Read Sumi Naga JEREMIYA 46 Bible Online

JEREMIYA 46 - Sumi Naga bible

JEREMIYA 46

¹Ashiayeh kutamiye kishive nani keno AMPEU tsa ilau ighike.

²Ijip ghenguno, Ijip kukau Neko ghushimi ghili pano hipau pike, tipaqoye Babilon kukau Nebukadnezar no Karkhemish a lono leluveke, tiye Eufrati ghoki kupunu lono ke eno tiye Jehoiakim no Juda lo akukau shikeu ampe abidiu shi ake lono ke.

³“Ijipmi akijeuno asheshu, ‘Nongu zuto kutolulo eno aghushiakeulo ilolo!

⁴Khurshiqo aghunanu pepupelo eno ilhekulo! Ajoshiluve eno ayikutsukuqho pululo! Nongu angu chighiluvelo! Mughochilekepu nanu pepulo!’ ”

⁵AMPEU no ishi iniju ani, “Ikemu niye kiukela ithulu ani.” “Panonguye akumsa launo idechilewo cheni. Pano ghushimiqoye hale kighidevae; akumsano chhiveno panonguye toluke thaqhu kohakive poke eno athiu ighowo jumoe.

⁶Khunoqono akumthushi poju keno powumlae; ghushimiqoye pomlave ke. Ahuu, Eufrati phivilo panonguno kupuxape veqhi.

⁷‘Nayil toi ithughi akeu hiye khuu kya?’ Aghoki lakhino amuku yimu aketoike.

⁸Hiye Ijip ke, Nayil toi ithughi ani, aghoki lakhino amuku yimu aketoike. Ijip no pike,’ Ino ithughi puzu ayeghiqha nhaluveni; Ino aphughiqo eno tile akemiqo kutsaleveni.

⁹Khurshiqo wupenike eno khurkulu kohapenike ahza tsulo! Ghushimiqo puwulo: Sudanmi ngo Libyamino azuto xapusu eno Lidyami asuzu pekithimiqo! ’ ”

¹⁰Hiye Alhou Aqokitikhi MPEU tsalake: ishiye pano amkhulu nani; ishiye pano pa ghumiqo ghimeqhini. Pawu azutakihino ilokhakhai moke kutolo pano aghaqivemoke kutolo panoqo ji tsuyeni. Ishiye Aqokitikhi MPEU no ahuu kudau, Eufrati phivilo pano tsuqhive kemiqo heqhileni cheni.

¹¹Ijipmiqo, Gilead lo wulo eno kusughu phujuwulo! Owu kusughu kumtsu adou shive aghike; kiunomu nongu shipivimlake.

¹²Ashiayeh kutamino okukujo chiluvae; kumtsu ghano aghugha chiluvae. Ghushimi lakhino lakhiu kupuxalu eno pama kinikujo ayeghilo iluqive.

¹³Kughou Babilon kukau Nebukadnezar no Ijip lenike ighi keno AMPEU tsa ilau ighi. Pano pike,

¹⁴“Ijip lo taunqo lo hipau pesu asheshulo, Migdol ngo Memfi ngo Taxpanhes lo: ‘Nolikhi noshokhalu kepushi kutolulo; nonguno aghikeu kumtsu aghukishi lono kutsaleve nani.

¹⁵Kushiye nolhou akumtou Apis ye ikiqive kya? AMPEU no pa hekuluqhiveke!’

¹⁶Nowu ghushimiqoye shokukholu puzu iluqiveke; lakhino lakhiu vilo pike, ‘Papashilo! Nitimiqo lau nighakhulo wunike eno aghumi zutakihi lono povenike!’

¹⁷“Ijip kukau aje kithe lakhi tsulo, ‘Atsakuzau Pa Dokivi Phevekeu.’

¹⁸Ni, Aqokitikhi MPEU no akukauke, niye xuachekeu Lhou ke. Tabor naghutono naghuto kutau nguno qhemghai akeshi, Karmel naghutono azughi shou chuqumughai akeshi, ole ighi nikeu kuka kumtoye titoike.

¹⁹Nongu Ijipmiqo, akughumi shi susu wunike kutolo! Memfi ye asayeqha shive nani khunomu ngomoveno ixapinyive nani.

²⁰Ijip ye jukighilepu mishiqu toike, ahuu kudauno quqhikeu khi lakhino leighike.

²¹Lino piqe sughikemi ghushimi thotsu ghi amshiti toi kiumu shimlave. Panonguye puthughope kumjomoveke; panoqo kumtsu tsughuchile puzu pove. Panoqo puhave nikeu tsala ighive, panoqo kutsaleve nikeu do ighive.

²²Apighino igha keshi aghumi ghushimino chechekelo Ijip ye posu wuve. Panonguno amughu pesu panoqo ghiha tiye timino asubo yeqhi akeshike, eno aghasu kutsaleveke toike.

²³Pano timiqoye kihi khamlake; panoqo wu ghushimiye leusu nguno kutomoke.

²⁴Ijipmiye shikukujove; panonguye ahuu akemiqono leluveke. Ni, AMPEU no piveake.”

²⁵Aqokitikhi MPEU, Israil Lhou no pianike, “Ino Thebemi lhou Amun ghimeqhini cheni eno tipa gholo Ijipmi kukami ngo tipau lhouqo ghi. Ijip lo akukau ngo pa pukhuchekemi kumtsu ino sawo

²⁶panoqo pithive nishi chekemi ulo suvetsuni cheni, tiye Babilon kukau Nebukadnezar ngo pawu ghushimiqoke. Ikemu hithiuye Ijip lo itaghi timi kughunauve nani, wovekeu ghulokilo panongu acheke toi. Ni, AMPEU no piveake.”

²⁷“Iwu timiqo, musa kevilo, Israil lo akemiqo, musa khokhoshi kevilo. Nonguno khipa yeghilo akughumi shiani keno, ino tipano yeghi alakushuwa lono nongu lekholuve nani. Nonguno aghakhulo ide ighi nani eno iqunei xuluve nani; nonguye sushokulu anani eno khunomu nongu shikumsamo nani.

²⁸Ino nongu lau ighino nongu xalu nani. Ino khilehi nongu halepuwuve keno tipaqo shiayeh kumtsu ino kutsave nani, ikemu niye nongu kutsamo nani. Niye nongu ghimemono puwuvemo nani; ikemu ino nongu ghimekeulo niye aghibiu lono shi nani. Ni, AMPEU no piveake.”