Read Sumi Naga JEREMIYA 5 Bible Online

JEREMIYA 5 - Sumi Naga bible

JEREMIYA 5

¹Jerusalem lo akemiqo, alaghilalo iqho iqijulo! Jukutolo eno kishi ani keno ithilo! Alhikishi-a kumtsu phujulo! Timi lakhi likhinomu achipiu shi kemi eno Alhou lau amikucho shi chekemi nonguye phulu anima? Nonguno phuluaye, AMPEU no Jerusalem kipimi qhivetsu nanike.

²Nonguno AMPEU mlla cheni kepi piaghi namu, nonguno akimki lono tushoqhi cheni.

³Kuchouno AMPEU ye amikucho shikeu phuju cheni. Pano nongu kuzaqhi ikemu nonguye amloksa kuhae; Pano nongu chinedaqhi kemu nonguno shikithetsu keu ikhilu tsumoe. Nonguye kuthovilo kemiqoke eno nongu xine launo tsughusu wuvemoe.

⁴Tithiuye ino ishi kumsu, “Timi hipaqoye kumlhomi eno ayekumtha-mike. Panonguye anikha shi xuacheni panonguye Alhou no kiu khuani keno mthake, AMPEU no panoqo pelo shipeni shikeu mthake.

⁵Ino kijemiqo lau wuni eno panoqo putsani; mutsuqheyino panonguye Alhou no panoqo launo kiu khu ani keno ithi aghi nani, AMPEU no panoqo pelo shipeni shikeu ithi aghi nanike.” Ikemu panoqo kumtsuno AMPEU kuka peveke eno pa gholuni keu mopike.

⁶Tighenguno aghasa lono abongushu qono panoqo tsuve nani. Asayeqhalo tungtughano panoqo sutha piniyive nani, eno angushuno pano phughilo miqe auve nani. Timi hupaqono khalau ipeghiaye panonguye kishitha pinyive nani, kughengu panoqo xineye kumzapuke eno panonguno tamono Alhou launo tsughu chilewuveke.

⁷AMPEU no ishi iniju, “Niye kushiye iwu timiqo xine qhivetsu kepua? Panonguno iqhiveno cheve eno kuchou kumo lhouqo mlla chenike. Iwu timiqono aghaqimoke kutolo ino panoqo lojike ikemu panonguno salhashupuke, eno kutu-qhalimi sasu ado kumtsu puwo achenike.

⁸Panonguye akivishi pulhuchekeu khurshino hakilhe kelauno ngosumlakeu toike, akisughumi lakhino lakhiu nipu jumineke.

⁹Hikithipu ghenguno niye panoqo ghimeqhimoni kesha? eno ashiayeh hikithipu shou amukhu lumoni kesha?

¹⁰Iwu timiqo tsayilu kutsavetsu penike ino aghumi puwu nani, ikemu tipaqo qhoyi kutsavepe monani. Alokaqo likhi xidive penike ino panoqo vilo pinani, kughengu aloka tipaqoye iwu kumoke.

¹¹Israil ngo Juda lo akemiqono ikughapesu qhoi atheshiveke. Ni, AMPEU no pike.”

¹²AMPEU wu timiqono pa peve eno ishi pike. “Paye kiumu shimo nani; nishou kiumu shikusapu ghuloki ighimo nani; ninguye aghukishi momu puqumiye keu sholumo nanike.”

¹³Panonguno pikeuno tungkupumiye abokumsa eno kiumu kuhae

¹⁴eno panonguye AMPEU launo atsape pechemoke. AMPEU Aqokitikhi Lhou no ivilo pike, “Jeremiya, timi hipaqono hikithipu pichenike ghenguno ino okichilo itsa pelo ami lakhi toi kughulho tsu nani. Timiqoye asu paphi shi nani eno amino panoqo piti puhave nani.”

¹⁵Israil lo akemiqo, AMPEU ye nongu leve penike ashiayeh lakhi putosuuno saghini cheni. Hiye mughachhoi keu eno mulholo shiayeh lakhike, nonguno panoqo tsa ale mthakeu shiayeh lakhike.

¹⁶Pano timi asuzu kipemiye ghushimi akughushumi eno kimiyemo mitheno kutami heqhi pithive cheni.

¹⁷Panonguno nowu axa ipeghikeu eno nochuqupu tsakhavetsu nani; no tianuli kiptimi totimi jeli ghiqhivetsu nani. Panonguno nomishi loji eno bheri loji ghiqhile nani eno no-tsayibo ngo khughuthibo shipusave tsu nani. Nophughiqo aliwo putupuakeu nongu no pukhu achekeu hu panowu ghushimi lojino kutsaleve nani.

¹⁸AMPEU no pi, “Tipa tsalaqo loghi niye iwu timiqo qhoyi kutsakhave mo nani.

¹⁹Kushiye niye hikithipu shivetsu kelapi panonguno iniju aye, Jeremiya, noye panoqo vilo pilo, panonguno ilauno tsughusu wuve puzu panolikhi pano yeghilono inaghami lhouqo qeuveke, ike tihutoi panonguye inaghami qeuvepe nanike.”

²⁰AMPEU no pi, “Jakob laghami vilo pilo, Judalo akemiqo vilo pilo!

²¹Tsaqui inijulo, nongu anikhamiqo nongu anhethi puapulaghi ithumlakeqo, akini puapulaghi chimlakeqo.

²²Niye AMPEU ke, nonguye kushiye isumsamo kya? Kushiye izulo msakhokho shimo kya? Ino azughi ghenguno alughi shipenike asaye qhitsuke ike tipau kathamlake. Azughino kucho ikuluvi ke tipau nguno alaulo wumlake. Azu kukuchono ighaluvi ikemu tipaqo veche wumlake.

²³Ikemu nongu timiqoye, nonguye kuthoviloke eno hebide ke; nonguno tsughuchileveno iqhiveke.

²⁴Ino mutsu tsughu ngo ghixu tsutsughu nongu lau puwu keghi eno ampe atsu-tsu nongu pelo ghile hulupe kepu shikeghi nonguye igihu nikeu kumsumoke.

²⁵Tishi kehu nongu xineno thime kivi hikithipu nongu launo luvetsuae.

²⁶“Timi lhoksami iwu timiqo gholo xuanike; akhame pesu aghau meluveniye sukhope akemiqo toi panonguno timi miqe acheni; panonguno alichhe shipe qhipuzu timi meluve cheni.

²⁷Aghauhamino aqhupulo aghau supe puakeshi panongu no pukasughi keu pesu panoki shepichhi puani. Tighenguno panonguye akuka kumto shi acheni eno kinimi shi ani.

²⁸Panonguye aqu leleshi chhiboyi anike panonguno alhoksa kumla shikeulo tavae pikeu kuhae. Panonguye mighimghaqo pelo pano chipiu ithulupe chemoe momu neda qodape akeqo lau kuchou xakutha piye chemoke.”

²⁹“Ikemu hikithipu thime ghenguno ni, AMPEU no panoqo ghimeqhi nani; hipa shiayeh shou ino amukhu lunanike.

³⁰Akumzapu eno akichiqhi kepu lakhi aghakhulo shipuani;

³¹tungkupumino akimki likhi thono kiumu pi moe; achinemino tungkupumino ahza tsukeu lono ayehpeke; eno iwu timiqono tipaulo kiumu mopikeu kuhae. Ikemu kughono tipaqo kumtsu kuhaveni keno panonguye kishi nani kya? “