Read Sumi Naga AKUMLO 5 Bible Online

AKUMLO 5 - Sumi Naga bible

AKUMLO 5

¹AMPEU, nishou kiu shiveakeno kumsulu tsulo; Nishou jupukutsulo eno ni thaigha keu kumsulu tsulo.

²Niwu tinhemghaqoye inamiqono peauvae; inaghamino nikilo ngo auvae.

³Nipuhnoqoye aghumino pithi khaveke, eno itehi nizanoqoye chimemi shiauvae.

⁴Nilikhi nizu ametsuno yemasavae; Nilikhi ni su qhupe sughu mayesavae.

⁵Kuokhasu nikuolo pipeno niqoqhi eno nipelo akulho qhilu pemoe.

⁶Akuxu puxu aniaye achuqupu lukumkha lunike ninguno Ijip lo ngo Asiriya lo khuchhuwuke.

⁷Nipuasuqono axine shiveke ikemu panonguye kuhavae eno ningu pelo panoqo xine ghenguno ime anipeke.

⁸Timi qemi nguno alhoksau qono ni shou ayehpe ani, ikemu khunomu panongu ulono nixamlake.

⁹Aluzaqha kumtsulo ghikiqhimi anamu nikuxu ghi kupumono achuqupu phuwu acheni.

¹⁰Puqumiye keuno piti puza qhi ani, eno niyikoye amiphoki shukuthui keu toi acheni.

¹¹Zion totimi qoye kutamino sazuvetsu; Juda lo aphu akeqo kumtsulo ninga noqoye anguka lono shipusave tsuke.

¹²Niwu sakiphemiye sawo tshuqhi pithiveke, kitilamu kitemiqo qhoqhu gihu tsumoe.

¹³Niwu apumiqoye anguka lono aquaxemi toi athi tsughupeke; Asu ape kimshi xapukeuno kiptimi itimiqoye kulokuloi veke.

¹⁴Muchomiqoye aphughi khagho phivilo iqa kuho chemovae, eno lhothemiqoye alephe chemovae.

¹⁵Nikuxu lono alokivi chekhavae; amlo kughujuno nino ilhechekeu zuqhushi auvae.

¹⁶Nino jupesu akijivilo chekeu thime lakhimu kuhavae. Nino axine shiveke eno itehiye ningu hasapu shivae.

¹⁷Ni mlo alouno sukutu ani eno ninhezu pole kelauno akushukulu anhethi xukho lukeu likhi.

¹⁸kughengu Zion toghiye piyighiveno yenguyelei kehu eno tungtughano tipau ixapinyi akeu katha iqho iqi anike.

¹⁹Ikemu O AMPEU, noye alhokupuju lo akukauke, eno tiqheli tiqheli kutolo ayehpe nanike.

²⁰Noye kushiye ado hitotohi niqhive akya?

²¹O AMPEU, olau ni sachile sawulo! Ni sachile sawulo! Khaghi nijekipi hu suchile sughitsulo.

²²Ikeo, noye alhokupujulo ni peivea kya? Omlo kighideye kihikutha kuha kesha?