Read Sumi Naga JEREMIYA 48 Bible Online

JEREMIYA 48 - Sumi Naga bible

JEREMIYA 48

¹Hiye Aqokitikhi MPEU, Israil Lhou no Muab ghenguno pikeu: Nebo lo akemiqo kimiyeshe nolae. panoqo taun ye kutsavae! Kiriathaim ye khasuluvae, tipau liwo kuloghiye tuxaqhivae, eno tipaulo timiqoye shikukujovae;

²Muab jekipiye kuhave. Aghumino Heshbon khasuluvae eno Muab shiayeh kutsalenike kuchughu ani. Madmen taunye inaqhoivepe nani; aghushimino tipau shou leighi nani.

³Horonaim lo akemiqono igha ipeghi, “Kughukughaleikeu! kutsalekeu!”

⁴“Muab ye kutsalevae; itimiqono igha qakeu inijulo.

⁵Luhit lo kuwula phivilo panoqono qaphemlano qa akeu inijulo; Horonaim lo iqikeu lalo amlo kughutashi igha akeu inilo.

⁶Panonguno piani, ‘Nongu kuxu puxulu kepushi papashilo! Asayeqhalo tughashi gadaha toi polo!’

⁷“Muab noye okuka kumto ngo okinikulu shou pukhupe acheni; Ikemu itehiye noghi leluvepe nani; Nongu lhou Khemosh ye hapupovekeu shiuveni cheni, pa gholo sakiphemi ngo achinemiqo wuve nani.

⁸Taun lakhimu kutsalevemokeu shimo nani, akhila ngo aqa kivi kinikujo shipsave nani. Ni, AMPEU no piveake.

⁹Muab ghenguno akumona tuqu shope qhilo; tiye paikhavino kutsaleve nani. Tipaulo taunqoye ixapinyi qhive nani, eno khunomu tilehi itaghi xumove nani.”

¹⁰(Timi khuno pa mlo kuchopu pesu AMPEU kumla shimoni keno tipau musuinivelo! Timi khuuno ghithapinyi ghiqhimoni keno tipau musuinivelo!)

¹¹AMPEU no pike, “Muab ye pulhapujulo kupuna mono xuacheni eno khilemu hapupovekeu shimphike. Muab ye atsayiji toi bukuqumono qhiveke eno abohu lakhi lono lakhiulo lekiqevekeu shimoke. Tipau xo ye khilemu shipusa mphike eno tipauye alhokuthulo michekivi shi achenike.

¹²“Ikehu itehiye ino timi puwu puzu atsayiji toi Muab peleve nikeu ghuloki cheni. Timino tipau jibohu lephepe kumsa shiveno tipaqo kubolepinyive nani.

¹³Tithiuno Muab ye panoqo lhou Khemosh jupesu kujo kighiyive nani, tiye Israilmino Bethel lhou pukhube chekeu jupesu kujo kighive keu toi nani.

¹⁴‘Muab lo kiptimiqo, nonguye kushiye aghutomi eno aghulo wujuve kemi amlo kumtomi kepi cheni kya?

¹⁵Muab ngo tipau phughiqoye kutsa-levae; tipaulo lhothemi aqhekivi ghiqhilevae. Ino akukau, Aqokitikhi MPEU ke eno ino piveake.

¹⁶Muab puhavekepu kupunuwo chea: tipau ixapinyive kepu itheno chenike.

¹⁷“Nongu Muab shiayeh phivilo kua-miqo, nongu tipau jekipi ithiakemi kumtsuno tipau ghenguno mloqalo. Ishi pilo, ‘Tipau yehkipe kukaye kubolevae, tipau jekipi eno akughushuye kuhavae!’

¹⁸Nongu Dibon lo achekemiqo, nongu gigihupu alono iqighivelo eno ayeghilo amukhulo iqalo; Muab kutsalekemi hile ani eno tipau liwo kuptu ixapinyi qhivae.

¹⁹Nongu Aroer lo achekemiqo, ala phivilo puthugho peno khelo; khunoqo pocheghi nikeno tipaqo vilo inijulo, kiu shivekeno panoqo launo iyighijuluvelo.

²⁰Panonguno khochile nanike, ‘Muab ye ikiqivae,’ ‘tipau ghenguno qalo; tipau shikukujovae. Arnon ghoki qhalo Muab kutsale vekeu pesu asheshulo!’

²¹“Ayeghi topelo aphughi hipaqo akeqo shou kughatha keu ighivae: Holon, Jaza, Mefat,

²²Dibon, Nebo, Bet Diblathaim,

²³Kiriathaim, Bethgamul, Bethmeon,

²⁴Kerioth eno Bozra. Muab lo aphughiqo putou ngo akupunulo akeqo kumtsu shou kughathabe keu ighivae.

²⁵Muab kumgha munuda vetsuae; tipau kuka kutsalevae. Ni, AMPEU no piveake.”

