Read Sumi Naga JEREMIYA 9 Bible Online

JEREMIYA 9 - Sumi Naga bible

JEREMIYA 9

¹Ikutsuye azukikhe lo akeu zu shi aghi keaye, eno inhethiye anhezu puki keaye, putho pucho iwu timi ghiqhivekeqo ghenguno igha qa ani cheke.

²Asayeqhalo ngokulupu-a ino aghi keaye, iwu timiqo launo poveno tilau wuveni cheke. Panongu kumtsu pichebekum-lamike, muquqhi chekemi muqoke.

³Panonguye pulhapuju mikinike panoqo mili asuzu toi kutope acheni; Amikuchokumono kuchou zuqhu shi aghakhulo akumtoshi thuwu ani. AMPEU no pi, “Iwu timiqono alhoksa lakhi lono alhoksa lakhi papewu acheni, eno niye panoqo Lhou kepi ni ikhilu chemoe.”

⁴Pututa shelo pa kusami jukutokugho masaveke eno khunomu athikuzumi ghi pukhubemlake; Kughengu athikuzumi kumtsu Jakob toi pishikiqhike, eno kumtsuno pututa kusami piputhake.

⁵Kumtsuno pa kusami pishiqhi cheni, eno khunomu kuchou tsa pichemoe. Panonguno mikinikeu pano mili shika acheni panonguno axine shi acheni eno xaideghiveni keulo akulhoshi acheni.

⁶Panonguye heqhi buqhikeu lakhino lakhi papesu shi acheni, eno pishikiqhi lakhino lakhi papesu shi acheni.

⁷Tighenguno Aqokitikhi MPEU no pi ani, “Ayi toi ino iwu timiqo ghukimtheve nani eno panoqoye pejukeulo qhi nani. Iwu timiqono alhoksa shivae, niye panoqo shou kiu shikepu kya?

⁸Panoqo miliye tughu akeu piji toike; panonguye pulhapuju miki cheni. Kumtsuno pututa kusami vilo shompami toi putsakile cheni, ikemu kuchou loye pa ghenguno alichhe shipe qhianike.

⁹Hipaqo thime ghenguno niye panoqo ghimeqhimoni kesha? Hitoikeu shiayeh shou niye amkhu lumoni kesha? Ni, AMPEU no piqhiveake.”

¹⁰Ino pi, “Niye naghutoqo ghenguno mloqah eno aluza ghenguno anhezu pijinike, kughengu tipaqoye qhaive ake eno khunomu tipaqo kathasu izuwumove ake. Amshi ghugha khilemu chilumovae; aghau ngo tughashiqoye yewu khavae eno chekhavae.”

¹¹AMPEU no pi, “Ino Jerusalem pesu ixapinyi kumqove nani, sherqo kungo-a shitsuni; Juda lo aphughiqoye asayeqha shive nani timi khunomu ngomovekeu-a shive nani.”

¹²Ino iniju, “O AMPEU, kushiye aghakhuye kutsapinyive eno asayeqha toi qhiveno timi khunomu tipau kathasu izuwumovea kya? Khuno hipau vethakulupu shi alokutsu lukumkha ani kya? Noye khuvilo hipau chixechilei pivea puzu pano kutami vilo pilukepu ani kya?”

¹³AMPEU no khochile, “Hipau shivekeuye iwu timiqono ino panoqo lau akukutsu tsukeu pheveke ghengunoke. Panonguye igholumoe eno ino panoqo vilo pikeu shimoke.

¹⁴Tishinike zuqhulo, panonguye kuthovi auve eno panoqo papuno shilopi shikakeu toi Baal su-atu julho mllawukhaveke.

¹⁵Tishiaye ni Aqokitikhi MPEU, Israil Lhou no kiu shini cheni keno inilo: Ino khumtsai keu tsani chupenike eno tughuzu yepenike iwu timiqo tsu nani.

¹⁶Ino panoqo kugha pesu ashiayeh kutami gholo kuthole puwuve nani, tiye panongu ke kumono pano puasu ghi chimla aphikemiqo gholo puwuve nani, ino panoqo qhoyi kutsale khavemoke kutolo ino aghushimi muqo panongu shou puwu nani.”

¹⁷Aqokitikhi MPEU no pike, “Kiu shi ipeghi ani keno tipau kumsujulo! Mloqah kemiqo ighipenike kuwulo, kithikuhalo le phechekemi totimi kuwulo,”

¹⁸Timiqono pike, “Panoqo vilo papashilo pilo eno nighenguno kithikuhalo le phelo, tiye ninhethilo anhezu pijimoke kuto, eno igha qakeu lono ni-nhebo khoivemoke kutolo phelo.”

¹⁹Zion lo ighakeu sutsa inilo, “Ninguye hephokicheivae! Ninguye qhoi shikukujo khavae! Ninguye nighakhu qhive masavae; nikiqoye hexapinyi tulaqhivae.”

²⁰Ino pike, “Nongu totimiqo, AMPEU tsa inilo, pa tsa amlo tsuqhiyi kumsujulo. Kishi mloqa kepu keno nongaqo shikalo, kishi kithikuhalo le phekepu keno nopumiqo shikalo.

²¹Akithiye nilashe vechesu alou iloghivae eno nikukakilo iloghivae; tipauno alaghilalo ititunuqo ghiqhipewuvae eno alhikishialo lhothemiqo michepewuvae.

²²Akithi kumoqoye aqha kumtsulo kutholevae, tiye alulo aghuma qhepuakeu toivae, Tiye aghi kughomino aghi ghope athiu qhiveno khunomu pekutsumono aketoivae. Hiye AMPEU no ivilo pilopi pikeuke.”

²³AMPEU no pike, “Alokutsumiye pano lokutsulo qhezalaki kepu kumoe, akumtomi pimu pano kumtolo qhezakepu kumoe, kinimi pimu pano kinilo qheza kepu kumoe.

²⁴Khualano qhezanishi aghi aye paye ni ithi eno ivethalukeulo qheza kepu kughengu iwu kikimiyeye iqemokeu eno niye kiuno achipiu, amikucho keno tipau shicheni. Hipaqo thime shikeuno ilopiqilu cheni. Ni, AMPEU no piqhiveake.”

²⁵AMPEU no pi, “Julo, khunoqono aphighu yiko ghakemi kemu puloshoqhi pechemo keno tipaqo kumtsu ino ghimeqhi nikeu ghuloki cheni.

²⁶Timi tipaqoye Ijip, Juda, Edom, Amun nuliqo, Muab eno asayeqhalo khunoqono pano kutsusa ikhonhei tsave cheni keno tipaqo kumtsu. Hipaqo shiayeh lakhimu eno Israil lo akemi milakhimu iwu puloshoqhi pechemoke.”