Read Sumi Naga AKUMLO 2 Bible Online

AKUMLO 2 - Sumi Naga bible

AKUMLO 2

¹AMPEU no pa mlokighide launo akuzu pesu Zion nhave. Israil qhivutsuniyi akeu pano kunguuno aqhou kutolo hexapinyive. Pa mlokighide tsalalo pa Achine ki ghi pano qhive.

²Kimiyekeu kuha puzu AMPEU no Juda lo aphu akeqo kutsaveke, eno aghakhu sushope akeu liwoqo tuleqhive. Akukaqha ngo tipaulo ayehkipemiqo shou pano kujomza kepu sughive.

³Pano muqhumzai Israil kumto hepholeve tsu; Kughono aghumi ighi keno paye nishou axu ideke eno ami toi thwokha shipusave tsu.

⁴Aghumi toi pa piji pesu ni mijike; Pano ami toi axukighide lepheno achinekilo Zion limi nino jupe amloqi chekeqo pithi khavetsue.

⁵Aghumi lakhi hutoi AMPEU no Israil kutsave; Paye pawu aliwo ngo kukaki shipusa pesu qhive. Juda lo akemi shou pano tamo mithe keu mlokusa sughike.

⁶Ninguno pa mlla chekeu Achine ki pano mukhu munoshi hepholevetsu; Akimtheshi ikhilu chekeu tsalaqo ngo Sabat pinyeqo kumtsu pano lakhavetsu. Kukami ghi achinemi ghi aphiphi lono pa mlo kighide gha sholuke.

⁷AMPEU no pawu akiptia peve eno pa kimthe chineki kughukughalei vetsu; Pano aghumi pelo tipau putukha keu hepholeqhive penike pulosuvetsu. Ghuthu lakhi lo nino alokivishi mlla che keualo aghumino huttiauve.

⁸Zion putukha keuye ikiqive masakeu AMPEU no tsuyikhoyi shiauve; Tipau qhoi kutsaleve pekepushi pano mighithavetsu. Aghakhu qogheqo eno putukhakeqo itehiye kumtsu ixa pinyi akhani.

⁹Putukhakeu hukikhaqoye atenino venhape ani; tipaqo khaduye hechhe pinyive. Itehiye kukami ngo kijemi ye kupokichelo ani. Ayezahye shikapiye chemovae eno tungkupmiye AMPEU launo kungunhetsu kuhavae.

¹⁰Jerusalem lo kitemiye panoqo kutsulo ayeghi mukhu xapu eno yeqhiye phi pepu puzu inaqhoi ayeghilo iqae. Ilimiqono pano kutsu pishiqhope anike.

¹¹Inhethiye qake launo anhebo khoyivae; ingulhoye kutakihi ani. Niwu timi kutsave keulo niye amlo ghime launo lhokutuvae. Aphughi laghilalo itimi ngo anga kughunuqoye thiqhi thiqhi anike.

¹²Muzuthi tughuthi kelauno panonguno azanoqo lau ighasu wuke; Panonguye izapu akeshi alaghilalo ikiqie, eno azano khape pulaghi pano kuxu sutha huve.

¹³O Jerusalem, kupuqhiyi chekeu Jerusalem Niye okugha pesu kiu kimihi shitsuni kya? niye kishi puzu olokughunotsu luni kya? Khumu hikithipu shi aghime shimphike. Azughi mighiwo tomlake toi okutsa kungovekeuye titoivae; lajupu kiumu kuhavae.

¹⁴Nowu tungkupmino akimki tsa likhi thono nongu vilo kiumu pimoke; Pano shekushuno nongu pishiqhive puzu khilemu nongu xine lhephe tsumoke. Panonguno nonguye xaide kepu avehupu shiamo kepi nongu pelo kumsuvepe.

¹⁵Aphughi vechewu chekemino thaigha ghi nongu shou jupukuke. Jerusalem ixapinyi akeulo panongu kutsu kungu eno junuqhi - “Jukighilepu phughi huye hikesha?” “Hiye ayeghiqhano akijivilo chekeu kesha?”

¹⁶Oghumi kumtsuno othaigha eno othaigha ghi anhethi xukidepe ojuke. Panonguno pano mutsu mineghi agi sukughupe pi, “Hipau nino kutsaluvae! Ninguye hipa tsala kheacheke!”

¹⁷AMPEU no pano shini cheni kepi kichichekeu ashekha shivae: Pano ado kushuwa lono kutughu cheke toi kimiyemo mithe puzu ningu kutsavae. Pano nighumi pelo tokulu shipe eno nino veqhive keulo panoqo pelo alovivepe.

¹⁸O Jerusalem, nowu putukha puakeu pelo AMPEU vilo ighamuku pelo! Nonhezu pelo putho pucho aghoki qo toi qowu pelo; Amlo kighishi ngo qanimlo keu lono nolikhi noghime qhilo!

¹⁹Puthotsu anguno anguno idaithu puzu AMPEU lau ighamukulo; Nomlo ghuju azu toi leqhilo eno notianuli kimiyeqhiyipe nike qhuinijulo; Alaghila acheku kumtsulo itimiqono akhuavashi thi ani!

²⁰Julo, O AMPEU! nono ghimeqhi akeqo julo! Topumino panonguno kupuqhiyi tuchomujo chekeu tianuliqo shi chuani! Achinemi ngo tungkupmiqo Achineki lono ghiqhive ani!

²¹Ahelomi ngo kitemi aphiphishi alaghilalo thi ani, Apumi ngo ilimi aghumi zutano pithive. Omlo kighide tsalalo kimiyemo puzu nono panoqo ghiqhive.

²²Nono ighumi kusuno aqha kumtsu lo isuhu pesu shikumsa keu ghulhu shipe, eno omlo kighide tsalalo khunomu pokaulu momu puxulu pe move. Ino ati anuli khunoqo tuchomujo saputhu keno panonguno ghiqhivetsuke.