikumoye azukikhe qoh lo vesuve.

⁸Ikemu tipaqo loji gholo timi chighino Ishmael vilo pi, “Kishimoake ni-ghiqhi kevilo! Ninguye asho thi ngo Barli thi ngo oliv teli eno akhingozu aluzalo kusupe puanike.” Ikehu pano tipaqo ghiqhimove.

⁹Azukikhe qoh khipaulo Ishmael no pano ghiqhive kemiqo kithi kumo vesuve keno tipauye kije lakhike, Akukau Asa no Israil kukau Basha no pa leighi ke lono chhukeuke. Ishmael no akithi kumo pesu azukikhe qoh tipaulo chhitoi suke.

¹⁰Tipathiu pano akukau nongaqo ngo Mizpa lo timi akeqo, khunoqomi ahza kutsuu akijeu Nebuzaradan no Gedaliya pelo jukutsupeni keu shi qhipuaghi kemiqo kumtsu akughumi shivepe. Ishmael no tipaqo akughumi shi sasu Amun lughi kokutha kudau wuve.

¹¹Johanan ngo pa gholo aghushimi sakiphemi akeqo kumtsuno Ishmael no timi ghiqhikeu chiluve.

¹²Ike panonguno timiqo sasu pa hawu eno Gibeon lo ayizukucho kije akeu phivi lono halu.

¹³Kughono Ishmael no akughu shisasu chekemiqono Johanan ngo aghushimi sakiphemiqo ishi cheghikeu ithulu keno panonguye amloqive

¹⁴eno igho-ghi puzu panoqo lau posusu ighive.

¹⁵Ikemu Ishmael ngo pawu timi tacheye Johanan launo poluve eno Amun ghakhulo posuwuve.

¹⁶Tipathiu Johanan ngo pa gholo aghushimi sakiphemino, Ishmael no Gedaliya ghiqhiveno Mizpa lono akughu shi sasu chekemi hakhokulu ghushimiqo, totimiqo, itimiqo eno shoko shivetsu keqo.

¹⁷Panonguye Babilonmi musave ke kughengu Ishmael no Gedaliya ghiqhiveke, paye Babilon kukauno aghakhulo ahng shipe puakeuke.

¹⁸Ikehu panonguye Babilonmi lau wuluveniaye Ijip kudau wunikeu shive. Wuchekelo Bethlehem kupunulo Chimham ipikeu-alo ngoke.