²⁶AMPEU no pike, “Muab shokumzulo kughengu tipauno ihebideke. Muab ye pa likhi pano mughulekeulo ihi nani eno timino junu nani.

²⁷Muab, nono kishi Israil lo akemiqo thaighaqhi keno kumsululo! Israilmiye kupkami loji gholono kughakuqhape aghi akeshi nono panoqo peitha kehu!

²⁸“Nongu Muab lo khunoqo acheni keno nowu taunqo qhivelo! Wupuzu atuxulo auvelo! Amiqhi khipaqono anhekikhilo apusu pesu cheni keno noye titoi shilo.

²⁹Muab ye ighono aqhekuzake! Noye kiutoi aqhekuza keno, lahilaza eno chuqumghalesu acheni keno ino chiluvae. Noye olikhi okumsu pivi achenike.

³⁰Ni, AMPEU no panoqono lahilaza keu ithi ani. Panoqo qhekuza lakiye kiumu kuhae eno panonguno shiache keuye shipushumo nani.

³¹Ikemu Muab lo akemiqo eno Kir Heres lo akemiqo ghenguno ino qa tsu nani.

³²Jazer lo akemiqo nguno alaushi Sibma lo akemiqo ghenguno ino igha qa tsu nanike. Sibma phughi, noye atsayi ghuno quakeshi alokano Amiti Zughi kachesu Jazer kutolo wuke. Ikemu itehiye mutsutsalalo xathiqo ngo atsayithi ye kutsalevae.

³³Muab yeghi ghuma kivi lono alokughuno ngo alokivi ikhipewuve ake. Atsayithi kutsughu-a lono atsayiji ino qowu pemovae; tilehi atsayiji mlaphe puzu alokivi shi ighanikemi lakhimu kuhavae.

³⁴“Heshbon ngo Eleale lo akemiqono igha mukuke eno panoqo ghughaye Jahaz kuto loghi chiluke eno tiye Horonaim ngo Eglat Shelishiya kuto loghi chiluke. Nimrim ghokiti ghi qhaive ake.

³⁵Ino Muab lo akemiqo pelo panoqo kumlla-alo piti mllachekeu ngo panoqo lhouqo lau heqhipe mllachekeu lakhave nani. Ni, AMPEU no piveake.

³⁶“Ikehu imloye Muab ngo Kir Heres lo akemiqo ghenguno mloqa ani, tiye timi khamino fulili lono akithile pheakeu toi anike, kughengu panonguno pighi akeu thwokha kumtsu cheveake.

³⁷Panoqo kumtsu panoqo kutsusa miyevae eno panoqo kichimhi tsalevae. Panongu kumtsu panoqo ulo kihethale pesu ani eno kumtsu ghano yeqhiye phi uani.

³⁸Muab lo aki kutsuqa kumtsulo eno aqo ghili-a kumtsulo kutau kiumu kuhano qani mlokeu likhi anike, kughengu khunomu lunishimove keu yeghili lakhi toi ino Muab kuboleveke.

³⁹Muab ye shikukujove! Tiye ixapinyi ani eno sukumxalo ashiayehqono tipau junuqhi anike. Ni, AMPEU no piveake.”

⁴⁰AMPEU no tushoqhive ake aluqu lakhino pa chishibo sukhopesu tsu-iqi keshi ashiayeh lakhino Muab shou iqighi nani

⁴¹eno taunqo ngo aliwo qoghe kumtsu khasupe leluve nani. Tipa tsalani, Muab lo ghushimi qoye totimino apunu kusu suake toi musa-ichive nani.

⁴²Muab ye kutsaleve nani eno ashiayeh lakhi shi achekeu kuhave nani, kughengu tipauno ihebideke.

⁴³Akuighupu, aqokuchhu eno alichheno Muab lo akemiqo kheanike. AMPEU no piveake.

⁴⁴Khunono akuighupu lono povenike pukaputsani keno aqokuchhulo ilulove nani eno khunono aqokuchhu lono milisusu ipelu aye alichhe lono meluve nani, kughengu Muab kutsale venikeu shi AMPEU no ado kihithape puani.

⁴⁵Tipaulo kupokichemi akukuphu kuhakemiqoye Heshbon lo sushokulu phujuwu nani, tipau phughiye akukau Sihon no ayehpe cheke, ikemu tiye amino ghule ani. Aghukishi kupuchekemi Muabmi lughi ahuu eno naghuto kiqheqoye amino pitileve ake.

⁴⁶Muab lo akemiqo kimiyeshenolae! Khemosh mlla chekemi timiqoye kutsalevae eno pano tianuli qoye akughumi shi sasu wuve ake.

⁴⁷Ikemu ighinikeu tsalalo AMPEU no Muab pesu itaghi kinikulu shi nani. Hipaqo kumtsu Muab shou shi nani kepi AMPEU no piveake.