Read Sumi Naga JEREMIYA 42 Bible Online

JEREMIYA 42 - Sumi Naga bible

JEREMIYA 42

¹Tileno aghushimi sakiphemiqo kumtsu eno Karea nu Johanan ngo Heshaia nu Azariya ishino kijemi kitilami kumtsu sasu ilau ighi

²eno ivilo pi, “Kishimoake ninguno ovilo inijukeu shi tsulo! Nighenguno niLhou AMPEU vilo inikhutsulo. Ningu khunoqo puxu puaghitsu keno tipaqo ghenguno inikhutsu alo. Ghuthu lakhiye ningu kutomo acheke; ikemu itehiye ningu aghulo likhiveake, nono ithulu anike.

³AMPEU niLhou pelo ninguye khi kudau wukepu keno alaghi nipiye penike eno ninguye kiu shikepu keno nipiyepe nike inikhutsulo.”

⁴Ino khochile, “Tishiaye ighono alo ani thono! Nonguno inijuke toi ino AMPEU ningu Lhou vilo inikhuni eno pano kiu pini keno ino nongu vilo pinike. Niye nongu vilo kiumu pimono qhivemo nanike.”

⁵Tileno panonguno ivilo pi, “AMPEU niLhou no nighenguno ahza otsukeu kumtsu ninguno papemo aye AMPEU no nishou kuchou eno pukhukulu thopiu shi apeniu.

⁶Nipulou shiaghina monamu ovilo AMPEU niLhou khuu vilo ninguno khuini tsulo pi iniju anikeno ninguye pa gholunike.”

⁷Atsala chighi thiu AMPEU no iputsake;

⁸ikehu ino Johanan ngo aghushimi sakiphemi kumtsu eno timi kumtsu kukumqoke.

⁹Ino panoqo vilo pike, “AMPEU Israil Lhou khuu lau nongu wu qhuinijukeu pesu ipelo wupe keno pano pike,

¹⁰‘Nonguno aghakhu hipaulo xu achenishi aye ino nongu xaqhepuku nani eno nongu tuleqhivemo nani; ino nongu shosu nani eno nongu nhuvemoke. Ino nongu shou kutsakungo keu sughikeuno imlo ghime kije shivetsuake.

¹¹Babilon kukau musa kevilo. Ino nongu gholo ani eno pa kuka launo ino lekholuve nani.

¹²Niye kimiyekinike ghenguno ino pa pelo nongu kimiyevepe nanike eno nongu pelo akilo idewolupe nani. Ni, AMPEU no piveake.’ ”

¹³Ikemu nongu MPEU nongu Lhou tsa hebide puzu, “Ninguye aghakhu hipaulo ngomoke.

¹⁴Moe, ninguye, Ijip yeghilo wuvenike, tilaye ninguno aghukishi ithumla nani, afuko ghugha chimla nani momu achuqupu kuhano akhuamzu shikeu kuha nani eno ninguye tilau acheuve nanike” ipi piaye,

¹⁵Juda lo timi ghupe puaghikeqo, tishiaye Aqokitikhi MPEU, Israil Lhou tsa hipau inijulo: “Nonguno Ijip lo wuniaye eno tilau xuniaye agi tilau kughopuwu aye,

¹⁶nonguno aghukishi musachekeu huno nongu haluve nani. Nonguno akhuava juighu chekeu huno nongu papesu ighive nani eno nonguye tilau Ijip lono thive nani.

¹⁷Timi khunoqono Ijip kudau wuniaye eno tilau xuniaye agi kughopuwuni keno aghukishi lona momu akhuava momu kusukini lono thive nani. Panoqo gholo milakhimu puxumo nani, milakhimu ino panoqo shou kutsakungo sughiniye akeu lono povemla nanike.”

¹⁸“AMPEU, Israil Lhou no pianike, ‘Nonguno Ijip lo wuve aye Jerusalem lo akemiqo shou imlo kighide ngo iloghu lepukuke paphishi nongu shou ghi lepuku nani. Nonguye junike akuighupu shive nani; timino thaighakeu shi nongu peitha nani eno nongu je pesu musuini keulo peitha nani. Nonguye khilemu a-a hipau ithulu kithemove nani.’ ”

¹⁹Tileno ino itaghi pi, “Nongu Juda lo ghupe puaghikemi vilo AMPEU no Ijip lo wukevilo pi pivae. Ike itehino ino nongu vilo kutughuve anike

²⁰nonguye nongu kuxu puhavetsu peni keushi ala kumolo wucheake. Nonguno ivilo AMPEU niLhou vilo khuini tsulo pi inijuke eno pano ahza tsukeu kumtsu nonguno shini keushi nonguye tushoqhive ke.

²¹Ike ino ishi tsala lono nongu lau pivetsu ake ikemu nonguye AMPEU niLhou no nongu vilo ipuwu puzu pikeu kumtsu hebide ani.

²²Tighenguno hipau kumsululo: nonguno khipa yeghilo wunishi ani eno tilau xuauveniye ani keno tilauno nonguye aghukishi, akhuava momu kusukini lono thi nanike.”